Prezident Polščy zajaviŭ, što jaho kraina budzie zmahacca za vyzvaleńnie ŭsich biełaruskich palitviaźniaŭ
Sa słoŭ polskaha prezidenta, biełarusaŭ «teraryzuje samadzieržac», jaki nie maje padtrymki hramadzian i pryjšoŭ da ŭłady ŭ vyniku falsifikacyj na vybarach.
Polšča praciahnie razhladać režym Alaksandra Łukašenki ŭ jakaści saŭdzielnika rasijskaj ahresii. Jana prykładzie namahańni dla ŭzmacnieńnia sankcyjnaha cisku na jaho, budzie damahacca vyzvaleńnia ŭsich palitviaźniaŭ u Biełarusi i praciahnie prajaŭlać salidarnaść ź biełaruskim narodam, u tym liku šlacham padtrymki biełaruskich dyjaspar. Pra heta prezident Polščy Andžej Duda zajaviŭ na sustrečy z polskim dypłamatyčnym korpusam, jakaja adbyłasia ŭ paniadziełak, piša Reform.by.
«Chaču nahadać pra režym Alaksandra Łukašenki, jaki abjadnaŭsia z Kramlom. My nie pavinny zabyvać, što Biełaruś — heta nie tolki kraina, jakaja aficyjna padtrymlivaje Rasiju, ale i adzinaja, jakaja de-fakta spryjała bajavym dziejańniam, addaŭšy svaju terytoryju dla napadu na Ukrainu z poŭnačy ŭ krytyčnaj fazie vajny.
Tamu, pakul Biełaruśsiu kiruje Łukašenka, polskaja dypłamatyja pavinna stavicca da jaje jak da dziaržavy, adkaznaj za viadzieńnie pucinskaj vajny. Takim čynam, my pavinny imknucca na mižnarodnym forumie ŭvieści i ŭzmacnić usie mahčymyja sankcyi suprać hetaj krainy», — skazaŭ jon.
Pry hetym Duda adznačyŭ, što treba nie zabyvacca i pra biełaruski narod, jaki, u adroźnieńnie ad rasijskaha, «nie atručany ducham impieryjalizmu i družalubna stavicca da Polščy i palakaŭ».
Sa słoŭ polskaha prezidenta, biełarusaŭ «teraryzuje samadzieržac», jaki nie maje padtrymki hramadzian i pryjšoŭ da ŭłady ŭ vyniku falsifikacyj na vybarach.
«Tamu my pavinny prajavić salidarnaść ź biełaruskim narodam! Nielha zabyvacca pra bolš čym tysiaču palitviaźniaŭ u Biełarusi, a taksama pra represii suprać palakaŭ, jakija žyvuć u hetaj krainie. Žorstkim simvałam hetych represij stała niezakonnaje asudžeńnie Andreja Pačobuta, tamu my budziem zmahacca na mižnarodnych forumach za vyzvaleńnie ŭsich palitviaźniaŭ i vystupajem za ŭzmacnieńnie abmiežavalnych mier, uviedzienych u dačynieńni da Biełarusi», — dadaŭ prezident Polščy.
Jon vykazaŭ zadavolenaść tym, što jaho kraina aktyŭna padtrymlivaje hramadzianskuju supolnaść u Biełarusi i sadziejničaje stvareńniu ŭmoŭ dla raźvićcia demakratyi i palityčnaha dyjałohu.
«U našych intaresach prasoŭvać i ŭmacoŭvać biełaruskuju dyjasparu i jaje niezaležnyja palityčnyja koły i ŭ inšych krainach. My pavinny padtrymlivać ich, bo heta naš susiedski, hramadzianski abaviazak jak krainy «Salidarnaści», jak krainy, čyjo hramadstva kaliści biez adzinaha strełu zdoleła pieramahčy kamunizm, spryjajučy i kančatkovamu razvału Savieckaha Sajuza», — skazaŭ Duda.
Ciapier čytajuć
U minskim handlovym centry Palazzo sabrałasia daŭžeznaja čarha. Pa darmovych miadźviedzikaŭ!5
Kamientary
ja pro trubu. da no nie tu)