Čamu ŭ Biełarusi adklučajuć haračuju vadu letam, a ŭ Polščy — nie
Letni siezon asacyjujecca ŭ biełarusaŭ nie tolki z vakacyjami i adpačynkam, ale i sa štohadovym płanavym adklučeńniem haračaj vady. Dla mnohich rełakantaŭ u krainy ES stanovicca šokam, što tam niama «dvuch tydniaŭ z tazikam». Čamu ž u Biełarusi adklučajuć haračuju vadu, a ŭ toj ža Polščy — nie, tłumačyć «Jeŭraradyjo».
U Biełarusi karystajucca sistemaj centralizavanaha ciepłazabieśpiačeńnia, jakaja była pabudavanaja jašče ŭ Savieckim Sajuzie. Na žal, jaje raspracavali biez uliku ŭmoŭ ekspłuatacyi, tamu terminy stareńnia vyjavilisia značna karaciejšymi. Na siońnia ciepłatrasy, prakładzienyja dziesiacihodździ tamu, majuć patrebu jak minimum u rehularnaj praviercy. A pravodzić jaje biez adklučeńnia vady niemahčyma.
U bolšaści krain śvietu płanavych adklučeńniaŭ haračaj vady niama akurat taki praz adsutnaść sistem centralizavanaha haračaha vodazabieśpiačeńnia. Zvyčajna ŭ damy centralizavana padajecca tolki chałodnaja vada, jakaja na miescy padahravajecca bojlerami. Łakalnyja vodanahravalniki i katły stajać abo ŭ kvaterach, abo ŭ padvałach šmatpaviarchovych damoŭ.
Čamu ž u Biełarusi nie zamieniać najaŭnuju sistemu?
Palityk i błohier Alaksandr Knyrovič bolš za 20 hadoŭ kiravaŭ u Biełarusi hrupaj budaŭničych kampanij «Sarmat» i dakładna znajecca na trubach.
«Kali stavić za metu pieraŭładkavać sistemu z centralizavanaj na raźmierkavanuju, to heta abydziecca ŭ niekalki sotniaŭ miljonaŭ dalaraŭ dakładna, a mahčyma, što i ŭ miljard. Tamu što treba ŭsie hetyja mahutnyja centrali razburyć i na ich miescy ŭ kožnym rajonie ci kvartale pastavić takija maleńkija asobnyja ciepłacentrali.
Pry ciapierašniaj uładzie heta całkam niemažliva. Kali niešta źmienicca i ŭ Biełarusi budzie demakratyja, to z dapamohaj jeŭrapiejskich fondaŭ heta stanie mahčyma. Raźmierkavanaja sistema, viadoma, bolš ustojlivaja. A centralizavanaja — heta ŭsio spadčyna Savieckaha Sajuza», — kaža jon
Pra toje, što ŭ ahladnaj budučyni niavarta čakać zamieny ciapierašniaj sistemy, pahadžajucca i ŭłady ŭ kamientarach dziaržaŭnych miedyja. I hetak ža tłumačać pryčynu: doraha.
Byŭ miesiac, stała dva tydni
Ciapier haračuju vadu adklučajuć na dva tydni. Dziaržaŭnyja miedyja padnosiać heta jak dasiahnieńnie, maŭlaŭ, prahres u paraŭnańni z tym, što było da 2006 hoda, kali biez haračaj vady žyli ceły miesiac!
Pa słovach Knyroviča, termin prafiłaktyki možna skaracić jašče:
«U čym zaklučajecca hety praces: na asobnyja kavałki hetaj truby padajecca cisk i hladzicca, dzie jana parvałasia, dzie jość niejkija prablemy. Na hety praces patrebny tydzień — nie bolej. Ale jość i techničnyja abmiežavańni: mienš za tydzień heta nie moža być, ale da tydnia hety praces mahli b skaracić. Heta ŭsio u rukach Biełenierha i sistemy ŽKH. Kali b jany atrymali zahad źvierchu, to jany b heta zrabili. Prablema ŭ ludziach — u toj sistemie, jakuju jany pabudavali».
U Jeŭropie pakul najhoršaja situacyja z adklučeńniem haračaj vady ŭ Małdovie: tam jana moža nie padavacca terminam ad adnaho da dvuch miesiacaŭ. U Łatvii i Čechii adklučeńnie moža praciahvacca ad niekalkich hadzin da tydnia, u Estonii — ad adnaho da dvuch dzion.
Ciapier čytajuć
«Biełaruś pieradusim». Što viadoma pra 23‑hadovaha aficera śpiecnaza, jakoha asudzili na 19 hadoŭ za «zdradu dziaržavie»18
Kamientary
A značyť taryfy buduť takija što uvohule hieračaj nie budiem myccca.. bo nichto zp nie pavysiť javna