Alejnik lacić da prezidenta, jaki kiruje krainaj užo 44 hady

U ramkach zapłanavanych mierapryjemstvaŭ čakajucca pieramovy z prezidentam Teadora Abijanham Nhiema Mbasoha, ministram zamiežnych spraŭ, mižnarodnaha supracoŭnictva i dyjaspary Simiaonam Ajona Esona Anhue, pradstaŭnikami šerahu ministerstvaŭ i dziełavych kołaŭ.

«U chodzie vizitu buduć abmierkavany praktyčnyja kroki pa aktyvizacyi dvuchbakovych suviaziej, raźvićci handlova-ekanamičnaha supracoŭnictva i palapšeńni kaardynacyi ŭzajemadziejańnia pamiž Ministerstvami zamiežnych spraŭ dźviuch krain. Płanujecca padpisańnie šerahu dakumientaŭ», — paviedamlaje MZS.

U Ekvataryjalnaj Hviniei jość bahatyja naftavyja radoviščy, jakija razam z zamiežnymi inviestycyjami dapamahli zrabić krainu adnoj z samych bahatych i stabilnych dziaržaŭ Afryki. Pačynajučy z 1990-ch hadoŭ heta kraina stała bujnym eksparcioram nafty, za košt čaho VUP na dušu nasielnictva padniaŭsia na pieršuju pazicyju ŭ kantynientalnaj Afrycy. Pa indeksie čałaviečaha raźvićcia Ekvataryjalnaja Hvinieja znachodzicca na 145-m miescy ŭ śviecie.

Pavialičyć

Teadora Abijanhu Nhiema Mbasoha 5 červienia spoŭnicca 81 hod. Jon byŭ kadravym vajskoŭcam, kamandujučym Nacyjanalnaj hvardyjaj. U žniŭni 1979 hoda ažyćciaviŭ vajskovy pieravarot z dapamohaj 400 najmitaŭ z Maroka, i zrynuŭ pažyćciovaha prezidenta krainy, svajho rodnaha dziadźku — Fransiska Masijasa Nhiema. Potym dziadźku prysudzili śmiarotnaje pakarańnie i ŭ toj ža dzień rasstralali.

Teadora Abijanh Nhiema Mbasoha kiruje krainaj amal 44 hady. Sa studzienia 1986 hoda adnačasova zajmaje taksama pasadu ministra abarony krainy. Na vybarach 1996 hoda jon byŭ adzinym kandydatam i za jaho prahałasavali 97,85% čałaviek. Na nastupnych prezidenckich vybarach, jakija prajšli ŭ 2002 hodzie, jon byŭ znoŭ pieraabrany 97,1% hałasoŭ.

U 2003 hodzie dziaržaŭnaje radyjo abviaściła, što Teadora Abijanh Nhiema «padobny da Boha na niabiosach» i znachodzicca «ŭ pastajannym kantakcie z Usiomahutnym», pryčym prezident vałodaje «ŭsioj uładaj nad ludźmi i rečami».

Teadora Abijanh Nhiema Mbasoha časta pryznačaŭ na vyšejšyja dziaržaŭnyja pasady svaich svajakoŭ. Teadora Nhiema Abijanh Manhu, syn prezidenta ad pieršaha šlubu, u rozny čas pracavaŭ ministram lesu, rybnaj haspadarki i navakolnaha asiarodździa (2001—2003), ministram infrastruktury i lesu (2003—2004), a z 2004 hoda ŭznačalvaje Ministerstva sielskaj haspadarki i lesu. Habryel Mbieha Abijanh Lima, syn prezidenta ad druhoha šlubu, byŭ dziaržaŭnym sakratarom pa zdabyŭnoj pramysłovaści i vuhlevadarodach (2001—2004), zatym byŭ pryznačany namieśnikam ministra hornazdabyŭnoj pramysłovaści i enierhietyki. Antonia Mba Nhiema, małodšy brat prezidenta, pracavaŭ hienieralnym dyrektaram palicyi. I takich svajakoŭ jašče ź dziasiatak.

• 1
• 0
• 7
• 3
• 0
• 1
• 7
• 0