Minabarony zajmajecca dobraŭparadkavańniem startavych placovak pad rakietnyja stratehičnyja kompleksy «Topal» paśla zimniaha siezonu. Siužet pra heta apublikavała pres-słužba viedamstva.
«My znachodzimsia na adnoj ź placovak u rajonie bajavoj startavaj pazicyi, dzie kaliści raźmiaščaŭsia rakietny połk vojskaŭ stratehičnaha pryznačeńnia. Ciapier tut pravodziacca raboty pa dobraŭparadkavańni terytoryi paśla zimovaha pieryjadu, a taksama inšyja mierapryjemstvy, nakiravanyja na padtrymańnie dziejnaj infrastruktury ŭ naležnym stanie.
Što da mahčymaści vykarystańnia abjektaŭ stratehičnaha pryznačeńnia, jakija zachavalisia ŭ spadčynu z časoŭ Savieckaha Sajuza, možna z upeŭnienaściu skazać, što pry nieabchodnaści jany apieratyŭna mohuć być padrychtavanyja da prymianieńnia. Na hety momant naša zadača składajecca ŭ tym, kab zabiaśpiečyć u pieršuju čarhu zachavanaść i padtrymańnie ŭ hatoŭnaści da vykarystańnia infrastruktury, jakaja zastałasia ŭ spadčynu ad rakietnych vojskaŭ stratehičnaha pryznačeńnia, što znachodziłasia tut», — havoryć u siužecie mužčyna ŭ vajennaj formie i ŭ bałakłavie.
U roliku pakazanaja pamiatnaja tablička, jakaja ŭkazvaje na 56-y rakietny połk i 1692-ju ramontna-techničnuju bazu Rakietnych vojskaŭ stratehičnaha pryznačeńnia.
56-y połk byŭ sfarmavany ŭ 1961 hodzie, nahadvaje reform.by. Jon dysłakavaŭsia ŭ rajonie nasielenych punktaŭ Šarašova i Jasień pad Pružanami. Pieršapačatkova ŭ pałku pavinny byli być dva naziemnyja i adzin šachtavy dyvizijony. Adnak šachtavyja abjekty nie byli pabudavanyja i ŭ štacie pałka ŭ vyniku zastalisia dva naziemnyja dyvizijony.
Paźniej połk byŭ pieradysłakavany ŭ Zimavičy. Padraździaleńnie niesła bajavoje dziažurstva spačatku z rakietami R-12, paśla źniaćcia ich z uzbrajeńnia ŭ siaredzinie vaśmidziasiatych było pieraviedzienaje na rakietnyja kompleksy RSD-10 Pijanier-K (SS-20).
Kompleksy «Topal» zjavilisia ŭ im na pačatku dzievianostych. Połk byŭ źniaty z bajavoha dziažurstva ŭ 1993 hodzie, vyviedzieny ŭ Rasiju i rasfarmiravany ŭ 1994-m.
Vystupajučy ŭ kancy sakavika Alaksandr Łukašenka zajaviŭ, što addaŭ rasparadžeńnie pryvieści ŭ paradak startavyja placoŭki dla kompleksaŭ «Topal». Pavodle jaho, u Biełarusi moža być raźmieščanaja stratehičnaja jadziernaja zbroja. Pakul razmova idzie pra toje, što ŭ Biełaruś pryviazuć taktyčnuju jadziernuju zbroju.
U archivach SBU znajšlisia dakumienty, jak savieckija śpiecsłužby zavierbavali emisara AUN, ale ŭkrainskaje padpolle heta vykryła i zabiła zdradnika88
Kamientary