La Filipinaŭ znajšli zatoplenaje ŭ 1942 hodzie japonskaje sudna ź ciełami pałonnych
Daśledčyki znajšli ŭ Paŭdniova-Kitajskim mory japonskaje sudna ź ciełami 1060 vajennapałonnych, patoplenaje padvodnaj łodkaj ZŠA ŭ 1942 hodzie padčas Druhoj suśvietnaj vajny. Pra heta paviedamlaje ABC.
Abłomki karabla Montevideo Maru znajšli la paŭnočna-zachodniaha ŭźbiarežža filipinskaj vyspy Łuson na hłybini bolš za 4 tysiačy mietraŭ. Paśla 12 dzion pošukaŭ ich vyjaviła kamanda supracoŭnikaŭ niekamiercyjnaha fondu Silentworld i śpiecyjalistaŭ pa hłybakavodnych daśledavańniach Fugro pry padtrymcy Ministerstva abarony Aŭstralii.
Sudna ŭ 1942 hodzie patapili amierykanskija vajskoŭcy na padvodnaj łodcy, jakija nie viedali, što na japonskim karabli znachodziacca vajennapałonnyja. Ahułam na sudnie zahinuli 1060 čałaviek — 850 vajskoŭcaŭ i 201 mirny žychar z 14 krain, bolšaja častka ź ich (979 čałaviek) była z Aŭstralii.
Abłomki i cieły zahinułych nie buduć dastavać z dna. Miesca, jakoje na bolšaj hłybini, čym kropka raźmiaščeńnia patanułaha «Tytanika», adznačać na karcie ŭ daśledčych metach. Dyrektar Silentworld Džon Malens zajaviŭ, što ŭ kamandy byli źmiešanyja emocyi, kali sudna znajšłosia. «My hladzieli na mahiłu bolš za 1000 čałaviek. Na borcie ŭ nas byli dva čałavieki, jakija stracili členaŭ siamji, tam, u toj čas jak z adnaho boku byli apładysmienty, z druhoha byli ślozy», — skazaŭ jon.
Naprykład, na borcie pošukavaha sudna znachodziłasia Andrea Uiljams, dziadula i stryječny dziadźka jakoj zahinuli na Montevideo Maru. «Siońnia nadzvyčaj znamianalnaja padzieja dla ŭsich aŭstralijcaŭ, źviazanych z hetaj trahičnaj katastrofaj», — adznačyła jana.
Aŭstralijski ŭrad spadziajecca, što adkryćcio pryniasie «niekatoraje suciašeńnie» blizkim zahinułych pasažyraŭ karabla, napisaŭ premjer-ministr Entani Albanieze ŭ svaim tvitary. «Nadzvyčajnyja namahańni, prykładzienyja dla hetaha adkryćcia, kažuć pra toje, što Aŭstralija trymaje svajo abiacańnie zaŭsiody pamiatać i šanavać tych, chto słužyŭ našaj krainie», — padkreśliŭ jon.
Ciapier čytajuć
«Pra ciažarnaść viedali tolki jana i jaje chłopiec». Stali viadomyja padrabiaznaści historyi ź miortvym niemaŭlom, znojdzienym u Baranavičach u pakiecie
Kamientary