Ź siencami i sapraŭdnaj piečču ź lažankaj. Voś jak by siońnia vyhladaŭ modny taŭnchaŭs, kali b u im byli pamiaškańni i zony jak u biełaruskaj chacie
A vy možacie sabie ŭjavić sučasny interjer open space, u jakim jość funkcyjanalnyja zony i pamiaškańni jak u tradycyjnaj Biełaruskaj chatcy? Akazvajecca, siency, haryšča, zapiečak, čyrvony kut całkam mahli b upisacca ŭ žyllo XXI stahodździa, piša CityDog.io.
Nie tak daŭno ŭ svaim instahram-akaŭncie prajekt «Biełaruski kod» apublikavaŭ post, u jakim pradstaviŭ, jak by vyhladaŭ padobny taunchaus. A CityDog.io daviedaŭsia ŭ kamandy, navošta jany prydumali taki prajekt i chto moh by žyć u hetaj kvatery.
Što takoje «Biełaruski kod» i čym jon zajmajecca
Kamanda By_kod — heta hrupa tvorčych ludziej, jakija razam pracujuć u halinie ekśpierymientaŭ z tradycyjnaj kulturaj i sučasnymi tendencyjami. Hetyja ludzi pastajanna znachodziacca ŭ pošuku svajoj identyčnaści i imknucca achapić roznyja haliny ŭ svaich daśledavańniach. Adnym ź ich staŭ dyzajn interjeru.
Va ŭdzielnikaŭ By_kod rozny vopyt i prafiesijnyja viedy: chtości daŭno šukaŭ, jak uvasobić funkcyjanalnaść biełaruskich chat u sučasnych realijach, chtości maryŭ vynajści aryhinalny styl — alternatyvu suśvietnym interjernym tendencyjam, chtości chacieŭ padaryć novaje žyćcio i funkcyjanalnaść babulinym rečam. Novaja ideja abjadnała ŭsie hetyja pamknieńni.
«Abmierkavańnie prajekta pačałosia jašče letaś. Užo tady my zaŭvažyli, što adnazrubavaja biełaruskaja chata — heta faktyčna tradycyjny anałah aktualnaj na siońnia kvatery-studyi ź jaje pryncypami funkcyjanalnaha zaniravańnia i adkrytaj płaniroŭki», — kažuć pradstaŭniki By_kod.
A ciapier samaje cikavaje: jakija zony jość u kvatery, prydumanaj By_kod?
«My sychodzili z samaj bazavaj kamplektacyi chaty: adzin zrub + siency. Sama chata raźbivajecca dyjahanallu «pieč — pokuć».
Za piečču mieścicca spalnaja zona, nasuprać piečy — hetak zvany «babin kut». U siencach («kalidorčyku», jak kazała babula adnaho z aŭtaraŭ) my źmiaścili harderob vierchniaha adzieńnia i sanvuzieł. U vanny pakoj my taksama intehravali kabinu-saŭnu jak zamiaščalnik tradycyjnaj łaźni. Tut ža pobač i kuchonnaja zona, što metazhodna z punktu hledžańnia prakładańnia kamunikacyj. Kuchnia zajmaje miesca babinaha kuta.
Babin kut, naohuł, heta miesca nie tolki dla hatavańnia ježy, ale taksama i dla chatnich prac, kali ŭzimku la komina z łučynaj źbiralisia žančyny i tkali, prali, śpiavali. My ž źmiaścili hety komin nad barnaj stojkaj, dzie, moža, i nie źmieścišsia z krosnami, ale z kubačkam kavy i noŭtbukam — prosta.
Viadoma, što ad śviečki ci łučyny ŭ hetym kominie budzie śviatła mienš za sučasnuju lampu, ale ž možna zapalvać aramaśviečki prosta dla zadavalnieńnia dy kamfortu.
Nasuprać kuchni — pieč. Badaj što pieč była našaj samaj ćviordaj nastrojkaj: my možam śmieła abychodzicca ź inšymi zonami, ale pieč budzie — i budzie ź lažankaj! My zusim trochi asučaśnili formu, ale faktyčna zachavali jaje takoj, jakoj jana maje być tradycyjna.
Za piečču — nievialiki zakutočak z harderobam i lustram, za imi — adasoblenaja spalnaja zona.
Dla našaha pakaleńnia kłasičnaj kvaternaj płaniroŭki takaja stupień adkrytaści padajecca zanadta śmiełaj, ale jana prymalnaja ŭ miežach fiłasofii adkrytaj prastory. Na dobry ład, hetu zonu varta było b pryčynić šyrmaj ci firankaj, ale jany škodzili nahladnaści prezientacyi, i my admovilisia ad ich.
I badaj što najciažejšaj spravaj było dla nas vyjavić čyrvony kut. My śviadoma admovilisia ad zališniaha dekoru, bo ŭ siońniašnim indyvidualizavanym śviecie, na našu dumku, pokuć źjaŭlajecca duža intymnym miescam i adlustroŭvaje toje, što doraha kankretnamu haspadaru. Ale ž u jakaści kancepcyi my prapanavali litaralna čyrvonuju zonu, kab vyłučyć jaje ź inšaha interjeru».
U jakaści «bazavaha» napaŭnieńnia ŭdzielniki By_kod prapanujuć źmiaścić tudy fatahrafii rodnych jak toje darahoje, što jość u žyćci amal kožnaha čałavieka. Ale taksama ničoha nie pieraškadžaje uładkavać tam i palicu ź lubimymi knihami, pastavić lubimy muzyčny instrumient abo paŭtaryć tradycyjny «čyrvony kut» z abrazami ci inšymi śviatyniami — heta vyklučna indyvidualnaja zona.
«Jašče adnoj prablemaj stała pytańnie taho, što źmiaścić la čyrvonaha kuta. Łahična tudy było b pastavić stoł, ale, pa-pieršaje, u XXI stahodździ ludzi majuć proćmu sposabaŭ bavić volny čas doma aproč zastolla, a pa-druhoje — na pytańnie «nu što musić być abaviazkova ŭ čyrvonym kucie, aproč rušnikoŭ-fotak-abrazoŭ» časta hučaŭ adzin i toj ža adkaz: televizar.
Nu sapraŭdy ž, u tradycyjnych interjerach siońnia jon zajmaje pačesnaje miesca pad ikonami. My vyrašyli i tut davierycca tradycyi i raźmiaścili sacyjalnuju zonu ź miakkaj kanapaj. Stoł ža my paličyli ŭ hetaj zonie situacyjnym, i tamu jon moža być, naprykład, składnym».
Taksama ŭdzielniki By_kod praduhledzieli ŭ hetaj žyłoj prastory sklep i haryšča, ale nie raskryvali temu tak padrabiazna. Sklep całkam zachoŭvaje svaje tradycyjnyja funkcyi schovanki dla zakatak i bulby, a haryšča, na dumku kamandy, možna vykarystoŭvać bolš racyjanalna, čym pieratvarać jaho ŭ skład dla staroj chaty. Naprykład, zładzić tam dziciačy pakoj, spartyŭnuju zału ci paŭnavartasny kabiniet.
A jakija tradycyjnyja elemienty jość u kožnaj zonie?
Tut dumki i idei ŭ ich razyšlisia. Z adnaho boku, było žadańnie całkam adchilicca ad źniešniaj «biełaruščyny» i pahladzieć, jak budzie pracavać sama ideja biez dadatkovych markieraŭ miascovaści ŭ vyhladzie dekoru. Ź inšaha boku, było žadańnie, naadvarot, pakazać, jak aŭtentyčnyja rečy mohuć upisacca ŭ sučasny interjer.
«Kab nie zhubić akcent na płaniroŭcy i trymacca sučasnaha minimalizmu, my pakinuli dekaratyŭny minimum: naprykład, na voknach možna zaŭvažyć roł-firanki ŭ vyhladzie vycinanak, kala łožka — skrynia. Žyrandola ŭ vyhladzie tradycyjnaha sałamianaha pavuka aśviatlaje prastoru. Ideja pałavičkoŭ-darožak i pościłak z tradycyjnym malunkam aktualnaja jak nikoli. Stalešnica paŭtaraje ŭzory viaskovych skacierak.
Pra kancepcyju: «Kamanda maje padniaproŭska-paleskija karani, što možna prasačyć u dyzajnie praz masiŭnuju kamiennuju pieč ź lažankaj»
Jak adznačajuć udzielniki By_kod, pošuki sučasnaj biełaruskaj architektury abo interjernaha stylu pačalisia nie ŭčora. U internecie lohka možna znajści prykłady biełarusizacyi interjeru za košt elemientaŭ dekoru abo vykarystańnia aŭtentyčnych materyjałaŭ.
Ale admietnaj rysaj hetaha imiannoha prajekta źjaŭlajecca toje, što kamanda, chutčej, zychodziła nie z analizu vizualnaha i kanstruktyŭnaha składnikaŭ elemientaŭ tradycyjnaha interjeru, a pierš za ŭsio z funkcyjanału, tamu stroha prytrymlivałasia tradycyjnaj płaniroŭki.
«My ščyra ličym, što patencyjał biełaruskaj kultury ŭ sučasnym śviecie i na drabinku jašče nie raskryty. Archaičnaja vonkava, jana maje hnutki stryžań u svajoj asnovie i praz svaju hnutkaść moža adaptavacca i interpretavacca tak, jak hetaha patrabuje čas. I my stavim za metu pakazać heta praz mastactva i dyzajn.
Varta taksama adznačyć, što naša kamanda maje padniaproŭska-paleskija karani, što možna prasačyć u dyzajnie, naprykład praz masiŭnuju kamiennuju pieč ź lažankaj. Ci dekor padušačak».
Kvatera, interjer jakoj raspracavała kamanda By_kod, realnaja?
Nie, pakul heta tolki kancepcyja. Ale jość mary realizavać niešta padobnaje dla siabie, pryznajucca pradstaŭniki prajekta. Pry hetym płan znachodzicca ŭ adkrytym dostupie, i jany spadziajucca, što jon moža spatrebicca nie tolki im.
Chto moh by žyć u takoj kvatery?
Udzielniki By_kod jašče raz adznačajuć, što hety prajekt — ekśpierymient. U realnym prajektavańni ŭličvajecca mnostva samych roznych faktaraŭ, pačynajučy ad składu siamji i zakančvajučy fizičnymi paramietrami kožnaha z žycharoŭ. Kamanda ž chacieła pakazać prosta kancepcyju taho, što možna padychodzić da prajektavańnia sučasnych interjeraŭ i takim voś čynam.
Kankretna hety žyły błok taunchausa By_kod prapanavaŭ by siamji bieź dziaciej (abo z adnym-dvuma, dla jakich možna było b unieści minimalnyja źmieny ŭ vyhladzie dadatkovaj šyrmy dla spalnaj zony baćkoŭ i ŭładkavańnia druhoha paviercha pad dziciačuju prastoru). Ci, naadvarot, dla par, jakija ŭžo vyhadavali svaich dziaciej i ciapier vybirajuć niejki aptymalny kampramis pamiž sučasnym haradskim žyllom i tradycyjnaj vioskaj.
Čytajcie taksama:
10 biełaruskich brendaŭ sa stylnymi śvitšotami, za jakija nie treba addavać miljony
Ciapier čytajuć
Na vajnie va Ukrainie zahinuŭ były dyrektar dvuch aršanskich zavodaŭ4
Kamientary
zbaŭ baže ad niedadyzajnieraŭ
što etyja dizajniery kuryli?