Prakuratura Hrodzienskaj vobłaści pradjaviła abvinavačańnie dvum žycharam Hrodna, jakija byli zatrymany 14 kastryčnika pa padazreńni va ŭčynieńni trajnoha zabojstva.
Pra heta paviedamiŭ staršy pamočnik abłasnoha prakurora Viačasłaŭ Ihnacik.
Žycharam Hrodna inkryminujecca ŭčynieńnie złačynstvaŭ, praduhledžanych pp. 1, 6, 12, 15 č. 2 art. 139 Kryminalnaha kodeksa (zabojstva dvuch i bolš asob, učynienaje z asablivaj žorstkaściu z karyślivych mierkavańniaŭ hrupaj asob) i č. 3 art. 207 KK (razboj). Sankcyjanavana ŭziaćcie abvinavačvanych pad vartu.
Nahadajem, trajnoje zabojstva i vykradańnie dziciaci było ŭčyniena ŭ noč z 13 na 14 kastryčnika.
Znajšli trupy z nažavymi ranieńniami i vyklikali milicyju pažarnyja, jakija prybyli na ŭzharańnie ŭ druhim korpusie doma № 8 pa vulicy Kabiaka.
Zahinułyja — 65‑hadovy haspadar kvatery, jaho 34‑hadovaja niaviestka i jaje 52‑hadovaja znajomaja. Prapaŭ syn maładoj žančyny — piacikłaśnik. Z pamiaškańnia byŭ vykradzieny kampjuter. Kab schavać ślady złačynstva, złamyśniki padpalili kvateru.
Praź niekalki hadzin supracoŭnikami Kastryčnickaha RAUS Hrodna niedaloka ad miesca złačynstva byli zatrymany padazronyja — 29‑hadovy i 28‑hadovy žychary abłasnoha centra, adzin ź ich — uradženiec Rasii. Abodva byli raniej sudzimyja za razboi, machlarstva, chulihanstva, uchileńnie ad adbyvańnia pakarańnia ŭ vyhladzie abmiežavańnia voli, kradziež. Jany adbyvali pakarańnie ŭ papraŭčaj kałonii № 10 u Navapołacku (Viciebskaja vobłaść).
Abvinavačańnie pa fakcie vykradańnia dziciaci hrodziencam jašče nie pradjaŭlena. Pavodle słoŭ Viačasłava Ihnacika, matyvy hetaha złačynstva pakul vyśviatlajucca — pakazańni zatrymanych i chłopčyka razychodziacca.
Jak paviedamlałasia raniej, padčas zatrymańnia abvinavačvanych dzicia było ź imi. Ciapier chłopčyk znachodzicca z baćkam, jaki viarnuŭsia z zarobkaŭ z Rasii.
Śledstvam ustanoŭlena, što zabojstva adbyłasia ŭ vyniku svarki. Adzin z abvinavačvanych byŭ znajomy ź niaviestkaj haspadara kvatery.
U prakuratury Hrodzienskaj vobłaści ličać, što rasśledavańnie budzie zavieršana na praciahu troch miesiacaŭ — praciahłaha času zapatrabuje stacyjanarnaja psichijatryčnaja ekśpiertyza abvinavačvanych. Mahčyma, jana budzie pravodzicca ŭ Minsku ŭ respublikanskaj kliničnaj psichijatryčnaj balnicy «Navinki».
Ciapier čytajuć
Z YouTube vydalili kanały BiełTA, STB i ANT. Ułady pahražajuć kontrmierami28
Kamientary