Viarnułasia ŭ Biełaruś, pavieryŭšy abiacańniam siłavikoŭ — ciapier jaje buduć sudzić pa 12 kryminalnych artykułach

Jaje spravu pačnuć razhladać u Homielskim abłasnym sudzie 28 śniežnia — u zakrytym režymie.

Spravu budzie razhladać sudździa Mikałaj Dola.

U čym abvinavačvajuć Kurylinu?

Taćcianu Kurylinu abvinavačvajuć pa cełym šerahu kryminalnych artykułaŭ. Žančynie moža pahražać da 15 hadoŭ źniavoleńnia:

• č. 3 art. 361 — zakliki da mier abmiežavalnaha charaktaru (sankcyj), nakiravanych na pryčynieńnie škody nacyjanalnaj biaśpiecy Respubliki Biełaruś;
• art. 369 — abraza pradstaŭnika ŭłady;
• č. 1 art. 342 — arhanizacyja i padrychtoŭka dziejańniaŭ, jakija hruba parušajuć hramadski paradak, albo aktyŭny ŭdzieł u ich;
• č. 1 art. 203-1 — niezakonnyja dziejańni ŭ dačynieńni da infarmacyi ab pryvatnym žyćci i piersanalnych danych;
• č. 1 art. 130 — raspalvańnie inšaj sacyjalnaj varožaści;
• č. 3 art. 203-1 — niezakonnyja dziejańni ŭ dačynieńni da infarmacyi ab pryvatnym žyćci i piersanalnych danych;
• art. 188 — paklop;
• č. 1 art. 367 — paklop u dačynieńni da Łukašenki;
• č. 2 art. 203-1 — niezakonnyja dziejańni ŭ dačynieńni da infarmacyi ab pryvatnym žyćci i piersanalnych danych;
• č. 1 art. 368 — abraza Łukašenki;
• č. 2 art. 367 — paklop u dačynieńni da Łukašenki, ździejśnieny paŭtorna;
• č. 2 art. 366 — hvałt albo pahroza ŭ dačynieńni da słužbovaj asoby, jakaja vykonvaje słužbovyja abaviazki, ci inšaj asoby, jakaja vykonvaje hramadski abaviazak.

Što paviedamlaje pra spravu prakuratura?

Pa materyjałach śledstva, Taćciana Kurylina z 20 žniŭnia 2020 hoda pa 20 lutaha 2022 hoda praz Telegram-resursy zaklikała ŭdzielnikaŭ čataŭ da hvałtoŭnych dziejańniaŭ u dačynieńni da pradstaŭnikoŭ ułady i siłavych struktur.

Jana ž biez zhody paciarpiełych, jakimi pryznanyja ŭ tym liku prakurorskija rabotniki i sudździ, niepravamierna źbirała, sistematyzavała i raspaŭsiudžvała źviestki ab ich pryvatnym žyćci, čym pryčyniła istotnuju škodu ich pravam i zakonnym intaresam. U takich paviedamleńniach źmiaščałasia zahadzia łžyvaja infarmacyja.

«Pačynajučy z 20 vieraśnia 2020 hoda, Kurylina na praciahu paŭtara hoda raźmiaščała ŭ Telegram-kanałach publikacyi, u jakich zaklikała da ŭdziełu ŭ niesankcyjanavanych masavych mierapryjemstvach na terytoryi Biełarusi, akazańnia aktyŭnaha supracivu supracoŭnikam pravaachoŭnych orhanaŭ, pierakryćcia daroh, paškodžańnia majomaści arhanizacyj i pradpryjemstvaŭ, uchileńnia ad vypłaty padatkaŭ», — paviedamlaje prakuratura.

U tekstavych paviedamleńniach abvinavačanaj u Telegram-čatach taksama ŭtrymlivalisia abrazy z vykarystańniem nienarmatyŭnaj leksiki, pahrozy hvałtam u dačynieńni da Alaksandra Łukašenki, paklop, spałučany ź jaho abvinavačvańniem u ciažkich i asabliva ciažkich złačynstvach.

Taćcianu Kurylinu «raźviali» biełaruskija śpiecsłužby, paciarpieŭ «Rabočy ruch»

Jak paviedamlałasia ŭ ŚMI, Taćciana Kurylina doŭhi čas znachodziłasia za miažoj. U studzieni 2022 hoda biełaruskija siłaviki ŭzłamali šerah čataŭ «97%». A ŭ lutym Kurylina «ŭspłyła» na biełaruskim telebačańni ŭ prahramie prapahandystki Ksienii Lebiedzievaj. Akazałasia, što Kurylina ŭžo znachodzicca ŭ Biełarusi. 

Na telebačańni, stomlenaja, jana kazała, što čaty nie majuć sensu, ale kantralujucca polskimi śpiecsłužbami, zajaŭlała pra ščylnyja kantakty z «Bajpołam», raskazvała pra niuansy svajoj pracy.

Pa infarmacyi «Bajpoła», Taćcianu Kurylinu «raźviali» biełaruskija śpiecsłužby. «Hetuju žančynu spakusiŭ małady čałaviek i paprasiŭ viarnucca da jaho ŭ Biełaruś, abiacaŭ vyrašyć usie pytańni. Jana viarnułasia, ale heta akazałasia śpiecapieracyjaj KDB. I žančyna stała «ŭsich źlivać», — kaža pradstaŭnik «Bajpoła». 

• 4
• 0
• 17
• 76
• 5
• 24
• 96
• 0