Bośnija i Hiercahavina aficyjna atrymała status kandydata na ŭstupleńnie ŭ Jeŭrasajuz

Bośnija i Hiercahavina padała zajaŭku na siabroŭstva ŭ JEZ jašče ŭ lutym 2016 hoda. Z 2003 hoda jana mieła status «patencyjnaha kandydata» na ŭstupleńnie ŭ Jeŭrapiejski Sajuz.

U śniežni 2022 hoda Rada ES rekamiendavała dać Bośnii i Hiercahavinie status kandydata ŭ ES, ale z peŭnymi ŭmovami. Kraina pavinna raspačać kroki, nazvanyja ŭ rekamiendacyi Jeŭrapiejskaj kamisii ad kastryčnika 2022 hoda, pa ŭmacavańni viaršenstva prava, baraćby z karupcyjaj i arhanizavanaj złačynnaściu, kiravańnia mihracyjaj i asnoŭnych pravoŭ.

Bośnija i Hiercahavina — vielmi śpiecyfična ŭładkavanaja dziaržava nie tolki pa jeŭrapiejskich, ale i pa suśvietnych mierkach. Paśla kryvavaj hramadzianskaj vajny ŭ 1990-ch jana pavodle ŭmoŭ Dejtanskaha pahadnieńnia padzielenaja na dva entytety — Respubliku Sierbskuju, dzie daminujuć sierby, i musulmanska-charvackuju Fiederacyju Bośnii i Hiercahaviny. Hetyja dźvie častki časta kanfliktujuć pa roznych pytańniach — ad kolkaści Uzbrojenych sił da biudžetu i ziamielnaj reformy. I ŭvohule ŭ toj ža Respublicy Sierbskaj svaje paradki, jana moža adkryta kanfliktavać z centralnymi ŭładami ŭ Sarajevie i nie chavaje svaich simpatyj da Sierbii, za abjadnańnie ź jakoj u 1990-ja viałasia taja vajna.

Navat adzinaha kiraŭnika dziaržavy ŭ Bośnii i Hiercahavinie niama, joj kiruje Prezidyum, jaki składajecca z troch pradstaŭnikoŭ ad baśnijcaŭ-musulman, sierbaŭ i charvataŭ. Rašeńni jon prymaje kalehijalna, a staršynstvuje ŭ Prezidyumie kožny ź jaho členaŭ pa čarzie.

Staŭleńnie da jeŭrapiejskaj pierśpiektyvy Bośnii i Hiercahaviny ŭ Jeŭrasajuzie było zaŭsiody składanaje i nieadnaznačnaje. Z adnaho boku, hetaja kraina vielmi prablemnaja i jaje ŭnutranaja niestabilnaść, kali jaje nie ŭdasca ŭładkavać, moža niehatyŭna ŭpłyvać na stan usiaho abjadnańnia. Ale ŭ toj ža čas jość spadziavańni, što akurat pry dapamozie jeŭraintehracyi možna budzie damahčysia i vyrašeńnia hetaj prablemy. Tym bolš kali da Jeŭrasajuza dałučycca i Sierbija, i pytańni miežaŭ stanuć nie takimi balučymi. 

Inšymi kandydatami na ŭstupleńnie ŭ Jeŭrasajuz ciapier źjaŭlajucca Ałbanija, Małdova, Paŭnočnaja Makiedonija, Čarnahoryja, Sierbija, Turcyja i Ukraina. A apošniaj krainaj, što atrymała siabroŭstva ŭ Jeŭrasajuzie, na siońniašni dzień źjaŭlajecca Charvatyja, jakaja dałučyłasia da jaho ŭ 2013 hodzie. 

• 1
• 0
• 1
• 1
• 0
• 0
• 1
• 0