Što rabić biełarusam, jakich dziaržava moža pazbavić hramadzianstva? Parady advakata
14 śniežnia deputaty Pałaty pradstaŭnikoŭ uchvalili zakonaprajekt, jaki dazvalaje pazbaŭlać biełarusaŭ hramadzianstva pa naradžeńni. Prajekt uvodzić novuju padstavu straty hramadzianstva — «u suviazi z najaŭnaściu prysudu suda Respubliki Biełarusi, jaki ŭstupiŭ u zakonnuju siłu, paćviardžaje ŭdzieł asoby ŭ ekstremisckaj dziejnaści abo pryčynieńnie joj ciažkaj škody intaresam Respubliki Biełaruś, kali takaja asoba znachodzicca za miežami krainy». Parady, što rabić, kali takoje adbyłosia, daje ŭ razmovie z «Radyjo Svaboda» advakat, ekśpiert u mižnarodnym pravie Aleś Michalevič.
Što treba zrabić
Pakul nikoha jašče hramadzianstva ŭ Biełarusi nie pazbavili. Ale Aleś Michalevič tym, chto ŭ zonie ryzyki, raić jašče da pazbaŭleńnia hramadzianstva atrymać dazvoł na žycharstva ŭ jeŭrapiejskaj krainie.
«Kali vas pazbavili hramadzianstva, značyć, u vas jość dokazy taho, što vas pieraśledujuć. Bo hramadzianstva buduć pazbaŭlać taho, chto pryznany vinavatym u «ekstremiźmie». Nieabchodna źviartacca pa status uciekača ŭ toj krainie, dzie vy znachodziciesia. Kali vy znachodziciesia ŭ niedemakratyčnaj krainie, varta pierajechać u pieršuju ž demakratyčnuju», — raić Aleś Michalevič.
Pry padačy dakumientaŭ na ŭciakactva važna dałučyć rašeńnie suda ab pryznańni ekstremistam i čakać rašeńnie ab nadańni mižnarodnaj abarony. Hetaja pracedura moža zaciahnucca na paŭhoda-hod.
«Kali vy pryznajecie, što vy nie hramadzianin Biełarusi, va ŭsich ankietach možna pisać, što vy asoba biez hramadzianstva. Ale ja b nie pryznavaŭ hetaha, bo nie Łukašenka mnie davaŭ hramadzianstva i nie jon jaho budzie zabirać», — kaža Aleś Michalevič.
Paśla atrymańnia statusa ŭciekača i mižnarodnaj abarony čałaviek atrymlivaje, aproč dazvołu na žycharstva, dakumient, ź jakim jon moža padarožničać. Pakul čałaviek čakaje rašeńnia ab statusie mižnarodnaj abarony, vyjazdžać z krainy padačy dakumientaŭ nielha.
Jakija prablemy mohuć uźniknuć
Pavodle Alesia Michaleviča, u asoby, jakuju pazbavili hramadzianstva, mohuć uźniknuć prablemy z atrymańniem vizy ŭ Kanadu, ZŠA, Vialikuju Brytaniju, Aŭstraliju. Adnak buduć i pieravahi:
«Naprykład, nie budzie patreby vychodzić ź biełaruskaha hramadzianstva, kali čałaviek budzie atrymlivać hramadzianstva inšaj krainy, jakaja zabaraniaje padvojnaje. Nie treba budzie vyrašać niejkija prablemy, źviazanyja ź Biełaruśsiu», — havoryć Aleś Michalevič.
Taksama nie budzie prablemy z padaŭžeńniem biełaruskaha pašparta, termin jakoha skončyŭsia.
Takija vypadki, kali čałavieka pazbaŭlali hramadzianstva pry najaŭnaści ŭ jaho tolki adnaho hramadzianstva, Aleś Michalevič pryhadvaje tolki ŭ SSSR i fašysckaj Niamieččynie.
«U Biełarusi hramadzianstva pazbavili Paŭła Šaramieta, ale tady Biełaruś dakazvała najaŭnaść u jaho rasijskaha hramadzianstva i pracy na dziaržaŭnaj słužbie ŭ Rasii. Materyjały hetaj spravy byli zasakrečanyja», — uspaminaje Aleś Michalevič.
Čytajcie taksama:
Kavaleŭski: My budziem dabivacca adpaviednaha pravavoha statusu dla biełarusaŭ, pazbaŭlenych režymam hramadzianstva
Pazbaŭlać hramadzianstva za ekstremisckuju dziejnaść. Deputaty pryniali ŭ dvuch čytańniach zakonaprajekt ab hramadzianstvie
Aryštavany dyrektar Pałaca Respubliki, adzin z arhanizataraŭ Marafona adzinstva9
Kamientary
Chaj Śviatłana Cichanoŭskaja robić narmalnuju strukturu i vydaje dakumienty hramadzianina.
Praz kolki hod va ŭsich buduć pašparty z pahoniaj.