«Ptušyny vianok». U Viciebsku projdzie vystava tvoraŭ śviatara-mastaka
7 śniežnia ŭ vystavačnaj zale Viciebskaha centra sučasnaha mastactva adbudziecca adkryćcio piersanalnaj vystavy «Ptušyny vianok» probašča parafii Najśviaciejšaj Trojcy ŭ Drui (Viciebskaja dyjacezija) ksiandza Siarhieja Surynoviča, paviedamlaje Catholic.by.
Śviatar Siarhiej Surynovič — doktar biblijnaj teałohii, u 2019 hodzie abaraniŭ u Polščy dysiertacyju pa pierakładach Biblii na biełaruskuju movu. Ale akramia śviatarskaj dy navukovaj dziejnaści jon maje i mastackaje chobi.
Vystava mastackich tvoraŭ Siarhieja Surynoviča — vynik pracy śviatara-mastaka ŭ 2022 hodzie. Aŭtar pradstaŭlaje na sud hledačoŭ 31 tvor, vykanany ŭ technicy aleju na pałatnie.
Tematyčna ŭsie padrychtavanyja da pakazu pracy — płod razvažańniaŭ duchoŭnaha tvorcy nad prablemami, uźniatymi Papam Franciškam u encyklicy Laudato si', pryśviečanaj abaronie stvareńnia.
«Vystava «Ptušyny vianok» — viartańnie ksiandza Surynoviča da žyvapisu paśla praciahłaha pierapynku. Sensam jaho žyćcia, paklikańniem, jak sam jon kaža, źjaŭlajecca dla jaho śviatarstva i słužba ludziam i Bohu. Žyvapis ža dla jaho — adzin sa srodkaŭ słužeńnia, što dapamahaje ŭbačyć Boha ŭ detalach i prajavach stvoranaha im śvietu.
Ciapierašniaja piersanalnaja vystava ksiandza Siarhieja Surynoviča ŭ Viciebsku ŭžo druhaja. Pieršaja adbyłasia tut u 2007 hodzie. A da taho byli vystavy ŭ muziei horada Cilzita, u muziei Kryścijanasa Daniełajcisa, u Domie narodnaj tvorčaści ŭ Kalininhradzie.
Adkryćcio vystavy — 7 śniežnia a 16-j hadzinie ŭ Viciebskim centry sučasnaha mastactva pa adrasie: praśpiekt Frunzie, 11, muzyčnaja haścioŭnia.
Vystavu možna naviedać da 26 lutaha 2023 hoda.
Ciapier čytajuć
«Ja nie bomž, u mianie navat biełyja škarpetki». U Minsku dziaŭčyna z Łuhanska raskłała pałatku prosta ŭ padjeździe šmatpaviarchovika, ustryvožyŭšy žycharoŭ2020
Kamientary