Z embryjonaŭ, zamarožanych 30 hadoŭ tamu, naradzilisia bliźniaty. Heta novy rekord
Dvoje bliźniataŭ naradzilisia ŭ štacie Tenesi z embryjonaŭ, jakija pralažali ŭ hłybokaj zamarozcy 30 hadoŭ. Heta samy doŭhi ŭ historyi termin, na praciahu jakoha zamarožanyja embryjony «čakali» źjaŭleńnia na śviet, piša Bi-bi-si.
Embryjony pralažali ŭ schoviščy z 22 krasavika 1992 hoda ŭ vadkim azocie pry tempieratury -128 hradusaŭ i zachavali pry hetym žyćciazdolnaść.
Paśla hetaha jany byli razmarožanyja i pierasadžanyja budučaj maci Rejčeł Rydžuej, jakaja paśpiachova naradziła bliźniat 31 kastryčnika hetaha hoda. «Vyžyć z rozumu možna», — zajaviŭ z hetaj nahody ščaślivy baćka Filip Rydžuej.
Pa danych Nacyjanalnaha centra donarskich embryjonaŭ — pryvatnaj arhanizacyi, jakaja śćviardžaje, što dapamahła naradzić bolš za 1200 dziaciej z embryjonaŭ, Lidzija-En i Cimaci-Ronald Rydžuej chutčej za ŭsio pastaviać novy rekord. Papiaredni naležyć Moli Hibsan (jana taksama źjaviłasia na śviet dziakujučy NEDC), jakaja naradziłasia ŭ 2020 hodzie z embryjona, jaki pralažaŭ u hłybokaj zamarozcy 27 hadoŭ.
«Rašeńnie ŭsynavić hetyja embryjony pavinna ŭsialić upeŭnienaść u pacyjentaŭ, jakija razvažajuć nad tym, ci zachoča chtości ŭziać embryjony, stvoranyja 5, 10 abo 20 hadoŭ tamu, — kaža doktar Džon Devid Hordan, jaki ažyćciaŭlaŭ pierasadku embryjonaŭ. — I adkaz na hetaje pytańnie — ćviordaje tak!»
Embryjony bliźniat, pra jakija idzie havorka, byli stvorany ŭ pačatku 1990-ch mietadam štučnaha apładnieńnia dla nienazvanaj pary.
Da 2007 hoda embryjony zachoŭvalisia ŭ łabaratoryi na zachodnim uźbiarežžy ZŠA, paśla čaho para vyrašyła pieradać ich u NEDC u Nokśvile, štat Tenesi, kab imi moh skarystacca niechta inšy (NEDC zajmajecca hetaj dziejnaściu ŭ tym liku i z relihijnych mierkavańniaŭ).
Zatym, užo ŭ pačatku hetaha hoda, embryjołahi kliniki-partniora NEDC ažyćciavili praceduru razmarozki embryjonaŭ i pierasadki ich.
Jak havorycca ŭ zajavie NEDC, centr spadziajecca, što navina ab naradžeńni zdarovych małych padšturchnie inšych patencyjnych baćkoŭ da taho, kab samim vyprabavać ščaście ŭsynaŭleńnia dziaciej, jakija źjavilisia na śviet z embryjona.
U pary Rydžuej na momant naradžeńnia bliźniat užo było čaćviora ŭłasnych dziaciej va ŭzroście ad hoda da vaśmi, i ŭsie jany źjavilisia na śviet naturalnym šlacham, biez donaraŭ abo štučnaha apładnieńnia.
«Mnie było ŭsiaho piać hadoŭ, kali Boh daravaŭ žyćcio Lidzii i Cimaci, i z tych časoŭ jon padtrymlivaŭ u ich hetaje žyćcio, — raspavioŭ u intervju Si-en-en Filip Rydžuej. — Tak što ŭ peŭnym sensie jany — našy starejšyja dzieci, choć i samyja maleńkija».
Pa śćviardžeńniach NEDC, čas zachoŭvańnia zamarožanych embryjonaŭ nie abmiežavany. Ale vierahodnaść, što kali-niebudź na śviet mohuć źjavicca dzieci, začatyja 100 hadoŭ tamu, nie tak vialikaja, pakolki hetaja technałohija źjaviłasia adnosna niadaŭna: pieršaje dzicia z zamarožanaha embryjona naradziłasia ŭ 1984 hodzie, heta adbyłosia ŭ Aŭstralii.
Ciapier čytajuć
«Kali mnie było dva hady, svajaki pavieźli mianie ŭ Biełaruś». Praz sacsietki dziaŭčyna adšukała baćku-rasijanina — ale skončyłasia historyja sumna14
«Kali mnie było dva hady, svajaki pavieźli mianie ŭ Biełaruś». Praz sacsietki dziaŭčyna adšukała baćku-rasijanina — ale skončyłasia historyja sumna
Pamiatajecie minčuka, jaki ŭ 2017‑m vyratavaŭ ściah z-pad noh amapaŭcaŭ — koštam svajoj svabody? Ciapier jamu, byłomu palitviaźniu, patrebnaja dapamoha1313
Pamiatajecie minčuka, jaki ŭ 2017‑m vyratavaŭ ściah z-pad noh amapaŭcaŭ — koštam svajoj svabody? Ciapier jamu, byłomu palitviaźniu, patrebnaja dapamoha13
«Biełaruś jany bačać častkaj Rasii». Što značyć uzdym «Alternatyvy dla Hiermanii», nakolki daloka heta moža zajści i jak siabie pazicyjanavać biełarusam5454
Kamientary