Pradstaŭleńnie novaha hienieralnaha dyrektara kirujučaj kampanii chołdynhu adbyłosia siońnia na fabrycy «Marka». Mikałaj Martynaŭ pieradaŭ prava zaniać hetuju pasadu svajmu synu Paŭłu, paviedamlaje Officelife.media.
Były hiendyrektar nie całkam adychodzić ad spravaŭ, a praciahnie ŭdzielničać u kiravańni kampanijaj na pasadzie namieśnika pa biznes-analizu.
U 1994 hodzie Mikałaj Martynaŭ zrabiŭ śmieły dla taho času krok, zasnavaŭšy vytvorčuju kampaniju. Pryčym u śfiery, dzie ŭžo daminavaŭ «Biełviest», na jakim Martynaŭ atrymaŭ asnovy viadzieńnia biznesu.
U 2000-ch kampanija značna pašyryła svaje aktyvy: dałučanyja fabryka «Čyrvony Kastryčnik», Viciebski futravy kambinat i toje, što zastałosia ad zbankrutavałaj fabryki «Biełkielmie» ŭ Biełaaziorsku (ciapier — «Vierdzimar»). Taksama na pradpryjemstvie «Vitma» šyjuć sumki i skurhałantareju.
U 2013 hodzie ŭsie aktyvy byli abjadnany ŭ chołdynh Biełaruskaja harbarna-abutkovaja kampanija «Marka», jaki staŭ adnym z samych bujnych vytvorcaŭ abutku siarod krain SND. Niadaŭna da biełaruskich mahutnaściach dadałasia dola ŭ sumiesnym pradpryjemstvie va Uźbiekistanie.
Tym nie mienš spadčyńniku takoha kapitału budzie niaprosta spraŭlacca z vyklikami novaha času. Pavieł Martynaŭ zaraz nienašmat starejšy, čym byŭ jaho baćka padčas adkryćcia biznesu ŭ 1990-ch.
Karjerny rost Paŭła ŭ abutkovaj impieryi baćki pačynaŭsia z pasady supracoŭnika kamiercyjnaha adździeła pradpryjemstva «Evimar» (dałučana da STAA «Marka»). Ciapier jon pakinuŭ pasadu dyrektara pradpryjemstva «San Marka» i staŭ la rula ŭsiaho chołdynhu.
U adnym ź intervju Mikałaj Martynaŭ pryznaŭsia, što apynuŭsia zakładnikam svajho pośpiechu:
«Pa sutnaści, nie naležu sabie, jość mnostva abaviazacielstvaŭ, vializarny pracoŭny kalektyŭ. Tym nie mienš ja ŭsio-taki liču, što nie my sami vyznačajem svoj šlach… Kali Boh daŭ mnie mahčymaść zajmać kirujučuju pasadu, to ja pavinien hodna nieści svaju nošu», — kazaŭ jon.
Biełaruskaha Siniuju Baradu adpuścili z rasijskaj turmy pamirać doma6
Biełaruskaha Siniuju Baradu adpuścili z rasijskaj turmy pamirać doma
«Ja staŭ ščaślivy». Praca na budoŭli prynosić dobryja hrošy, a hramadskaja aktyŭnaść — maralnuju siłu. Były kalinoviec Kuś raskazaŭ pra toje, jak viarnuŭ unutranuju raŭnavahu1313
Kamientary