«Žyviom bieź italjanskaj makarony». Što biełarusy pierastali kuplać z padaražeńniem i źniknieńniem niekatorych tavaraŭ?
Zhodna z červieńskaj statystykaj, ceny za hod vyraśli na 17,6%. Razam z hetym peŭnyja tavary, da jakich pryzvyčailisia ludzi, uvohule źnikli z palic, adznačajuć čytačy «Našaj Nivy», i im pryjšłosia šukać zamienu.
Fota: irecommend.ru
«Źnikli ŭkrainskija kietčupy «Čumak»
Natalla z mužam — ź Minska. Paśla pačatku vajny va Ukrainie jany adznačyli dla siabie źniknieńnie z kram lubimaj kavy ŭ zierniach i pralnaha parašku.
«Pralny parašok Persil kuplali tolki vytvorčaści Hiermanii ci Polščy sa Słavakijaj. Ciapier jaho prosta niama. Ëść rasijski varyjant, ale ŭ jaho nizkaja jakaść: jon źbivajecca ŭ kamiaki ŭ mašynie i horš admyvaje.
Što tyčycca kavy, to my zaŭsiody nabyvali arabiku Paulig. Ciapier kali i ŭchopiš jaje, to za 42,99 rubla za kiłahram (raniej my brali ziernie za 19-21 rubiel). Tamu my sočym za cenami ŭ dastaŭcy «jaMiham» ci anłajn-dyskaŭntary eMall i nabyvajem lubuju arabiku, jakaja chacia b da 40 rubloŭ», — kamientuje Natalla.
Zaŭvažyła žančyna i źniknieńnie lubimych ukrainskich kietčupaŭ «Čumak»:
«My pierajšli na rasijskija, ale jany na smak horšyja: bolš vadkija, šmat soli».
Dachod siamji — kala 1600 rubloŭ na dvaich, muž z žonkaj adznačajuć, što ahulnyja vydatki na pradukty paśla vajny ŭ ich vyraśli na 20% i pryvodzić prykład z makaronami: «Raniej 450 hramaŭ brali, u siarednim, pa 1,90, a zaraz addajem bolš za try rubli».
Za miasam siamja jeździć vyklučna na rynak u Ždanovičy.
«A vopratku ciapier zusim nie nabyvajem: doraha dy vybaru niešta niama (asabliva što tyčycca abutku). Tamu čakajem mahčymaści zrabić vizy i pajechać za miažu, kab abnavić harderob», — dzielicca płanami surazmoŭca.
«Składana znajści małako ŭ tetrapakach»
Jašče adna minčanka Natalla skardzicca na toje, što stała składana znajści ŭ Minsku małako ŭ tetrapakach.
«Naprykład, była ŭčora ŭ «Hipa» na Rakasoŭskaha. Z tetrapakaŭ stajała niekalki «Słavianskich tradycyj», małaka, i amal usio. Astatniaja małočka — u płastykavych pakietach i butelkach. Dla mianie heta prablema: ja nabyvaju małako adrazu na miesiac, i mienavita ŭ tetrapakach jano najlepš zachoŭvałasia. Ciapier navat nie viedaju, što rabić: byvaje, što małako ŭ takoj tary adsutničaje ŭ hipierach uvohule».
Z prablemaj sutyknułasia i siastra žančyny:
«Jana nie moža nabyć napaŭnialnik dla kacinaha łatka Fresh Step, jaki nabyvali raniej. Jaho paprostu niama ŭ zaakramach».
Na ježu i pobytavuju chimiju ŭ Natalli ŭ miesiac sychodzić kala 1500 biełaruskich rubloŭ. Žančyna zaŭvažaje, što jašče da vajny razavy pachod u kramu abychodziŭsia joj u 65 rubloŭ, zaraz jana addaje minimum 80.
«Prosty prykład z aŭtamatyčnym aśviažalnikam dla pavietra Glade. Naprykancy zimy ja nabyvała jaho pryblizna za 12 rubloŭ, a ŭčora źviarnuła ŭvahu, što jon užo kala 18».
«Amal vyklučyli sa spažyvańnia johurty i syrki»
Alena z mužam i dziećmi žyvie ŭ Barysavie. U siamji — troje dziaciej. Starejšaja dačka atrymlivaje płatnuju adukacyju ŭ BDUIR (kaštuje kala čatyroch tysiač rubloŭ na hod). Dachod na piać čałaviek — 3200 rubloŭ, i kali da vajny, pa pryznańni hieraini, jany mahli dazvolić sabie nabyvać z zarobku 300-400 dalaraŭ, kab adkładać, to ciapier traciać usie hrošy, što atrymlivajuć.
U suviazi z padaražańniem niekatorych praduktaŭ pryjšłosia pierahledzieć svaje pakupki.
«My zusim pierastali nabyvać, naprykład, italjanskuju makaronu ŭ siońniašnich umovach: u roznych miescach jana kaštuje ad 4 da 8 rubloŭ, a zakupajemsia my i ŭ «Hrynie», i ŭ «Vitalury», i ŭ «Jeŭraopcie», i ŭ inšych kramach. My nikoli nie hladzieli na marku, prosta zrazumieli, što voś siońnia nam makarona ź Italii nie pa kišeni. Amal vyklučyli sa spažyvańnia johurty i syrki: jany taksama mocna padaraželi. Ciapier ja piaku dzieciam syrniki».
Alena raskazvaje, što bolšaść asnoŭnych praduktaŭ jany pryncypova šukajuć na źnižkach: «Syr biełaruskaj vytvorčaści «Hałandski» — kab nie daražej za 14 rubloŭ za kiłahram (ja prosta psichałahična nie mahu zapłacić za jaho navat 17, kali zarobak zastaŭsia raniejšym i zusim niadaŭna my addavali za toje ž 10 rubloŭ)».
Z sałodkaha dzieciam Alena nabyvaje letam maroziva i sadavinu.
«Pa prysmaki, u asnoŭnym, adpraŭlajemsia ŭ «Hrošyk». Tyja ž banany tam try rubli, a ŭ «Vitalury» — kala piaci. Ja nie viedaju, jak žyvuć ludzi ź mienšym dachodam», — zadajecca pytańniem surazmoŭca.
Čytajcie taksama:
Na «Kufry» ŭkrainskuju sol pradajuć ažno pa 50 rubloŭ za 1,5 kiłahrama — jak z popytam?
U Polščy aryštavali byłoha kiraŭnika biełaruskaha «Paspalitaha rušeńnia» — pahražaje 10 hod za narkotyki26
Kamientary