Śmiejaciesia z žartaŭ Aviasales? Ich prydumlaje biełarus, i my ź im pahutaryli
Biełaruskimi sacsietkami płatformy prodažu biletaŭ Aviasales zajmajecca hamialčuk Andrej Šprenhiel.
U svoj čas Andrej skončyŭ Homielski instytut transpartu i navat papracavaŭ na Biełaruskaj čyhuncy. Paśla hetaha była By.tribuna.com i, jak jon kaža, jašče «niekalki vialikich biełaruskich prajektaŭ, jakija ciapier lepš nie nazyvać».
Praca ŭ Aviasales — mara dla mnohich, na kožnuju vakansiju — zaŭsiody vialikaja kankurencyja. Ale Andreju, jak jon sam ličyć, u niejkim sensie pašancavała: praca znajšła jaho sama.
«U 2019 hodzie Aviasales šukaŭ ludziej, jakija buduć zajmacca łakalnymi rynkami. Kali napisali z prapanovaj pasprabavać, ja adpačyvaŭ u Adesie — praz prablemy ź internetam paviedamleńnie pravisieła biez adkazu ledź nie cełyja sutki. Kali pračytaŭ, naturalna, adrazu ž pahadziŭsia.
Paciešna, što pieršaje sumoŭje prajšło ŭ mianie naŭprost u ciahniku: jechaŭ dadomu ŭ kupe i razmaŭlaŭ pa vajbiery. Niejkich asablivych zadač z zoračkaj pry hetym nie pamiataju. Dy i nadta daŭno heta było, — zhadvaje chłopiec i dadaje:
Babuli-dziaduli, zdajecca, niemahčyma patłumačyć, kim ja ciapier pracuju. Mama da hetaha času čamuści ličyć, što ja pradaju kvitki ŭ avijakasie».
Ahułam va ŭsich padraździaleńniach kampanii za žarty, jakija my bačym u sacsietkach, adkazvaje kala 15 śpiecyjalistaŭ. Jość svaje smm-ščyki ŭ Azierbajdžanie, Kazachstanie, Uźbiekistanie i na ŭsich rynkach, dzie pracuje «Avijasiejłs». Bolš za ŭsio ludziej zadziejničana na rasijskich sacsietkach.
Andrej źviartaje ŭvahu, što ŭ biełarusaŭ z humaram prablem niama: «Bieź jaho my b daŭno zvarjacieli». Ale dla pracoŭnych žartaŭ u jaho zaviedzienyja admysłovyja papački ź miemami na kampjutary:
«U mianie ich štuk piać, napeŭna. A jašče ŭ nas jość čacik, kudy kalehi skidvajuć svaje znachodki na abmierkavańnie. Taksama ja saču za zamiežnymi kalehami, natchniajusia kłasnymi biełaruskimi ŚMI i pablikami (ja moh by skłaści ceły śpis z rekamiendacyjami, ale da mianie heta ŭžo zrabili na sajcie «SB», naprykład, apublikavaŭšy śpis ekstremisckich materyjałaŭ). Strohaha hrafika, darečy, u nas niama: umoŭna pracoŭny dzień pačynajecca ŭ 10:00 pa Minsku, jość navat ranišniaja płaniorka, ale nichto z puhaj nad taboj stajać nie budzie. Bolšaść supracoŭnikaŭ Aviasales žyvie ŭ roznych kropkach śvietu (kankretna ja zaraz u Varšavie). I pracujuć jany tady, kali heta zručna i pryniasie bolš karyści. Hałoŭnaje — vynik. U kancy kožnaha miesiaca my źbirajem standartnyja mietryki dla ŭsich sacsietak, paraŭnoŭvajem pakazčyki miesiac da miesiaca, hod da hoda. Analizujem, što lepš za ŭsio «zajšło».
Dla viadzieńnia sacsietak u Biełarusi admysłova šukali biełarusa, kab jon lepš razumieŭ unutrany kantekst. I heta adčuvajecca. Voś tolki niekalki žartaŭ, pryśviečanych našaj realnaści:
Pad niekatorymi pastami možna sustreć kamientary, jakija vydatna charaktaryzujuć naš čas: «Za takoje i pasadzić mohuć». Pry hetym, kaža Andrej, u ich niama cenzury ad kiraŭnictva, i jany mohuć žartavać na lubyja temy:
«U Aviasales pracujuć prafiesijanały, kožny sam razumieje miežy biznes-etyki. Tut tolki kožny sam sabie cenzar».
Nievytłumačalna, ale fakt: paśla prychodu ŭ «Avijasejłs» chłopiec staŭ lotać i vandravać mienš, choć takaja praca i dazvalaje pracavać addalena. Ale z taho, dzie pabyvaŭ, Andrej raić abaviazkova naviedać usim nastupny top krain:
- Hruzija: «Ź joj i tłumačyć nie treba — varta tudy prosta źlotać i ŭsio stanie jasna. Ja sam pražyŭ tam amal hod i nivodnaj niehatyŭnaj emocyi za hety čas nie atrymaŭ. Plus tudy nieskładana dabracca ź Biełarusi, viza niepatrebnaja».
- Kyrhyzstan: «Mahčyma, heta dziŭna, ale jon u šort-liście maich budučych pajezdak — na pieršym miescy».
- Estonija: «Niekalki hod tamu ja pravioŭ paru dzion u Talinie i zachacieŭ tudy pierajechać žyć. Nu, mahčyma, kali-niebudź».
«Naša Niva» — bastyjon biełaruščyny
PADTRYMAĆCiapier čytajuć
Biełaruskaja i rasijskaja armii na biełaruskaj terytoryi trenirujucca nanosić jadzierny ŭdar1
Kamientary