25 žniŭnia sud Čyhunačnaha rajona Homiela pryznaŭ vinavataj miedsiastru homielskaha abłasnoha Doma dziciaci ŭ traŭmavańni adnoj z paŭtarahadovych siaścior‑bliźnicaŭ i śmierci druhoj i pryhavaryŭ jaje da siami hadoŭ pazbaŭleńnia voli z adbyvańniem pakarańnia ŭ kałonii ahulnaha režymu. U suviazi z zakonam ab amnistyi termin pakarańnia joj źmienšany na adzin hod.
Miedrabotnik pryznana vinavataj u nienaležnym vykanańni słužbovych abaviazkaŭ, u vyniku čaho mieła miesca śmierć dziciaci (č.2 art.165 KK), i ŭ naniasieńni ciažkich cialesnych paškodžańniaŭ zaviedama małaletniamu (č.2 art.147 KK).
Abvinavačanuju ŭziali pad vartu ŭ zale suda.
Sud pastanaviŭ taksama jaje dzicia, 5‑hadovaha chłopčyka, pieradać orhanam apieki adździeła adukacyi.
Pierad abviaščeńniem pryhavoru miedsiastra ŭ apošnim słovie zajaviła, što «vielmi raskajvajecca ŭ tym, što zdaryłasia». «Mnie vielmi‑vielmi škada, u mianie jość svajo dzicia, jakoha ja lublu. Hetych dziaciej ja taksama lubiła», — skazała jana.
Jak paviedamlałasia raniej, paŭtarahadovaja vychavanka Doma dziciaci pamierła 16 sakavika pa darozie ŭ balnicu. Jaje siastra‑bliźnica była dastaŭlena ŭ reanimacyju i praapieryravana. U hety ž dzień pa padazreńni va ŭčynieńni złačynstva była zatrymana miedrabotnik ustanovy, jakaja pryznała, što ŭdaryła adno dzicia, a druhoje «niedahledzieła». Da suda abvinavačanaja znachodziłasia pad damašnim aryštam. Ekśpiertyza pakazała,
što adnoj ź dziaŭčynak, jakaja vyžyła, była naniesiena tupaja traŭma žyvata, što stała pryčynaj razryvu piečani i ŭnutranaha krovacioku. Taksama ŭ dziciaci byli vyjaŭleny kryvapadcioki na tvary, hrudnoj kletcy, ruce i nazie roznaj daŭnaści. Było taksama ŭstanoŭlena, što jaje siastra pamierła ad razryvu piečani i krovacioku. Na ciele zahinułaha dziciaci byli taksama vyjaŭleny kryvapadcioki.
Padčas suda abvinavačanaja zajaviła, što traŭmavanaja dziaŭčynka sama ŭdaryłasia ab vuhał łožyka, adnak dadatkovaja ekśpiertyza nie paćvierdziła heta. Ekśpierty ličać, što takaja traŭma dziciaci mahła być naniesiena ŭdaram kułaka ŭ žyvot. U vyniku dziaržabvinavaŭca zajaviŭ, što vina miedsiastry, jakaja abvinavačvajecca ŭ śmierci i traŭmavańni paŭtarahadovych siaścior‑bliźnicaŭ, vychavanak Homielskaha abłasnoha Doma dziciaci, poŭnaściu dakazana.
Jak zaznačyŭ advakat abvinavačanaj, jon zhodny z abvinavačańniem jaho padabaronnaj u tym, što jana «nienaležnym čynam vykonvała svaje abaviazki, i heta mieła vynikam śmierć małaletniaha». Razam z tym advakat prasiŭ sud pierakvalifikavać artykuł 147 (naŭmysnaje naniasieńnie ciažkich cialesnych paškodžańniaŭ) na artykuł 155 (naniasieńnie ciažkich cialesnych paškodžańniaŭ pa nieaściarožnaści). Svajo mierkavańnie jon matyvavaŭ tym, što dakładna nie dakazana, što dziaŭčynka była traŭmavanaja miedsiastroj, a nie ŭdaryłasia ab vuhał łožka sama. U suviazi z tym, što jaho padabaronnaja raniej nie sudzimaja, vychoŭvaje małaletniaje dzicia, advakat paprasiŭ dla jaje pakarańnie ŭ vyhladzie abmiežavańnia voli. Adnak vysnovy advakata nie byli ŭziatyja pad uvahu.
Kamientary