Hulcy «Šachciora» pabilisia ŭ raździavalni paśla ničyi, BATE zdabyvaje piać pieramoh ź piaci mahčymych. Vyniki čarhovaha tura

Samaja rejtynhavaja sustreča hulniavoha dnia vydałasia najbolš skandalnaj. Čempijon krainy, salihorski «Šachcior», nie zdoleŭ u Hrodnie skaryć «Nioman». Da pierapynku «harniaki» ŭvohule vyhladali nijakavata, z-za čaho i chutki miač prapuścili, i na čužuju pałovu amal nie vysoŭvalisia. Tolki paśla zamien Siarhieja Tašujeva «Šachcior» krychu ažyŭ dy adnaviŭ raŭnavahu na 78‑j chvilinie nahami Skavyša.

A ŭžo ŭ kampiensavany čas zdaryŭsia epizod, jaki i zapuściŭ łancuh samych rezanansnych padziej uik-endu. Ataka haściej daviała Darba dy Anciča da bramy «Niomana» — i vyhladała patencyjna halavoj. Adnak afrykaniec admoviŭsia pasavać na sierba, z-za čaho momant sapsavaŭ. Bałkaniec napačatku vykazaŭ niezadavolenaść partnioru na poli.

A paśla finalnych 1:1 praciahnuŭ «vychavańnie» ŭ raździavalni. Darba adkazaŭ kułakami.

U vyniku spałachnuŭ kanflikt, jaki tolki śćvierdziŭ i biez taho taksičnuju atmaśfieru ŭ kłubie. Pra jaje navat daviałosia havaryć hałoŭnamu trenieru čempijonaŭ na pres-kanfierencyi.

Tym nie mienš, za ŭsimi prablemami «Šachciora» nie varta zabyvacca na kamplimient haradziencam. Upieršyniu ŭ historyi «Nioman» ni razu nie sastupiŭ u piaci startavych turach vyšejšaj lihi.

Pavialičyć

A voś BATE pajšoŭ jašče dalej — i vyjhraŭ usie sustrečy, što prapanavaŭ kalandar z pačatku siezonu. Čarhovaj achviaraj barysaŭcaŭ staŭ «Homiel»: Vilumsan dy Šumanski adznačylisia trapnymi strełami, na jaki hołam adkazaŭ tolki Adeała.

Miač afrykanca staŭ znakavy, bo BATE dahetul u pieršynstvie-2022 nie prapuskaŭ. Adpaviedna, kipier barysaŭcaŭ Andrej Kudraviec pierarvaŭ svaju «suchuju» sieryju.

Tym nie mienš 18‑hadovy futbalist staŭ samym maładym u historyi pieršynstva bramnikam, chto 500 chvilin zapar nie dazvalaŭ adznačycca apanientam.

Adznačym i pieršuju parazu ŭ čempijanacie «Enierhietyka». Paśla badzioraha startu minčuki nie zdoleli spynić «Isłač», bo prapuścili dvojčy — napačatku kožnaha z tajmaŭ. Jak vynik, chatniaja niaŭdača, niahledziačy na hoł ź pienalci Ryłača, dy piaty matč zapar, dzie kalektyŭ Paŭła Radnionka nie moža zachavać bramu niedatykalnaj.

A voś minskaje «Dynama» adužała «Dniapro» — i razam z BATE dy «Niomanam» zastałosia niepieramožnym. Za košt hałoŭ Puciły dy Viljama «bieła-błakitnyja» pierasunulisia na druhi radok tablicy.

Astatnija vyniki tura vyhladajuć tak:

• Arsienał — Słuck — 1:1
• Biełšyna — Viciebsk — 2:2
• Słavija — Tarpieda BiełAZ — 2:2
• Minsk — Dynama Brest — 2:0

Takim čynam, paśla piaci turaŭ Vyšejšuju lihu ŭznačalvaje BATE z 15 punktami. Na rachunku minskaha «Dynama» 11 punktaŭ, 10 — u «Enierhietyka» dy futbolnaha kłuba «Minsk».

• 1
• 0
• 5
• 8
• 0
• 0
• 2
• 0