«U aeraport pryvieźli ŭ turemnaj robie». Brat palitźniavolenaj Chierše pra jaje vyzvaleńnie

«Natalla vielmi chudaja, nastolki tonkaja. Usie vałasy sivyja, tolki končyki bialavyja zastalisia. Kazała, što tracina vałasoŭ vypała. Ale navat tak jana vyhladaje dobra. Nastroj pazityŭny. Vytrymała», — raskazaŭ jaje brat Hienadź Kaśjan.

«Jana palacieła ŭ Šviejcaryju praz Stambuł — tam jaje sustrenie šviejcarski konsuł i pasadzić na samalot u Ciurych, — kaža brat. — Pra toje, što Natašu vyzvalili i my jedziem u aeraport, ja daviedaŭsia ŭ 8:30, kali pryjechaŭ u ambasadu.

Mianie zaprasili ŭ ambasadu, sakratarka paprasiła ŭziać dakumienty Natalli, jakija zachoŭvalisia ŭ mianie, ale ja absalutna ničoha nie viedaŭ. Prosta dumaŭ, što dla čahości spatrebilisia dakumienty.

A mianie pavinšavali z vyzvaleńniem Natalli i skazali, što za 15 chvilin vyjazdžajem na mašynie ŭ aeraport u vip-zału. Tudy pryvieźli Natallu ŭ busiku, u turemnaj robie.

My kala 40 chvilin prasiadzieli ŭ zale čakańnia, praŭda, u prysutnaści słužbovych asob, — adznačaje brat. — Nas pačastavali kavaj, harbataj, cukierkami. 

Heta vielmi niečakana dla mianie. Pazaŭčora byŭ moj dzień narodzinaŭ — heta samy lepšy padarunak, jaki ja moh atrymać u svaim žyćci», — kaža brat Natalli Chierše. 

Pavialičyć

U Šviejcaryi jaje buduć sustrakać dačka i syn, a taksama deputatka Barbara Hizi, jakaja stała «chrosnaj» joj, były ambasadar Šviejcaryi ŭ Biełarusi Kłod Altermat, jaki doŭhi čas kantaktavaŭ z Natallaj.

«Na žal, Robiert na dadzieny momant u Pieru znachodzicca, ale jon vielmi chacieŭ taksama sustreć. Nataša dała zhodu, kab i Robiert byŭ, ja jaje ŭhavaryŭ, — kaža Hienadź Kaśjan i dadaje. — Ja nie rychtavaŭsia. Navat čamadan nie sabraŭ, nijakija rečy nie pryvioz Natalli. Tolki dakumienty. Ale joj pierad samalotam dazvolili pieraapranucca, niejki kavałačak ałoŭka znajšoŭsia — jana padfarbavałasia. Kaśmietyki ŭ jaje niama, ale konsuł, jaki sustrenie jaje ŭ Stambule kupić joj minimalnuju kaśmietyku, bo ŭ Ciurychu jaje buduć sustrakać ŚMI».

Pavialičyć

Pra vyzvaleńnie Natalli Chierše paviedamiŭ asabista prezident Šviejcarskaj Kanfederacyi Ińjacya Kasis.

Natallu Chierše zatrymali 19 vieraśnia 2020 hoda, jana sarvała bałakłavu z amapaŭca, jaki zatrymlivaŭ žančyn na maršy za svabodnyja vybary. Paźniej jaje asudzili da 2,5 hoda kałonii. 

Biełaruska hramadzianka Šviejcaryi praviała za kratami 17 miesiacaŭ. Ëj zastavałasia adbyć jašče 13 miesiacaŭ źniavoleńnia.

Nahadajem, što niadaŭna heta kraina pryznačyła pasła ŭ Biełarusi. Kryścin Chonehier-Załatuchin uručyła Uładzimiru Makieju kopii davierčych hramat. Šviejcarskaje MZS nie ličyć hety žest pryznańniem lehitymnaści Łukašenki. Raniej ambasadary jeŭrapiejskich krain admaŭlalisia ŭručać davierčyja hramaty, demanstrujučy tym samym niepryznańnie vynikaŭ vybaraŭ 2020 hoda.

Možna mierkavać, što koštam vyzvaleńnia zakładnicy Chierše stała ŭručeńnie davierčych hramat pasłom.

Natalla Chierše tak i nie napisała prašeńnia ab pamiłavańni, paviedamiŭ jaje brat. Da napisańnia prašeńnia jaje schilali ŭvieś čas źniavoleńnia. Za admovu šyć formu dla siłavikoŭ jaje pieraviali z homielskaj žanočaj kałonii ŭ mahiloŭskuju turmu.

Čytajcie taksama:

«U mianie ŭžo heta adbaleła». Palitźniavolenaja Natalla Chierše — pra razryŭ adnosin z mužam

«U Šviejcaryi ŭ jaje było cudoŭnaje žyćcio, ale jana ličyła, što ciapier musić być na radzimie». Chto takaja Natalla Chierše, jakuju pasadzili za sarvanuju bałakłavu

Natalla Chierše, asudžanaja za sarvanuju bałakłavu, paŭtara miesiaca praviała ŭ ŠIZA

Palitźniavolenuju Natallu Chierše pieraviaduć u mužčynskuju turmu ŭ Mahilovie

• 0
• 0
• 0
• 0
• 0
• 0
• 0
• 0