Čamu Rasija nie dała Łukašenku $3,5 młrd u doŭh i dzie ciapier Biełaruś budzie brać hrošy?
«Prytoku valuty ad źniešniaha handlu, tearetyčna, budzie chapać na absłuhoŭvańnie doŭhu. Tamu, mnie zdajecca, Rasija prosta nie choča davać bolš, čym treba», — miarkuje Kaciaryna Barnukova.
Učora stała viadoma, što Biełaruś nie atrymaje ad Jeŭrazijskaha fondu stabilizacyi i raźvićcia 3,5 miljarda dalaraŭ, jakija prasiła. Rasija vykazała hatoŭnaść vydzielić kudy mienš — da adnaho miljarda. Ci zmoža ekanomika abyścisia biez dadatkovych hrošaj?
Na što patrebnaja takaja suma? U hetym hodzie Biełarusi nieabchodna spłacić kala 3,5 miljarda dalaraŭ pa źniešnim dziaržaŭnym doŭhu: suma ŭklučaje vypłaty pa ciele doŭhu i pracenty. Hrošy byli nieabchodnyja na jaho refinansavańnie.
«Dumaju, u JEABR zapytvali pa maksimumie, i chutčej za ŭsio, razmova išła ab prahramie nie na adzin hod. Ale vyrašyli praz hety miechanizm nie davać hrošy Biełarusi, pakinuć pryviazku da rasijskich mižuradavych kredytaŭ, jakija treba budzie ŭ niekalki zachodaŭ prasić», — kamientuje akademičny dyrektar BEROC Kaciaryna Barnukova.
Na jaje dumku, rašeńnie Rasii abmiežavacca mienšaj sumaj kredytu źviazanaje z tym, što ŭ biełaruskaj ekanomiki (a mienavita ŭ źniešnim handli) spravy i tak iduć dobra. Na apošniaj sustrečy z Alaksandram Łukašenkam Uładzimir Pucin akcentavaŭ na hetym uvahu.
«Chacieŭ by adznačyć, što i našy ekśpierty ličać, što ekanomika Biełarusi znachodzicca ŭ dobrym stanie. Praficyt, pa-mojmu, niejki namiačajecca», — kazaŭ Pucin u śniežni.
«Stanoŭčaje salda źniešniaha handlu tavarami i pasłuhami skłała 3,77 miljarda dalaraŭ za minuły hod. U hetym hodzie situacyja moža paŭtarycca.
Prytoku valuty ad źniešniaha handlu, tearetyčna, budzie chapać na absłuhoŭvańnie doŭhu. Tamu, mnie zdajecca, Rasija prosta nie choča davać bolš, čym treba», — miarkuje Kaciaryna Barnukova.
Adkul jašče možna ŭziać hrošy, jakija nie ŭdałosia atrymać ad JEABR?
Kali situacyja pa handli budzie nie takoj spryjalnaj, a pazyčyć bolš nie ŭdasca, doŭh možna vypłacić z zołata-valutnych reziervaŭ. Na pačatak hoda ZVR Biełarusi składali 8,5 miljarda dalaraŭ, ź ich kala čatyroch — likvidnyja hrošy (nie zołata, a depazity ŭ bankach).
Spadziavacca na kredyty ad Kitaja pakul nie vypadaje.
«U zvodkach pa źniešnim doŭhu, jakija publikavali, było bačna, što ŭ 2020-2021 hadach Kitaj nijakich kredytaŭ nie davaŭ, a tolki zabiraŭ vypłaty pa starych, — zaŭvažaje ekanamist.
— Byli razmovy pra toje, kab Biełarusi vyjści na rynak panda-bondaŭ (ablihacyj na kitajskim unutranym rynku, — «NN»), ale my nie zmahli hetaha zrabić, navat kali ŭ dačynieńni da krainy nie było nijaikich sankcyj. Navat tady biełaruskija bondy nie padychodzili pa kryteryjach jakaści. Zrazumieła, kali budzie palityčnaja voli Kitaja, dla ich nie prablema padkinuć adzin-dva miljardy dalaraŭ, ale pakul što jaje nie nazirajecca».
Čytajcie taksama:
«Heta byŭ asnoŭny łahistyčny kalidor». Jak ciapier «Biełaruśkalij» budzie pastaŭlać pradukcyju na ekspart?
«Kraina stračvaje mahčymaści raźvićcia». Ekanamisty pra toje, što budzie z cenami i zarobkami biełarusaŭ u 2022 hodzie
Nazvanyja rehijony z samymi nizkimi zarobkami
Ciapier čytajuć
«Jak tolki čujuć pra Rasiju — dyk usio… U čym prablema?» U Minsku nie chočuć zdavać kvateru čałavieku z rasijskim pašpartam14
Kamientary