«Havanski sindrom» raspaŭzajecca pa śviecie: začapiŭ užo 200 amierykanskich dypłamataŭ i raźviedčykaŭ
CRU evakujavała aficera raźviedki, jaki słužyŭ u Sierbii i ŭ jakoha prajavilisia simptomy nieŭrałahičnaha charaktaru, viadomyja jak «Havanski sindrom».
Havanski sindrom fiksujecca va ŭsio bolšaj kolkaści amierykanskich dypłamataŭ i raźviedčykaŭ va ŭsim śviecie, piša «Vašynhton post».
Apošnija takija vypadki zdarylisia ŭ Indyi i Vjetnamie.
Vydańnie paviedamlaje, što CRU ŭ apošnija tydni adklikała kiraŭnika svajoj rezidentury ŭ Vienie, dzie zafiksavali šmatlikija vypadki havanskaha sindromu.
Stan, jaki atrymaŭ nazvu «havanski sindrom», byŭ upieršyniu zafiksavany ŭ amierykanskich dypłamataŭ, jakija pracavali na Kubie. Zdaryłasia toje ŭ 2016 hodzie. Simptomy jaho ŭklučajuć hałavakružeńnie, hałaŭnyja boli, stomu, młosnaść, tryvohu, kahnityŭny razład i stratu pamiaci.
Paśla hetaha anałahičnyja vypadki mieli miesca ŭ amierykanskich dypłamataŭ, jakija pracavali ŭ Kitai, Kałumbii, Hiermanii i voś ciapier jašče ŭ čatyroch krainach.
Ad času vyjaŭleńnia pieršych vypadkaŭ prajšło ŭžo piać hadoŭ, a ŭsio jašče dakładna nieviadoma, jaki miechanizm hetych atak i chto za imi staić.
«Ci my nablizilisia da adkazu? Ja dumaju, što adkaz — «tak», ale jašče niedastatkovy, kab zrabić vyvady, jakich čakajuć ludzi», — zajaviŭ namieśnik dyrektara CRU Devid Koen na štohadovym tak zvanym Intelligence and National Security Summit.
Miedyki schilajucca, što simptomy najbolš padobnyja da tych, jakija ŭźnikajuć pry ŭździejańni nakiravanymi elektramahnitnymi chvalami. Niekatoryja navukoŭcy ličać, što pryčynaj moža być i ŭltrahukavaja pryłada, mikrachvalovaje vypramieńvańnie ci łazier.
Niajasnaja i zadača takich atak na amierykanskich dypłamataŭ. Ci heta pabočny efiekt niejkaj navatarskaj sistemy sačeńnia, ci prosta sposab psichałahičnaha ŭździejańnia.
Amierykancy adnaznačna razhladajuć situacyju jak ataku na svoj piersanał.
I daŭniej, i ciapier amierykanskija čynoŭniki schilnyja źviazvać niajasnaje ŭździejańnie z Rasijaj, adnak nijakich dokazaŭ u ich niama, a Maskva abviarhała ŭsie abvinavačvańni.
Ciapier čytajuć
U hadavinu śmierci Žanny Fryskie Dźmitryj Šepieleŭ raspavioŭ, čamu nie dazvalaje synu bačycca ź jaje svajakami15
Kamientary