Izrail nakryła chvala kavidu. Kraina — adzin ź lidaraŭ pa vakcynacyi
Kažuć, sprava ŭ štamie «Delta».

Niahledziačy na vysokija (60% nasielnictva) pakazčyki poŭnaj vakcynacyi, u Izraili zarehistravanyja najvialikšyja ŭ śviecie ličby novych vypadkaŭ kavidu. Pa danych na 1 vieraśnia, kolkaść zaražeńniaŭ u Izraili składaje 1892 vypadki na miljon čałaviek. Heta značna vyšej, čym kolkaść zaražeńniaŭ u Manholii, jakaja zajmaje druhoje miesca (1119), i ŭ Kosava, što raźmiaściłasia na trecim miescy ŭ śpisie z 980 vypadkami kavidu na miljon žycharoŭ.
Mahčyma, što takija vialikija ličby zaražeńniaŭ źviazanyja z pašyreńniem teściravańnia na kavid u suviazi z adkryćciom škoł u Izraili. Ale vysokuju kolkaść zachvorvańniaŭ u krainie pačali rehistravać jašče ŭ siaredzinie žniŭnia, pry hetym Izrail — adzin z suśvietnych lidaraŭ pa vakcynacyi, źviartaje ŭvahu Daily Mail.
Vierahodnaja pryčyna novaj chvali kavidu — raspaŭsiud štama «delta», jaki vielmi lohka pieradajecca. Vakcyny abaraniajuć ad hetaha štama mienš, čym ad astatnich varyjantaŭ virusa. Ale vakcyny ŭsio-taki abaraniajuć ad ciažkaj formy chvaroby.
Pačynajučy ź lipienia Izrail vakcynuje dadatkovaj dozaj pryščepki ludziej ad 60 hadoŭ, i jość infarmacyja, što heta dapamahaje źnizić kolkaść pacyjentaŭ z kavidam u špitalach. Tamu ŭrad pašyryŭ prahramu vakcynacyi na ŭsich hramadzian krainy, starejšych za 12 hadoŭ.
Kamientary