«My vierniemsia. Słuchajcie našuju muzyku». Što pišuć zatrymanyja muzyki Irdorath
Lidery fentezi-folk-hurtu Irdorath Uładzimier i Nadzieja Kałač napisali pieršyja listy svajakam. Jany pieražyvajuć za svaich hadavancaŭ Mišku i Płotku, raskazvajuć pra ščaślivyja momanty ŭ turmie i prosiać słuchać ichnuju muzyku, piša Svaboda.
2 žniŭnia 2021 hodu muzykaŭ fentezi-folk-hurtu Irdorath zatrymali sa stralaninaj na leciščy pad Mienskam. Šaścioch zatrymanych padazrajuć u «arhanizacyi dziejańniaŭ, jakija hruba parušajuć hramadzki paradak, ci ŭdziele ŭ ich» — za vystupy padčas masavych pratestavych šeściaŭ u Miensku ŭ žniŭni 2020 hodu.
Uładzimier planuje čytać pa-niamiecku, čakaje listoŭ
Uładzimier i Nadzieja Kałačy — muž i žonka. Rodnaja siastra Ŭładzimiera Valancina raskazała, pra što muzyki napisali siamji ŭ pieršych listach z-za krataŭ.
Pieršyja dva listy, jakija pryjšli ad Uładzimiera, datavanyja 15 i 19 žniŭnia.
«Vova piša, što pieražyŭ sapraŭdny šok ad taho, što adbyłosia, ale pacichu pryvykaje da hetaha novaha žyćcia», — kaža siastra muzykanta.
Doŭhi čas mužčyna vinavaciŭ siabie ŭ tym, što siabroŭ zatrymali na dni naradžeńnia žonki, asabliva chvalavaŭsia za samu Nadzieju. Adaptavacca da turmy jamu dapamahli sukamerniki, supakojvajuć jaho i ŭsialak dapamahajuć. Stan zdaroŭja dudara dobry.
«Pieršaje, što zrabiŭ, napisaŭ na kubku Irdorath, i vyjaviłasia, što navat u kamery jość ludzi, jakija nas viedajuć i pavažajuć, a adzin navat zachaplajecca tym, što my robim», — napisaŭ u liście Ŭładzimier.
Na «Vaładarcy» na muzyku najbolšaje ŭražańnie zrabiła pieršaja prahułka: nieba, sonca, pavietra i niekalki travinak na cehle. Viazień zamoviŭ knihi na niamieckaj movie ŭ biblijatecy i planuje čytać.
«Kali viali kalidoram, jon bačyŭ Nadziu i Julu, i Piatra z Antonam (inšyja udzielniki hurtu. — RS), zdoleli navat sustrecca pozirkami. Heta byŭ samy ščaślivy momant», — pierakazvaje Valancina.
Listy pakul jamu prychodziać tolki ad maci. Jon vielmi čakaje pasłańniaŭ z voli.
Nadzieja: «Abdymicie adno adnoha za nas»
Nadzieja Kałač napisała list 22 žniŭnia. Pieršaje, što kidajecca ŭ vočy na im, — heta partret muža Ŭładzimiera. Žančyna napisała list, najpierš kab supakoić svajakoŭ, što ŭsie ŭmovy stanoviacca ciarpimymi i jana ŭ biaśpiecy.
«Jana vielmi pieražyvaje, što hetaja sytuacyja pryniesła vielmi vialiki stres nam, našaj vialikaj siamji (u siamji Kałačoŭ 4 braty i siastra, Uładzimier adzin ź ich. — RS), bo viedaje, jakija my zaŭždy zhurtavanyja, jak my pieražyvajem», — pieradaje Valancina.
Nadzieja piša, što nie źbirajecca «raskisać». Kaža, što ŭ turmie dobraja biblijateka, planuje čytać. Listoŭ jana pakul nie atrymlivała, tamu vielmi ich čakaje.
Sužency chvalujucca za svaich hadavancaŭ sabaku Mišku i kotku Płotku, jakich ciapier hladziać svajaki. Dziaciej u siamji pakul niama.
«Što by ni zdaryłasia, u budučyni my vierniemsia. I našaja luboŭ adno da adnoha, da vas, da mastactva, da našych chłopcaŭ, da siabroŭ, da žyćcia nikudy nie padzieniecca. Abdymicie adno adnoha za nas. Nu i słuchajcie časam našuju muzyku, chaj jana žyvie zvonku», — napisała Nadzieja.
Kamientary