Zasnavalnik biełaruskaha brenda adzieńnia Honar Pavieł Doŭnar vykłaŭ u fejsbuku papieru ab zabaronie na prodaž myła ručnoj pracy Karali. Pradpisańnie pryjšło ź Dziaržstandartu, što ciapier pravodzić pravierku tavaru ŭ majsterni Honar.
U zahadzie skazana, što z 14 maja da 30 červienia 2021 hoda zabaraniajecca realizacyja šlachietnaha myła ručnoj pracy handlovaj marki Karali (vytvorca — TAA «Šlachietnyja vyraby» ŭ Vałožynskim rajonie). Pieraličvajecca tualetnaje myła «Zorka Vieniera», «Vałoški», «Vilenskaje baroka», «Čystaje — Śvietłaje», piša Tut.by.
— Heta adzin z vynikaŭ pravierki, jakuju ciapier pravodzić u nas Dziaržstandart. Jana budzie doŭžycca da 28 maja, — raspavioŭ Pavieł Doŭnar. — Jość zaŭvahi jašče pa niekalkich tavarach, ale pa ich dajecca čas na likvidacyju pretenzij. Usiaho na pravierku zabrali kala 20 pazicyj tavaraŭ.
Pavieł Doŭnar adznačyŭ, što Honar pradavaŭ hetaje myła z 2019 hoda, pretenzij da jaho nie było.
— Pry myle — poŭny pakiet dakumientaŭ. Jak nam rastłumačyli, ciapier anulavany dakumient ab jaho adpaviednaści z zakanadaŭstvam Mytnaha sajuza. Pa słovach praviarajučych, ja pavinien viarnuć heta myła vytvorcu — ale pakul z dyrektaram źviazacca nie mahu, nakolki ja viedaju, jon nie ŭ krainie.
Miarkujučy pa poŭnaj viersii pradpisańnia, Dziaržstandart znajšoŭ na ŭpakoŭcy myła niejkija nieadpaviednaści patrabavańniam biaśpieki ŭ častcy markiroŭki (techrehłamient Mytnaha sajuza 009/2011 «Ab biaśpiecy parfumierna-kaśmietyčnaj pradukcyi»).
Z dakumienta jasna, što zabaronu mohuć źniać, kali parušeńni likvidujuć da 28 červienia.
Za nievykanańnie pradpisańnia dla pradaŭca praduhledžana administracyjnaja adkaznaść pa art. 24.1 (Nievykanańnie piśmovaha patrabavańni) i č. 1 art. 24.7 (Parušeńnie patrabavańniaŭ zakanadaŭstva ab acency adpaviednaści techničnym patrabavańniam) KaAP.
Z pradstaŭnikami Karali žurnalistam pakul nie ŭdałosia źviazacca.
U 2014 hodzie Tut.by raspaviadaŭ historyju pra biełarusaŭ, jakija viarnulisia z-za miažy dadomu i stali rabić niezvyčajnaje kraftavaje myła. Zasnavalnik brenda Sierž Naŭrodski raspaviadaŭ, što jaho nie pałochajuć mahčymyja ciažkaści pracy ŭ Biełarusi.
— My sutyknulisia ź imi ź pieršaha dnia. Viadoma, zapał moža astyć, ale my nikoli nie paškadujem, što zadumali heta.
Ciapier čytajuć
U vice-śpikierki Kaardynacyjnaj rady Lizaviety Prakopčyk sabrałasia $12 tysiač daŭhoŭ87
Kamientary