Revalucyja ŭ futbole — «MIU», «Reał», «Barsiełona», «Juvientus» i jašče 8 kłubaŭ stvaryli Supierlihu

«Dvanaccać viadučych kamand Jeŭropy siońnia sumiesna pryjšli da damoŭlenaści ab stvareńni novaha turniru — Jeŭrapiejskaj Supierlihi. Matčy buduć pravodzicca pasiarod tydnia, kiravać turniram buduć kłuby-zasnavalniki.

«Miłan», «Arsienał», «Atletyka», «Čełsi», «Barsiełona», «Inter», «Juvientus», «Livierpul», «Mančestar Sici», «Mančestar Junajted», «Reał» i «Totenchem» buduć u Supierlizie jak kłuby-zasnavalniki. Jašče try kamandy dałučacca da jaje pierad pačatkam pieršaha siezona (mahčyma, «Bavaryja», «Lejpcyh», «Portu»).

Kłuby-zasnavalniki płanujuć abmierkavać z UEFA i FIFA sumiesnaje supracoŭnictva, kab zabiaśpiečyć najlepšyja pierśpiektyvy jak dla novaha turniru, tak i dla futboła ŭ cełym.

Stvareńnie Supierlihi adbyvajecca ŭ pieryjad, kali pandemija paskoryła niaŭstojlivaść isnujučaj u jeŭrapiejskim futbole ekanamičnaj madeli. Akramia taho, kłuby-zasnavalniki ŭžo niekalki hadoŭ stavili pierad saboj za metu pavysić jakaść i ščylnaść isnujučych jeŭrapiejskich spabornictvaŭ kožny siezon, a taksama stvaryć farmat, u jakim viadučyja kamandy i futbalisty buduć spaborničać adzin z adnym na rehularnaj asnovie», - havorycca ŭ pres-relizie.

UEFA, darečy, pahražaje finansavymi sankcyjami suprać hetych kłubaŭ, a taksama zajaŭlaje, što moža vyklučyć ich z turniraŭ u hetym siezonie. Atrymlivajecca, što tady Lihu čempijonaŭ u hetym siezonie vyjhraje PSŽ, bo inšyja ŭdzielniki paŭfinałaŭ — «ManSici», «Reał» i «Čełsi» — buduć dyskvalifikavanyja.

Siońnia vykankam UEFA pavinien byŭ zaćvierdzić novy farmat Lihi čempijonaŭ, jaki ŭstupić u siłu paśla 2024 hoda. Heta pavieličeńnie kolkaści ŭdzielnikaŭ da 36 kamand, šviejcarskaja sistema rozyhryšu, kali kožny kłub budzie pravodzić na hrupavym etapie 10 matčaŭ, i hetak dalej. Šerah top-kłubaŭ takaja reforma nie zadavalniała.

Taksama źjavilisia čutki, što siońnia UEFA moža prypynić matčy Lihi čempijonaŭ i Lihi Jeŭropy ŭ hetym siezonie. Ale heta małavierahodna.

Jaki budzie farmat Supierlihi i kali jana startuje?

U turniry buduć udzielničać 20 kłubaŭ — 15 pastajannych členaŭ i jašče piać kamand, jakija buduć vyznačacca na padstavie vynikaŭ papiaredniaha siezona, piša Sport-Ekspres

Kłuby buduć raźbityja na dźvie hrupy pa 10 kamandaŭ, jakija zhulajuć dvuchkruhavy turnir. Pa try najlepšyja vyjduć napramuju ŭ čverćfinał, kamandy, jakija zaniali 4-je i 5-je miescy, praviaduć stykavyja matčy. Dalej — tradycyjny płej-of, matčy doma i ŭ haściach. Finał — adna hulnia na niejtralnym poli.

Matčy buduć prachodzić u siaredzinie tydnia, udzielniki praciahnuć hulać u svaich nacyjanalnych čempijanatach.

Arhanizatary zapeŭnivajuć, što pieršy siezon Supierlihi startuje ŭžo ŭ žniŭni hetaha hoda.

Varta adznačyć, što na biełaruskija kłuby hetyja navacyi nijak nie ŭpłyvajuć.

• 0
• 0
• 0
• 0
• 0
• 0
• 0
• 0