Adbyłosia heta ŭ ramkach placoŭki «Dyjałohi pra važnaje». Jaje zasnavalnicaj stała Natalla Trafimava — buchhałtar, jakaja choča, kab u Biełarusi byŭ «mir i spakoj».
Trafimava prytrymlivajecca praŭładnych pohladaŭ, ale ličyć nieabchodnymi dyskusii ź ludźmi roznych palityčnych pohladaŭ.
Heta ŭžo druhaja sustreča na jaje placoŭcy. Pieršy raz apazicyju pradstaŭlaŭ Illa Dabratvor, aktyvist Partyi BNF i žurnalist-fryłansier. Ciapier ža zaprasili kiraŭnika «Havary praŭdu» Andreja Dźmitryjeva, ekanamista Jarasłava Ramančuka, a taksama inviestara Valeryja Astrynskaha, jaki źjaŭlajecca delehatam «Schodu» pa Iŭjeŭskim rajonie.
Pra što ž išła razmova na sustrečy? «Arhanizatary ličać, što treba razmaŭlać, — kaža Andrej Dźmitryjeŭ. — Źviarnulisia da mianie, ci hatovy ja paŭdzielničać. Napisali mnie śpis udzielnikaŭ, ja skazaŭ, što hatovy».
Z procilehłaha boku byŭ dekan fakulteta fiłasofii i sacyjalnych navuk BDU Vadzim Hihin, analityk Alaksiej Aŭdonin, a taksama pradstaŭnik aficyjnych prafsajuzaŭ Dźmitryj Švajba.
«Temaj byli ekanomika i pratesty. Nijakaj premaderacyi nie było, nie stavili ŭmovy, što kazać, a što nie. Sustreča adbyvałasia ŭ aktavaj zale MITSO, na sustreču pryjšło čałaviek piaćdziasiat. Toj bok adstojvaŭ pazicyju, što ŭ nas usio dobra abo, prynamsi, nie horš, čym u astatnich. A pratesty — heta byŭ miaciež, jaki, dziakuj bohu, udałosia zadušyć. Naša pazicyja supraćlehłaja. My kazali, što ciapier u ekanomicy vielmi ciažkija časy, prymajucca rašeńni, jakija prymušajuć ludziej adsiul źjazdžać, zakryvać biznes. My ž bačym, što ŭsio mienš ludziej adkryvajuć IP», — kaža Dźmitryjeŭ.
Dalej havorka zajšła pra pratesty. «Hałoŭnym inviestaram pratestaŭ stała sama ŭłada, jakaja z pahardaj stavicca da ludziej. Toje, što ciapier adbyvajecca, heta nie tolki pra palityku, ale i pra bazavyja čałaviečyja kaštoŭnaści. Dyskusija była dobraj. Telekanału «BiełRos» ja skazaŭ, što takija sprečki pavinny być štodnia na nacyjanalnych kanałach, dzie my mahli b kazać praŭdu i adstojvać svaje pazicyi».
Ci kličuć ciapier Dźmitryjeva na TB? «Nie, apošni raz klikali 9 vieraśnia. Pabačyli maju pazicyju i zrazumieli, što bolš klikać nie buduć. Ciapier tam apazicyjaj vystupaje Vaskrasienski. Hetaja ž sprečka pakazvaje, što navat ludzi na tym baku, kali jany trošku dumajuć, to razumiejuć, što padzieł hramadstva vielmi niebiaśpiečny i treba ŭsim razmaŭlać».
Kamientary