Dvoje žycharoŭ Bresta atrymali pa try hady kałonii za supraciŭ milicyi 9 žniŭnia
25-hadovy Alaksandr atrymaŭ 3,5 hoda pazbaŭleńnia voli. 32-hadovamu Michaiłu pryznačyli 3 hady kałonii. Pakarańnie jany buduć adbyvać u kałonii ahulnaha režymu. Prysud nie ŭstupiŭ u zakonnuju siłu i moža być abskardžany, piša Tut.by.
Abodva abvinavačanyja raniej nie byli sudzimyja, pracujuć, chałastyja. Pavodle viersii abvinavačvańnia, jany akazali «supraciŭ supracoŭnikam orhanaŭ unutranych spraŭ padčas akcyi pratestu 9 žniŭnia, źviazany z užyvańniem hvałtu abo pahrozaj jaho prymianieńnia».
Paciarpiełyja — dva supracoŭniki adździeła ŭnutranych spraŭ. Na sudzie pakazańni jany davali źmienienymi hałasami z pakoja abarony śviedak. U dzień vybaraŭ jany byli na słužbie i «znachodzilisia ŭ hrupie vyniaćcia ahresiŭnych ludziej z natoŭpu». Adzin z paciarpiełych atrymaŭ traŭmu nahi, dva dni nakulhvaŭ, u jaho ŭtvaryłasia hiematoma i pabolvała vucha. Da inšaha hvałt nie ŭžyvaŭsia — havorka išła tolki pra pahrozu.
Na sudzie abvinavačvany Alaksandr raspavioŭ, što ŭviečary 9 žniŭnia jon viartaŭsia dadomu z ofisa na vulicy Budzionaha i kala CUMa ubačyŭ vialiki natoŭp ludziej. Zaŭvažyŭšy tam znajomych i zacikaviŭšysia, jon pajšoŭ razam z natoŭpam. Kala SŠ №15 šeście spyniłasia, darohu jamu zastupili supracoŭniki milicyi sa ščytami, čałaviek 50.
Pa raskazach Alaksandra, u natoŭpie ludziej jon raspaznaŭ ahresaraŭ, pabieh da ich i pasprabavaŭ ich supakoić, a kali viarnuŭsia na svajo raniejšaje miesca, to ŭbačyŭ, što pamiž «ludźmi ŭ čornym» (heta byli supracoŭniki milicyi) i cyvilnymi pačałasia bojka.
«U toj momant ja nie zdavaŭ sabie spravy, što ja rablu», — pryznaŭsia na sudzie Alaksandr i dadaŭ, što chacieŭ spynić bojku, ale ŭ vyniku trapiŭ nahoj supracoŭniku prosta ŭ ściahno.
Svaju vinu ŭ zroblenym mužčyna na sudzie całkam pryznaŭ i skazaŭ, što raskajvajecca.
Druhi abvinavačany — Michaił — pryznaŭ vinu tolki častkova. Pavodle jaho słoŭ, 9 žniŭnia jon akazaŭsia ŭ centry Bresta padčas viełaprahułki. Pryparkavać rovar kala haścinicy «Inturyst» i dałučycca da natoŭpu pratestoŭcaŭ jaho vymusiŭ pierakryty ŭ centry horada ruch.
Kali mienavita i jakim čynam jon zamachnuŭsia na supracoŭnika milicyi, mužčyna tołkam nie zrazumieŭ. Ale toje, što taki fakt byŭ, u sudzie jon nie admaŭlaŭ: hety momant jamu pakazali na videa. Praŭda, sam ŭdar mety nie dasiahnuŭ. A tamu mužčyna vinu pryznaŭ častkova: prymianieńnia hvałtu nie było, była tolki jaho pahroza.
Kamientary