Ideja sienatara Siŭca — štrafavać za kožny bieł-čyrvona-bieły ściah na 135 rubloŭ

Člen Savieta Respubliki Siarhiej Siviec unios prapanovu pa źmienach u Kodeks ab administracyjnych pravaparušeńniach. Faktyčna Siviec prapanuje zabaranić usiu «niezarehistravanuju» simvoliku. Pad zabaronu trapić i bieł-čyrvona-bieły ściah.

Pavialičyć

Siviec asabliva i nie chavaje, što jahonyja idei źviazanyja z «hramadska-palityčnaj situacyjaj u krainie». «Uviadzieńnie takoj normy pradyktavana abjektyŭnaj nieabchodnaściu zabieśpiačeńnia efiektyŭnaha abarončaha miechanizmu dla supraćdziejańnia destruktyŭna nastrojenym asobam, jakija majuć na mecie destabilizavać situacyju ŭnutry krainy», — havorycca ŭ prapanovie Siŭca.

Jasna, što naŭrad ci heta zakranie jakich-niebudź fanataŭ «Zornych vojnaŭ» ci «Hary Potera», jakija zachočuć vydumać svoj ściah, ci firmy, što pobač z ofisami vyviešvajuć ściah kampanii. Havorka viadziecca pra ściahi, jakija vykarystoŭvajucca na palityčnych mierapryjemstvach.

Pavialičyć

Siviec ličyć nieabchodnym karać vytvorcaŭ niezarehistravanych ściahoŭ i ludziej, jakija imi karystajucca, na sumu ad 5 da 20 bazavych vieličyń (135-540 rubloŭ). Kožny paŭtorny vypadak — 260-1080 rubloŭ.

Pryčym «sienatar» choča hetym spynić źmiaščeńnie niezarehistravanaj simvoliki na adzieńni i navat na čachłach telefona.

Juryst Juryj Čavusaŭ kaža, što na siońnia ŭ Biełarusi zabaronienaj źjaŭlajecca tolki nacysckaja simvolika, a taksama źviazanaja ź joj. Bieł-čyrvona-bieły ściah pad zabaronu, naturalna, nie traplaje.

«Pakolki bieł-čyrvona-bieły ściah staŭ ściaham usieahulnaha pratestu, a nie tolki nacyjanalna aryjentavanych palityčnych siłaŭ, to ŭ pravaachoŭnych orhanaŭ paŭstała pytańnie vykarystańnia ściaha pryvatnymi asobami. Heta nie źjaŭlajecca zabaronienym i nie padpadaje ni pad jakija artykuły. Hetaksama i ludzi, jakija prydumlajuć ściahi mikrarajonaŭ, nie robiać ničoha zabaronienaha. Ludzi majuć poŭnaje prava vyviešvać ściahi na bałkonach, źmiaščać ich na majkach», — tłumačyć Čavusaŭ.

Adzinaja zabarona na vykarystańnie niezarehistravanaj simvoliki datyčyć masavych akcyj. U zakonie prapisana, što padčas takich mierapryjemstvaŭ možna karystacca tolki zarehistravanymi simvałami. Ale nijakich dadatkovych pratakołaŭ i dadatkovaj adkaznaści być nie pavinna, bo hetyja dziejańni ŭsio adno traplajuć pad sumnaviadomy artykuł KaAP 23.34 «Parušeńnie paradku arhanizacyi ci praviadzieńnia masavych mierapryjemstvaŭ».

«U nas dazvolena ŭsio, što nie zabaroniena — tamu vykarystańnie ściaha zakonnaje. Valuntaryscki zahad režymu zdymać bieł-čyrvonyja ściahi sutyknuŭsia z pravavym nieabhruntavańniem, niama zakona, jaki zabaraniaje vykarystoŭvać bieł-čyrvona-biełyja ściahi. Pravavych miechanizmaŭ niama, chacia da ludziej usio adno ŭryvajucca ŭ kvatery, vyklikajuć ratavalnikaŭ. Prapanova Siŭca nie maje ničoha ahulnaha sa svabodaj słova, mierkavańniaŭ — heta tam navat nie ŭličvajecca. Surjoznuju pravavuju inicyjatyvu ja tut nie baču. Choć u ciapierašnich umovach nie treba ździŭlacca, kali takoje budzie pryniata», — ličyć Juryj Čavusaŭ.

Juryst kaža, što ŭžo doŭhi čas viadziecca hramadskaje abmierkavańnie novaj redakcyi Kodeksa ab administracyjnych pravaparušeńniach, ale pytańnie niezarehistravanaj simvoliki nikoli nie ŭzdymałasia: «Pytańnie zabarony ściahoŭ turbuje nie hramadstva, a asobnych palityčnych dziejačaŭ».

Siarhieju Siŭcu 47 hadoŭ, jon rodam ź Minska. Kandydat jurydyčnych navuk, dacent. Pracavaŭ vykładčykam kanstytucyjnaha prava na jurfaku BDU, namieśnikam dyrektara Instytuta pravavych daśledavańniaŭ.

U pieršyja dni paśla vybaraŭ Siviec zaklikaŭ moładź nie iści za «palityčnymi intryhanami». «Nielha addavać ni siekundy, ni chviliny svajho žyćcia va ŭhodu im», — ličyć Siviec.

Pavialičyć

Paźniej jon dadavaŭ jašče farbaŭ: «Ludzi vychodziać na mitynhi, płoščy nie samastojna — heta vidavočna. Vychodziać zychodziačy z taho, što atrymana takaja ŭstanoŭka vyjści i pasprabavać razhajdać našu hramadskuju zhodu».

Apošnimi ž dniami Siviec zakłapaciŭsia falsifikacyjami historyj Biełarusi i Rasii, «źmianšeńniu roli savieckaha naroda ŭ pieramozie nad nacyzmam».

U toj čas jak mnohija kalehi pa Pałacie pradstaŭnikoŭ i Saviecie Respubliki ličać za lepšaje ŭ takija dni prynamsi pamaŭčać, Siviec pryciahvaje da siabie ŭvahu.

• 0
• 0
• 0
• 0
• 0
• 0
• 0
• 0