Historyk Sahanovič adkazaŭ Daniłoviču: U biełarusaŭ niama bolš histaryčnaha i nacyjanalnaha ściaha, čym bieł-čyrvona-bieły
«Učora ŭviečary, kali BT sprabavała pavučyć nas historyi (a ŭ sapraŭdnaści — dyskredytavać u vačach niedaśviedčanych hledačoŭ nacyjanalny biełaruski ściah), ekśpiertam u ich vystupiŭ V. Daniłovič, ciapierašni dyrektar akademičnaha Instytuta historyi, — napisaŭ u svaim fejsbuku doktar histaryčnych navuk Hienadź Sahanovič.
Moža i nie źviarnuŭ by ŭvahi, kali b nie hetaja akaličnaść. Čynoŭnik ad historyi ŭźniaŭ zajezdžanuju temu kałabaracyi i dahavaryŭsia voś da jakoha absurdu: maŭlaŭ, pakolki ŭ hady II Suśvietnaj vajny bieł-čyrvona-bieły ściah vykarystoŭvali kałabaracyjanisty, to «połučajetsia» (tak u Daniłoviča), što hety ściah i ciapier «hovorit o tom, čto nado dvihaťsia k kakomu-to protiektoratu s kakoj-to vniešniej storony» (?!).
Nie ŭvachodziačy ŭ hłybiejšuju historyju ściaha i nie kranajučy prablemy kałabaracyi dy charaktaru toj vajny (vyjšła ŭžo niamała hłybokich daśledavańniaŭ, u jakich raźviančany saviecki mif Vialikaj Ajčynnaj), chacieŭ by supakoić Daniłoviča.
U tyja hady nie tolki ŭ inšych savieckich respublikach, a peŭna ŭ kožnaj akupavanaj nacystami krainie taksama vykarystoŭvałasia nacyjanalnaja simvolika, i nivodzin narod nie adrakaŭsia ad jaje, nie admaŭlaŭsia ad svajoj historyi na hetaj padstavie!
U biełarusaŭ niama bolš histaryčnaha i bolš nacyjanalnaha ściaha za bieł-čyrvona-bieły! Zdajecca, nie tolki historyku, a lubomu čałavieku z histaryčnaj śviadomaściu treba było b radavacca, što ŭ dni samych masavych pratestaŭ suprać falšu i hvałtu jon tak naturalna viarnuŭsia da naroda.
Tamu adčuvaješ ahidu, kali dyrektar akademičnaj ustanovy, jakaja pavinna padavać prykłady aściarožnaha i abjektyŭnaha padychodu da minułaha, apuskajecca da padobnych pryjomaŭ palityčnaj manipulacyi. A sumlennym kaleham, sapraŭdnym prafiesijanałam svajoj spravy, jakim davodzicca tam pracavać, jašče bolš pavahi!
Kamientary