Davieranuju asobu Cichanoŭskaj vypuścili z homielskaha suda i znoŭ zatrymali
Sud Savieckaha rajonu Homla 10 žniŭnia razhladaŭ administracyjnyja pratakoły na Tacianu Kanieŭskuju, davieranuju asobu Śviatłany Cichanoŭskaj. Taksama sudzili kaardynatara kampanii «Prava vybaru» Vasila Palakova, piša Svaboda.
Ich zatrymali 8 žniŭnia. I Palakova, i Kanieŭskuju abvinavacili ŭ drobnym chulihanstvie i niepadparadkavańni supracoŭnikam milicyi. Pavodle milicyjantaŭ, Kanieŭskaja 8 žniŭnia «hučna kryčała, razmachvała rukami, čym parušyła hramadzki paradak». Jana nibyta nie reahavała na zaŭvahi milicyi.
Kanieŭskaja nie pryznała svajoj viny. Sud adpraviŭ spravu na dapracoŭku pa artykule 23.4 — niepadparadkavańnie. Taksama sud źviarnuŭ uvahu, što žančyna maje niepaŭnaletniaha syna. Pavodle zakanadaŭstva, takija žančyny nie padlahajuć administracyjnamu aryštu.
Kanieŭskuju adpuścili, jana pajšła zabrać rečy ź milicejskaha aŭtamabila i źnikła.
«Pajechali ŭ Saviecki RAUS pisać zajavu na jaje źniknieńnie, i tam nam paviedamili, što jaje znoŭ zatrymali, jana ŭ izalatary časovaha ŭtrymańnia», — paviedamiŭ syn Taciany Kanieŭskaj.
Vasila Palakova pavodle dvuch artykułaŭ KaAP pakarali aryštam na 10 sodniaŭ. Milicyja napisała ŭ pratakole, što jon «mačyŭsia ŭ hramadzkim miescy i na zaŭvahi milicyi nie reahavaŭ». Palakoŭ viny nie pryznaŭ.
Kamientary