SAAZ zapuściła suśvietnyja vyprabavańni čatyroch pierśpiektyŭnych preparataŭ ad karanavirusa

U piatnicu, 20 sakavika, Suśvietnaja arhanizacyja achovy zdaroŭja abviaściła pra pačatak hłabalnych vyprabavańniaŭ «Salidarnaść», zaklikanych znajści leki ad zachvorvańnia, vyklikanaha karanavirusam. U testach voźmuć udzieł tysiačy pacyjentaŭ ź dziasiatka krain — raniej takoha nie było nidzie i nikoli. Pra heta sa spasyłkaj Science piša TUT.BY.

Što za vyprabavańni

Preparaty, zadziejničanyja ŭ «Salidarnaści», nie pryjdziecca raspracoŭvać z nula: jany ŭžo adobrany dla lačeńnia inšych zachvorvańniaŭ abo pratestavany dla lačeńnia inšych karanavirusaŭ (SARS i MERS) na žyviołach.

U vypadku pośpiechu preparaty zmohuć nie tolki vyratavać žyćcio ciažkachvorym, ale i pasłužyć prafiłaktyčnymi srodkami dla taho, kab zaścierahčy hrupy ryzyki i miedrabotnikaŭ. Usiaho SAAZ adabrała čatyry vidy lekaŭ ź dziesiatkaŭ prapanavanych:

• ekśpierymientalny supraćvirusny preparat «Remdesivir»,
• leki ad malaryi «Chłarachin» i «Hidrvksichłarachin»,
• kambinavany preparat suprać VIČ «Łapinavir» i «Rytanavir»,
• tyja ž samyja «Łapinavir» i «Rytanavir», ale ŭ kambinacyi ź interfieronam-beta (infarmacyjnaja RNK imunnaj sistemy).

Jak buduć pravodzicca testy

Paśla taho jak pacyjent z karanavirusam projdzie adbor, lekar ŭvodzić jaho danyja na sajcie SAAZ, uklučajučy anamniez, zdolny paŭpłyvać na ciačeńnie «asnoŭnaj chvaroby», naprykład: VIČ abo dyjabiet. Pacyjent padpisvaje zhodu na adpraŭku infarmacyi pra siabie ŭ SAAZ. Zatym lekar paviedamlaje, jakija leki jość u jaho balnicy, i chvoramu pryznačajucca adny ź ich.

Zatym pacyjent prachodzić kurs lačeńnia. Lekar adznačaje dzień, kali chvory vypisaŭsia abo pamior, kolki jon byŭ u špitali i ci patrabavałasia jamu štučnaja vientylacyja lohkich abo kisłarod. Nijakich inšych vymiareńniaŭ abo dakumientacyi nie patrabujecca.

Mietodyka ŭraźlivaja ŭ tym płanie, što nie vykarystoŭvaje dvajny ślapy mietad i moža supravadžacca efiektam płaceba: chvoryja viedajuć, što atrymlivajuć pierśpiektyŭny preparat. Adnak navukovaj strohaściu pryjšłosia achviaravać — apieratyŭnaść važniejšaja.

Voś karotkaje apisańnie ŭsich zadziejničanych u daśledavańniach preparataŭ

«Remdesivir»

Leki byli raspracavany dla baraćby ź lichamankaj Eboła i padobnymi virusami. «Remdesivir» spyniaje replikacyju virusa, dušačy RNK-palimierazu, jakaja źjaŭlajecca klučavym virusnym fiermientam. Padčas uspyški Eboły ŭ Demakratyčnaj respublicy Konha jaho vypraboŭvali razam ź inšymi preparatami, i jon akazaŭsia nieefiektyŭny, adnak «Remdesivir» nakiravany na fiermient, charakterny dla karanavirusaŭ i tamu moža być efiektyŭny tut. Niekalki pacyjentaŭ z ZŠA, uklučajučy samaha pieršaha zachvarełaha ŭ krainie, užo vylečylisia ad karanavirusa, užyvajučy mienavita hety srodak.

«Chłarachin» i «Hidraksichłarachin»

Hetyja supraćmalaryjnyja preparaty nazvaŭ «kardynalnym pierałomam» u baraćbie z chvarobaj Donald Tramp. Pieršapačatkova ŭ SAAZ chacieli vyklučyć ich sa śpisu, ale potym pieradumali. Leki pracujuć za košt źnižeńnia kisłotnaści ŭ endasomach, jakija dazvalajuć virusam pranikać u kletki. Adnak u SARS-Cov-2 jość i inšyja šlachi apynucca ŭnutry kletak, vykarystoŭvajučy tak zvany šypapadobny białok. Tym nie mienš «Chłarachin» i «Hidraksichłarachin» prajaŭlajuć da karanavirusa niekatoruju aktyŭnaść, ale ŭ vialikich dozach preparaty taksičnyja i majuć pabočnyja efiekty.

«Łapinavir» / «Rytanavir»

Kambinavany preparat byŭ pieršapačatkova zrobleny dla baraćby ź VIČ-infiekcyjaj i raspracavany dla padaŭleńnia prateazy VIČ. Pry hetym «Łapinavir» rasščaplajecca ŭ arhaniźmie čałavieka jaho ŭłasnymi prateazami, i dla ŭstojlivaści jaho prymajuć razam z «Rytanaviram».

Leki mohuć dušyć prateazu i inšyja virusy, uklučajučy karanavirusy. Tak, śćviardžajecca, što dośledy na małpach z MERS i pacyjentach z SARS dali niekatory vynik. Zrešty, pieršyja vyniki pracy preparatu suprać COVID-19 asabliva nie abnadziejvajuć. Lekary z Uchani ŭziali 199 pacyjentaŭ, padzialili na dźvie hrupy i davali adnoj ź ich pa dźvie tabletki «Łapinaviru» / «Rytanaviru», a astatnim pacyjentam prapisali standartnaje lačeńnie. Adnak, jak paviedamiŭ miedycynski časopis Novaj Anhlii 15 sakavika, asablivaj roźnicy pamiž hrupami nie vyjaŭlena. Ale pacyjenty byli ciažka chvoryja, śmiarotnaść skłała kala 20%, tak što ź lačeńniem, mahčyma, prosta zapaźnilisia.

«Łapinavir» / «Rytanavir» + interfieron-beta

Interfieron-beta kantraluje zapalenčyja pracesy ŭ arhaniźmie i taksama moža być efiektyŭnym u spałučeńni z vyšejapisanymi lekami. Śćviardžajecca, što preparaty ŭ kompleksie dali efiekt na małpach z MERS, a ciapier pravodziacca testy na pacyjentach z MERS u Saudaŭskaj Aravii — heta pieršaje randamizavanaje kantralavanaje daśledavańnie pa hetym karanavirusie. Adnak preparat nie padychodzić dla lačeńnia ciažka chvorych.

Dla nadziejnaści vynikaŭ, bo adsutničaje dvajny ślapy mietad, spatrebicca nie mienš za niekalki tysiač pacyjentaŭ: užo ŭdzielničajuć miedustanovy Arhienciny, Irana, Paŭdniovaj Afryki i inšych niejeŭrapiejskich krain. Pa toj ža schiemie SAAZ, mahčyma, praviadzie vyprabavańni dla abarony ad virusa rabotnikaŭ achovy zdaroŭja.

• 0
• 0
• 0
• 0
• 0
• 0
• 0
• 0