U sieryi «Biełaruskija falkłornyja archivy» vyjšła padborka piesień ź vioski Ciachcin Białynickaha rajona
Hetaja składanka naradziłasia ź piaščoty da žančyn, jakija i siońnia žyvuć u vioscy Ciachcin, što ŭ Białynickim rajonie. My paznajomilisia ŭ 2011 hodzie. Tady, robiačy zapisy na prościeńki dyktafon, ja mała ciamiła ŭ tradycyjnym śpievie, zapisvała, bo raniej takoha nie čuła i razumieła redkaść momantu. My praviali razam niekalki hadzin, było viesieła i ŭtulna, by ŭ kampanii starych siabroŭ. Hetyja ludzi ŭmiejuć być dobrymi i ščyrymi. Adčuvajuć pryhožaje i šanujuć byłoje. Pierastvarajuć jaho praŭdziva, dziela radaści i niejkaha ahulnaha paradku ŭ śviecie.
U Ciachcinie śpiavali zdaŭna, a naprykancy 80-ch utvaryŭsia vialiki śpieŭny hurt. Tudy ŭvajšli žančyny roznych hadoŭ i prafiesij, śpiavali svajo, pieraniataje ad starejšych svajakoŭ i adnaviaskoŭcaŭ. Siońnia hurta niama. Ale pieśni zastalisia.
Asabliva chočacca raskazać pra Jefrasińniu Maksimaŭnu Bujmistravu.
Maleńkaja žančyna, pa-vuličnamu prosta «Prosia», pražyła składanaje žyćcio: paślavajennaja haleča, niemahčymaść chadzić u škołu, bo «niama ŭ čym», mary źjechać na calinu. Potym było zamužža i čaćviora dziaciej. Joj i siońnia vielmi niaprosta. Mahčyma, śpieŭ robić hetaje byćcio trošku bolš radasnym.
Jefrasińnia Maksimaŭna śpiavaje ź dziacinstva, «što dzie čuła — to i ciahnuła». Za 9 hod našaha znajomstva ad jaje zapisana bolš za 150 piesień: kalandarnyja i siamiejna-abradavyja, biasiednyja, ramansy, bałady, prypieŭki. Pieśni na luby vypadak žyćcia i nastroj.
U hetaj składancy — toje, što padałosia najbolš cikavym. Chaciełasia paznajomić słuchačoŭ z roznymi žanrami, napievami i siužetami adnoj vioski. Tut znakamitaja bałada pra Cmoka, redki siužet lirnickaj pieśni pra śviatoha Laksieja, cudoŭnyja ŭzory vieličalnych kaladak, viasiołyja maśleničnyja «brachliŭki».
Śpiavali: Jefrasińnia Maksimaŭna Bujmistrava, Tamara Mikałajeŭna Chruščova, Zinaida Tarasaŭna Cumarava, Halina Cumarava.
Zapisvali: Maryja Varachob, Alena Cumarava, Aleś Varachob, Kastuś Kancavy, Hanna Silivončyk, Volha Siamaška.
Zapisy rabilisia ŭ rozny čas, u roznych umovach, na roznuju techniku. Tamu pradstaŭlenyja treki tak roźniacca pa jakaści. Darujcie za niedaskanałaści huku.
Žanry piesień, pryviazanaść da śviata ci padziei, paznačanyja sa słoŭ śpiavačak.
Pryjemnaha prasłuchoŭvańnia!
Ciapier čytajuć
Chitry rasijanin Jaŭhien z žonkaj i małym prydumali, jak biaspłatna pažyć u kvatery biełaruski5
Chitry rasijanin Jaŭhien z žonkaj i małym prydumali, jak biaspłatna pažyć u kvatery biełaruski
«Ja nie bomž, u mianie navat biełyja škarpetki». U Minsku dziaŭčyna z Łuhanska raskłała pałatku prosta ŭ padjeździe šmatpaviarchovika, ustryvožyŭšy žycharoŭ2020
Kamientary