Baćku ekaaktyvistki Hrety Tunbierh nie padabajecca, što jaho dačka stała adnoj z samych viadomych fihur u baraćbie z hłabalnym źmianieńniem klimatu, piša BBC.
Svante Tunbierh ličyć, što joj nie treba było prahulvać školnyja zaniatki, kab udzielničać u akcyjach pratestu.
Pavodle jaho słoŭ, Hreta adčuvaje siabie našmat ščaśliviejšaj, staŭšy aktyvistam, ale jaje chvaluje nianaviść niadobrazyčliŭcaŭ.
U intervju jon skazaŭ, što jaho dačka try ci čatyry hady žyła ŭ depresii. Jana pierastała razmaŭlać i chadzić u škołu.
Tunbierh raspavioŭ, što ŭ niejki momant Hreta pačała admaŭlacca ad ježy, i heta stała kašmaram dla baćki.
Tady Svante Tunbierh vyrašyŭ, što treba niešta mianiać, i pačaŭ pravodzić bolš času z Hretaj i jaje małodšaj siastroj Bieataj.
Maci dziaŭčynak, opiernaja śpiavačka i byłaja ŭdzielnica konkursu «Jeŭrabačańnie» Malena Ernman, admoviłasia ad vystupaŭ i taksama pačała pravodzić bolš času ź siamjoj.
Baćki źviarnulisia pa dapamohu da daktaroŭ. Čatyry hady tamu Hrecie dyjahnastavali sindrom Aśpierhiera.
Členy siamji zacikavilisia prablemami achovy navakolnaha asiarodździa, a dla Hrety ideja baraćby za ekałohiju pačała nabyvać usio bolšy sens.
Pry hetym jana nazyvała kryvadušnikami svaich baćkoŭ, jakija zajmalisia pravaabarončaj dziejnaściu.
«Hreta skazała, pravy jakich ludziej vy adstojvajecie, kali dla vas pytańnie klimatu nie takoje nadzionnaje?» — raspavioŭ Tunbierh.
Baćki Hrety vyrašyli pamianiać zvyčki, kab skaracić svajo niehatyŭnaje ŭździejańnie na pryrodu.
Naprykład, jaje maci pierastała lotać na samalotach, a baćka staŭ viehanam. Dziaŭčynku hetyja źmieny litaralna akrylili, adznačyŭ Tunbierh.
Jon pierapłyŭ akijan na parusnaj jachcie razam z dačkoj, jakaja ŭziała ŭdzieł u samitach AAN pa klimacie ŭ Ńju-Jorku i Madrydzie.
«Ja ŭsio heta rabiŭ, i ja viedaŭ, što heta pravilna… Ale ja rabiŭ heta nie dla zachavańnia klimatu, ja rabiŭ heta, kab vyratavać svajo dzicia», — pryznaŭsia Tunbierh.
Jon skazaŭ, što dziakujučy svajmu zachapleńniu aktyvizmam Hreta źmianiłasia i stała vielmi ščaślivaja.
Paśla taho, jak Hreta prahulała škołu dziela akcyi pratestu, videa ź jakoj stała virusnym u internecie, u jaje źjaviłasia šmat niadobrazyčliŭcaŭ, jakija nie chočuć mianiać svaje zvyčki dziela vyratavańnia navakolnaha asiarodździa, patłumačyŭ Tunbierh.
Baćka skazaŭ, što jaho asabliva turbujuć fejkavyja naviny, a taksama ŭsio toje, što ludzi sprabujuć sfabrykavać pra jaje, vynikam čaho stanovicca nianaviść.
Ale jon dadaŭ, što jaho dačka ŭsprymaje krytyku vielmi dobra.
Tunbierh spadziajecca, što ŭ budučyni ŭvaha da jaho siamji źmienšycca. Na jaho dumku, Hreta choča viarnucca ŭ škołu.
Kamientary