Pazoryšča: Google admaŭlajecca prasoŭvać biełaruskamoŭnyja naviny i videaroliki
Pra prablemu raspavioŭ redaktar novych miedyja «Radyjo Svaboda» Franak Viačorka.
Jašče letaś Google ŭvioŭ novyja praviły raźmiaščeńnia rekłamy i skaraciŭ słužby padtrymki ŭ šerahu krain. Adpaviedna, pierastali absłuhoŭvacca videaroliki na hetych movach. Siarod ich i biełaruskaja.
«Jany nie puskajuć hetyja roliki na płatnuju rekłamu. Ich možna publikavać, ale nielha dać na raskrutku, naprykład, praz Google AdWords.
Adziny varyjant, jak heta abychodzić, — padać videa jak rasijski rolik, što bolšaść i rabili. Da traŭnia-červienia heta pracavała, 50% rolikaŭ prachodziła. Ale z kožnym miesiacam jany ŭdaskanalvali pravierku, i stanaviłasia bolš zabaronaŭ. I zaraz tolki maksimum 10% rolikaŭ prachodzić. Budu vyrašać heta pytańnie praz centralny ofis, užo čaćviorty miesiac vajuju», — raspavioŭ Franak Viačorka.
Čamu skłałasia takaja situacyja? Pazicyja Google nastupnaja: mała kantentu stvarajecca na hetych movach, a ŭtrymlivać słužbu padtrymki kaštuje vialikich hrošaj. Praściej spynić padtrymku maleńkich movaŭ, čym płacić sotni tysiač dalaraŭ zarobku supracoŭnikam ci budavać biełaruski ofis.
«Kali ja źviartaŭsia z pytańniem «jak być?», biescyrymonna adkazali: rabicie ruskija subtytry», — dzielicca Franak Viačorka.
Z padobnaj situacyjaj sutyknulisia mnohija inšyja postsavieckija krainy. Rekłama Google nie pracuje na armianskaj, kirhizskaj i šmat jakich inšych movach.
Aproč taho, biełaruskuju movu nie padtrymlivajuć i navinovyja servisy Google. «Naša Niva» vymušanaja addavać u ahrehatary amierykanskaj karparacyi ruskamoŭnuju viersiju artykułaŭ. U toj čas jak, naprykład, rasijski «Jandeks Dzen» biez prablem apracoŭvaje biełaruskuju movu.
Kamientary