Biełarusam prapanujuć znajści paru na «Tbilisobie» i biaspłatna adpravicca ŭ Hruziju
24 žniŭnia na fiestyvali «Tbilisoba» dla svabodnych i adkrytych dla stasunkaŭ biełarusaŭ (18+) buduć pracavać «afłajn-znajomstvy pa charaktary». Kožny, chto pryjdzie biez pary, zmoža zavieści novaje ramantyčnaje znajomstva i navat vyjhrać padarožža ŭ Hruziju — dla siabie i svajoj pałovy.
Paŭdzielničać u rozyhryšy pajezdki ŭ Hruziju moža kožny. Dastatkova pryjści razam z paraj na placoŭku festu, dzie budzie prachodzić vialikaje hruzinska-biełaruskaje viasielle, i zarehistravacca. Zavieści znajomstva na «Tbilisobie» možna budzie roznymi sposabami. Možna prosta skarystacca Tinder albo pakinuć svaje kantakty na fiestyvalnaj ścianie znajomstvaŭ pad nazvaj Offline Tinder Borjomi. Pieramožcaŭ, jakija adpraviacca ŭ padarožža pa Hruzii, pradastaŭlenaje kampanijami «Top-tur» i «Biełavija», vyznačać maładyja na viasielnaj placoŭcy paśla 19:00. Paru čakajuć try nočy na bazie śniadankaŭ u hateli Point Vert u Batumi.
«Chtości znajomicca na vulicy, kamuści praściej pačać razmovu ŭ anłajnie. Sioleta na fiestyvali možna budzie «zametčycca» afłajn z upadabanym čałaviekam, kirujučysia asnoŭnaj rysaj jaho charaktaru, — kaža Dzianis Krupiec, dyrektar IDS Borjomi Belarus i arhanizatar «Tbilisoby». — My śpiecyjalna ŭstalujem na «Tbilisobie» Offline Tinder — ścienku, dzie kožny zmoža pakinuć svajo fota, spasyłku na staronku ŭ sacsietkach i apisać svoj charaktar. Zamiest taho, kab składać doŭhija ankiety, my prapanujem napisać usiaho dva słovy: naprykład, charaktar viasioły ci charaktar spakojny. My chočam, kab pieraznajomilisia jak maha bolš ludziej. Spadziajomsia, što sioleta 24 žniŭnia stanie ščaślivaj dataj dla mnohich biełarusaŭ».
Paralelna z afłajn-znajomstvami na placoŭcy razhorniecca samaja sapraŭdnaja hruzinska-biełaruskaja ŭračystaść z muzykaj, tancami i konkursami. Na internacyjanalnym viasielli možna budzie pačuć samy doŭhi tost za maładych, paŭdzielničać u hruzinskim vykupie niaviesty i na chutkaść zaharnuć dziaŭčynu ŭ dyvan. Pobač z uračystaściu budzie pracavać zona biełaruskaj haścinnaści. Tut hruzinaŭ buduć vučyć razmaŭlać pa-biełarusku, a dla dziaciej praviaduć zaniatki pa tradycyjnych biełaruskich hulniach.
Jubilejnaja piataja «Tbilisoba» projdzie pad słohanam «Śviata z hruzinska-biełaruskim charaktaram» i budzie pryśviečana siabroŭstvu dvuch narodaŭ. Z ranicy da viečara na hałoŭnaj scenie budzie hučać muzyka: šmathałośsie «Švidkaca», ansambl «Iryaa» i chedłajnier fiestyvalu — hurt MGZAVREBI. Pačniecca «Tbilisoba» a 12:00 i praciahniecca da 24:00.
Kamientary