Žonka novaabranaha prezidenta Ukrainy Uładzimira Zialenskaha Alena ŭ 2013 hodzie kupiła elitnuju kvateru ŭ Livadyi mienš čym za pałovu rynkavaj cany ŭ eks-deputata, aliharcha Alaksandra Buraka, paviedamlaje Reuters.
Adznačajecca, što trochpakajovy pientchaŭs u žyłym kompleksie «Impieratar» u Livadyi (kala Jałty ŭ akupavanym z 2014 hoda Krymie) pa susiedstvie ź Livadyjskim pałacam na ŭźbiarežžy Čornaha mora Zialenskaja kupiła ŭ krasaviku 2013 hoda za 163 893 dalaraŭ.
Pra heta śviedčyć dekłaracyja ab dachodach jaje muža Uładzimira Zialenskaha i ŭkrainski rejestr pravoŭ na nieruchomuju majomaść.
Takim čynam, jana nabyła kvateru pa košcie kala 1263 dalaraŭ za kvadratny mietr.
Ahienctva adznačaje, što ŭ 2012 hodzie, pavodle danych sajta nieruchomaści domik.ua, kvatery ŭ kompleksie «Impieratar» pradavalisia pa košcie ad 3500 da 4000 dalaraŭ za kvadratny mietr.
Na inšym sajcie, indoor-estate.ru, kvatery ŭ hetym domie ŭ 2012 hodzie pradavalisia minimum pa 2800 dalaraŭ za kvadratny mietr.
«Krymski ahient pa nieruchomaści na ŭmovach ananimnaści paćvierdziŭ, što kvatery, supastaŭnyja z kvaterami ŭ kompleksie «Impieratar», zvyčajna pradavalisia ŭ 2013 hodzie pa canie ad 2500 da 3000 dalaraŭ za kvadratny mietr, ale cana mahła dachodzić i da 5000 dalaraŭ za mietr», — havorycca ŭ materyjale.
U rejestry pravoŭ na nieruchomuju majomaść Zialenskaja ŭkazana dziejučym uładalnikam pientchaŭsa ŭ Livadyi.
«Hetaja kvatera była vystaŭlena na prodaž u krasaviku ahienctvam nieruchomaści «Pryčał 82» pa canie 790 668 dalaraŭ, heta značyć pa canie, u čatyry razy bolš zapłočanaj u 2013 hodzie, ci za 5195 dalaraŭ za kvadratny mietr», — piša Reuters.
Ahienctva nie zmahło vyśvietlić, čamu kvateru ŭ 2013 hodzie pradali pa canie, značna nižejšaj za rynkavuju.
Adznačajecca, što ni Zialenski, ni jaho žonka nie adkazali na prośbu ab kamientary. Alaksandr Burak, jaki pradaŭ kvateru, pa telefonie admoviŭ ahienctvu ŭ kamientary z hetaj nahody i nie adkazaŭ na piśmovyja pytańni.
Reuters taksama paviedamlaje, što, pavodle źviestak vybarčaj kamisii, Burak byŭ naziralnikam ad Zialenskaha ŭ rodnym horadzie šoŭmiena, Kryvym Rohu, na vybarach prezidenta 2019 hoda.
Kamientary