Darahi naš patryjarch: kolki vizit Kiryła kaštavaŭ biełaruskim jeparchijam
U Minsku adbyŭsia Sinod Ruskaj pravasłaŭnaj carkvy (RPC), pa vynikach jakoha rasijskija ijerarchi vyrašyli razarvać adnosiny z Kanstancinopalskim patryjarchatam. Aŭtamatyčna toje samaje zrobić i BPC, jak častka Ruskaj pravasłaŭnaj carkvy.
Usie hetyja bahatyja na padziei try dni, kali ŭ Biełarusi prysutničali siabry rasijskaha Sinoda, zabiaśpiečvalisia bieśpierabojnaj łahistykaj i absłuhoŭvańniem haściej.
Žytło, abiedy, raźjezdy, padarunki… Chto heta ŭsio apłočvaŭ? Štości traciła dziaržava, ale niemałyja hrošy sabrali i z cerkvaŭ.
Pra jakuju ž sumu idzie havorka?
Nakolki ŭdałosia vyśvietlić «Našaj Nivie», sioleta nijakich piśmovych rasparadžeńniaŭ mitrapalita Paŭła ab zbory hrošaj nie było, pažadańni vykazvalisia ŭ vusnaj formie.
Ale my znajšli ličby pa minułym vizicie patryjarcha Kiryła ŭ Minsk i Brest — heta było ŭ 2015-m, z 20 pa 22 červienia.
Pa kolki ž tady skidvalisia biełaruskija jeparchii? Ličby ŭražvajuć: ahułam heta $100 000!
My zdabyli adpaviedny dakumient, zaviziravany mitrapalitam Paŭłam try hady tamu. U «Płanie ŭniasieńnia metavych unioskaŭ na vizit Śviaciejšaha Patryjarcha Maskoŭskaha» ad 13.05.2015 za podpisam hałoŭnaha buchhałtara A.I.Kachno fihurujuć takija ličby.
| Jeparchija | Suma ŭ dołarach ZŠA |
| Minskaja | 15 000 |
| Babrujskaja | 5 000 |
| Barysaŭskaja | 5 000 |
| Bresckaja | nasuprać Bresckaj jeparchii ličba nie staić, bo patryjarch prylataŭ u Brest, i jany nieśli vytraty |
| Viciebskaja | 8 000 |
| Homielskaja | 10 000 |
| Hrodzienskaja | 7 000 |
| Lidskaja | 5 000 |
| Mahiloŭskaja | 7 000 |
| Maładziečanskaja | 6 000 |
| Navahrudskaja | 5 000 |
| Pinskaja | 10 000 |
| Połackaja | 7 000 |
| Słuckaja | 5 000 |
| Turaŭskaja | 5 000 |
| Ahułam | 100 000 |
Na što za dvoje sutak možna vydatkavać sto tysiač dołaraŭ?
Kiraŭnik sinadalnaha infarmacyjnaha adździeła Biełaruskaj pravasłaŭnaj carkvy Siarhiej Lepin adkazaŭ «Našaj Nivie», što jon nie ŭ kursie pamieraŭ metavych unioskaŭ ni 2015-ha, ni 2018-ha.
«Nakolki mnie viadoma, sioleta pamier nie ŭstanaŭlivaŭsia i nie abmiažoŭvaŭsia», — skazaŭ nam Lepin.
Abaznanyja ludzi kažuć, što sioletnija ŭnioski mahli być u ahulnaj sumie bolšymi pa pamiery, bo ŭ 2015-m śvita patryjarcha była ściplejšaj — razam ź im nie było siabraŭ Sinoda RPC.
Nu i haściavali jany daŭžej na adzin dzień.
Šarahovych śviataroŭ uraziła šmatlikaść achovy patryjarcha. Za krytyku jaje byŭ adchileny ad słužeńnia minski baciuška Alaksandr Šramko. Raskošny ład žyćcia patryjarcha Kiryła vyklikaŭ narakańni i daŭniej: jašče ŭ 2012 hodzie šumu narabiŭ hadzińnik koštam 30 tysiač jeŭra.
Varta adznačyć, što i tady i ciapier asobnyja hrafy vydatkaŭ naŭprost finansavalisia biełaruskaj dziaržavaj, naprykład: u Minsk patryjarch Kirył zvyčajna prylataje na ŭradavym samalocie biełaruskaha boku, jaki zabiraje jaho z Maskvy.
Ciapier čytajuć
Cichanoŭski raskazaŭ, što treba było rabić u žniŭni 2020-ha20
Kamientary