ZŠA paćvierdzili, što pastavili ŭžo va Ukrainu supraćtankavyja rakietnyja kompleksy amierykanskaj vytvorčaści Džavielin (Javelin), piša «Ukrainskaja praŭda».
«Jany ŭžo byli pastaŭlenyja», — adkazaŭ 30 krasavika aficyjny pradstaŭnik Dziarždepu na pytańnie žurnalistaŭ ukrainskaj słužby Radyjo Svaboda nakont pastaŭki «Džavielinaŭ» Ukrainie.
Miž tym u Dziarždepie nie paviedamili pra toje, kali i ŭ jakich abjomach rakietnyja sistemy prybyli va Ukrainu, dzie jany zachoŭvajucca i ci ŭsie abiacanyja ŭstanoŭki byli dastaŭlenyja. Adna z krynic tolki adznačyła, što «Džavieliny» byli dastaŭlenyja «svoječasova».
U administracyi prezidenta Ukrainy nie stali kamientavać dastaŭku ŭzbrajeńnia.
Bieły dom paśla miesiacaŭ haračych debataŭ u Vašynhtonie, i, jak paviedamlałasia, pry supracivie prezidenta Donalda Trampa, uchvaliŭ prodaž rakiet Ukrainie ŭ śniežni. Heta vyklikała rezkuju krytyku z boku Maskvy. Namieśnik ministra zamiežnych spraŭ RF Siarhiej Rabkoŭ abvinavaciŭ ZŠA ŭ raspalvańni vajny.
Paviedamlałasia, što Ukraina zakupić u ZŠA 210 procitankavych rakiet Javelin i 37 puskavych ustanovak koštam 47 młn dalaraŭ.
«Džavielin» (Javelin) — amierykanski pieranosny supraćtankavy rakietny kompleks (PPRK), pryznačany dla źniščeńnia bronietechniki, tankaŭ, a taksama bieśpiłotnych latalnych aparataŭ, viertalotaŭ i vintamatornych samalotaŭ, kali tyja zachodziać na pasadku.
Kamientary