Praz paŭtara hoda śledstva pačali sudzić viadomaha biznesmiena Alaksandra Knyroviča i jaho padnačalenych

18 krasavika sud Frunzienskaha rajona Minska pačaŭ razhlad spravy viadomaha biznesmiena Alaksandra Knyroviča. Jaho vinavaciać u paŭtarnoj dačy chabaru i niaspłacie padatkaŭ.

Pavialičyć

Biznes, bar, błohi. I chabar?

Knyrovič — suzasnavalnik firmy «SarmatTerma-Inžynirynh», jakaja zajmałasia pastaŭkami budaŭničych materyjałaŭ dla pradpryjemstvaŭ ŽKH. U studzieni 2017 hoda Knyroviča niečakana zatrymaŭ KDB. Jon byŭ nie tolki viadomym biznesoŭcam (adkryŭ bar Bristle u Minsku, kuryravaŭ prajekt «Moj biźnies» na kanale ANT), ale i publicystam: vioŭ svoj błoh, pisaŭ kałonki dla partała kyky.org. U adnoj z kałonak Knyrovič raskrytykavaŭ padychod dziaržavy da śviatkavańnia 9 maja, paśla čaho kyky.org navat zabłakavali na niekatory čas.

Tamu spačatku mnohija dumali, što zatrymańnie Knyroviča moža być źviazana ź jaho vykazvańniami. Adnak paźniej siłaviki paviedamili, što ŭsio banalna: biznesmiena aryštavali za chabar i adkaty.

Pa papiaredniaj viersii, supracoŭniki «SarmatTerma-Inžynirynh» płacili ludziam, chto adkazvaŭ za zakupki ŭ ŽKH, paśla čaho tyja farmiravali zajaŭku, jakaja całkam adpaviadała žadańniam «Sarmata».

Pavialičyć

Takim čynam firma Knyroviča padkuplała supracoŭnikaŭ ŽKH jak u stalicy, tak i ŭ rehijonach, i vyjhravała tendery na pastaŭki trub, upeŭnienyja śledčyja. Pavodle KDB, ludzi Knyroviča taksama padkuplali brokieraŭ, jakija pravodzili hetyja tarhi. Pry hetym sumy adkataŭ zakładvalisia firmaj u sabiekošt pradukcyi, zavyšanaja cana jakoj paśla ŭličvałasia pry farmavańni kamunalnych taryfaŭ.

Vynikam byli šmatlikija zatrymańni: palacieli hałovy supracoŭnikaŭ dziaržaŭnych «Brestenierha», Biarozaŭskaha ŽKH, «Homielabłciepłasietak» i šerahu inšych arhanizacyj. Zatrymali i samoha Alaksandra Knyroviča razam z padnačalenymi: dyrektara firmy, namieśnikaŭ, viadučaha ekanamista.

Litaści nie budzie

Pa spravie vykazaŭsia navat Alaksandr Łukašenka. Historyja była na jaho asabistym kantroli. A Knyrovič, pa słovach Łukašenki, paśla zatrymańnia prasiŭ pamiłavańnia i byŭ hatovy kampiensavać škodu.

Pavialičyć

«Litaści da žulikaŭ nijakaj nie budzie. Złodziej pavinien siadzieć u turmie — voś takuju rezalucyju ja nakłaŭ na dakład staršyni Kamiteta dziaržbiaśpieki. Usie, chto da hetaha datyčnyja, buduć siadzieć», — zajaviŭ Łukašenka.

Paśla takich zajavaŭ budučynia Knyroviča vyhladaje zusim nie viasiołkava. Vinavaciać jaho ŭ dačy chabaru i niaspłacie padatkaŭ u asabliva bujnym pamiery. Biznesmienu i jaho supracoŭnikam pahražaje da 7 hadoŭ źniavoleńnia z kanfiskacyjaj majomaści.

Dadamo, što ŭ 2008 hodzie suprać Knyroviča ŭžo zavodziłasia kryminalnaja sprava za ŭchileńnie ad spłaty padatkaŭ. Tady jon pryznaŭ vinu, kampiensavaŭ škodu dziaržavie i byŭ vyzvaleny ad kryminalnaj adkaznaści.

Pavialičyć

18 krasavika na łavie padsudnych — piaciora čałaviek. Heta sam Knyrovič, dyrektar «SarmatTerm-Inžynirynh», jaho namieśnik pa prodažach Jaŭhien Papoŭski, namieśnik pa ekanomicy Ihar Maksimaŭ, viadučy ekanamist Andrej Kuskoŭ. Piaty — Uładzimir Daškievič, jaki paviedamiŭ, što na momant zatrymańnia jon byŭ biespracoŭnym. Nasamreč, tak i było. Ale raniej mienavita Daškievič byŭ dyrektaram «SarmatTerma», Knyrovič źmianiŭ jaho litaralna za 2 miesiacy da zatrymańnia.

Pavialičyć

Miarkujučy pa ŭsim, abvinavačanym nie varta čakać litaści. Abaroncy paprasili vyzvalić z-pad varty Ihara Maksimava. Niemałady mužčyna maje surjoznyja prablemy sa zdaroŭjem: staić na ŭliku ŭ ankadyspansiery, pieranios apieracyju na sercy. Ale ž prakuror Aksana Sakovič vykazałasia suprać: maŭlaŭ, moža paŭpłyvać na śviedkaŭ, a to i ŭvohule źbiehčy. Sudździa Julija Krepskaja prysłuchałasia da prakurora i vyrašyła, što Maksimaŭ zastaniecca ŭ SIZA, niehledziačy na chvaroby.

Zatym začytali abvinavačvańnie. Śledstva śćviardžaje, što supracoŭniki Knyroviča i sam jon pieradavali hrošy rabotnikam ŽKH.

Chabar byŭ roznym: časam chapała tysiačy ci dźviuch tysiač rubloŭ, časam abhavorvali pracent ad sumy zakupki. Naprykład, adkaznamu za zakupki na «Brestenierha» ad «SarmatTerma» pieradali ažno 10 tysiač rubloŭ za dapamohu.

Taksama Daškievič i Knyrovič adkryli ŭ 2012 hodzie firmu ŭ Pieciarburhu, ličyć śledstva. Zasnavalnikam jaje aficyjna była maci Alaksandra Knyroviča, jakaja pra złačynnyja płany nie viedała. Firma była pasiarednikam padčas impartu trub, u vyniku «Sarmat» štučna pavyšaŭ košty i pradavaŭ tyja truby ŽKH daražej.

Takim čynam za čas svajoj pracy «Sarmat» nahreŭ dziaržavu na bujnuju sumu. Ahułam firma nie spłaciła padatkaŭ bolš čym 1,5 miljona dalaraŭ, śćviardžajuć śledčyja.

Abvieščany pierapynak, sud praciahniecca 19 krasavika. Za pieršy dzień prakuror nie paśpieŭ navat całkam pračytać abvinavačvańnie.

(abnaŭlajecca)

• 0
• 0
• 0
• 0
• 0
• 0
• 1
• 0