Ułady dazvolili Dzień Voli kala Opiery, vyzvalili arhanizataraŭ ad apłaty zboraŭ
Ułady dazvolili mitynh i kancert 25 sakavika na Dzień Voli — 100-ja ŭhodki abviaščeńnia niezaležnaści Biełaruskaj Narodnaj Respubliki.
Minharvykankam dazvoliŭ zbor udzielnikaŭ na placoŭcy pierad Opiernym teatram z 13:00 da 14:00, mitynh i kancert projduć z 14:00 da 19:00.
Arhanizatary vyzvalajucca ad apłaty za pasłuhi miedykaŭ, milicyi, pryborki terytoryi.
Učora paviedamlałasia, što viaducca pieramovy na ŭdzieł u kancercie ź Lavonam Volskim, «Kramaj», «Dzieciukami» i Neuro Dubel.
Nahadajem, što pieršapačatkova padavałasia zajaŭka na šeście ad płoščy Jakuba Kołasa da płoščy Svabody z praviadzieńniem tam kancerta. U Minharvykankamie paraili abmiežavacca kancertam abo kala Opiernaha teatra, abo ŭ parku Janki Kupały.
U adkaz 26 lutaha piać arhanizacyj — Partyja BNF, Ruch «Za Svabodu», AHP, BSDP (Hramada) i aśvietnickaja ŭstanova «Amaroka» padali novuju zajaŭku na akcyju, paprasiŭšy dazvolić praviadzieńnie mitynhu i kancerta kala Opiernaha teatra 25 sakavika z 15:30 da 20:00.
Čynoŭniki Minharvykankama zapeŭnili arhanizataraŭ, što na dazvolenym mierapryjemstvie nie budzie zabaraniacca vykarystańnie nacyjanalnaj simvoliki.
Na praviadzieńnie Dnia Voli hrošy źbirajucca «Tałakoj». Bolš za pałovu srodkaŭ užo sabrana. Najbolšaje achviaravańnie zrabiŭ 21-hadovy minski prahramist Uładź Čačotkin. Jon achviaravaŭ na śviatkavańnie jubileju BNR ažno 2500 rubloŭ
Kamientary