Biełaruski pašpart — «aŭsvajs», Łukašenka — «haŭlajtar»: homielski błohier pravodzić u Minsku sieminary pra toje, što ŭsie my — hramadzianie BSSR

U pole zroku «Našaj Nivy» trapiŭ kanał adnaho homielskaha błohiera — Jaŭhiena Pupyryna: spačatku jon zdymaŭ videa z krytykaj Alaksandra Łukašenki, potym uziaŭsia za Uładzimira Pucina. 

Ale jakija palityčnyja pohlady moža adstojvać čałaviek, jaki razdaje parady hledačam, jak nie słužyć u vojsku, «lehalna» nie płacić kredyty, padatki i ŭnioski u Fond sacyjalnaj abarony nasielnictva, jak «zaścierahčy dziaciej ad samaŭpraŭnaści daktaroŭ Biełarusi, jakija robiać im pryščepki»…? — za pašyranyja kansultacyi jon navat biare hrošy. 

Pavialičyć

Jak vyśvietliłasia, u Biełarusi isnuje ceły ruch aktyvistaŭ, jakija ličać siabie žycharami BSSR. Svaje schodki jany pravodziać u Minsku, arandujučy zały i zaprašajučy ŭdzielnikaŭ praź internet. 

I toj Pupyryn — ruchavik «adnaŭleńnia BSSR». 

U internecie možna znajści šmat videa z kanfierencyj u Minsku, dzie pierad aŭdytoryjaj vystupajuć adepty BSSR. Voś adna ź ich.

Pra što tam raskazvajuć? 

Pieršym vystupaje Pupyryn sa słovam, što «ŭsio pačniecca z nas, bo ŭ Biełarusi treba try-čatyry hadziny, kab ź luboha kraju krainy pryjechać u stalicu, a ŭ Rasii hety praces zaciahniecca». 

Kiraŭnika krainy pry hetym nazyvajuć «haŭlajtaram», ale pierakazvać usiu pramovu Pupyryna nie maje sensu — u ahulnych rysach jon davodzić, što «ŭsich padmanvajuć»: na jaho dumku, paśviedčańnie ab naradžeńni, vypisanaje da 1991 hoda, jość aŭtamatyčnym hramadzianstvam SSSR. Kali ž vy naradzilisia paśla (jak sam Pupyryn), to paśviedčańni ab naradžeńni baćkoŭ nibyta anulujuć vašaje biełaruskaje hramadzianstva. 

Dalej maderatar sustrečy pieradaje słova svajmu adnadumcu nieachajnaha vyhladu — «tavaryšu Alaksandru Bobryku». 

Bobryk pradstaŭlajecca «upaŭnavažanym pa pravach čałavieka BSSR da naviadzieńnia na hetaj terytoryi kanstytucyjnaha ładu» i padkreślivaje, što jon nie chacieŭ prymać hetuju pasadu, bo «i bieź jaje maje ŭładu», ale, maŭlaŭ, daviałosia. 

Pavialičyć

Bobryk adrazu pačynaje raskazvać, što Respubliki Biełaruś nie isnuje, demanstruje jon heta na ŭzory svajho biełaruskaha pašparta. 

«Pašpart Republiki Biełaruś — heta aŭsvajs [tak nazyvaŭsia dakumient, jaki nacysty vydavali na akupanych terytoryjach za časami Druhoj suśvietnaj vajny — «NN»], vy dla ich [uładaŭ] — nie ludzi. Adkryvajem staronku z fota, tam piačatka pamieram 30 milimietraŭ zamiest 40, a takija piačatki staviacca na propuski ci paśviedčańni. Značyć, heta nie pašpart — jaho možna vykinuć, a śpiecpropusk dla pierasoŭvańnia pa časova akupavanaj terytoryi. Chto jaho padpisvaŭ? Ja nie ździŭlusia, kali heta robić prybiralščyca», — raskazvaje «tavaryš Bobryk». 

Jon taksama apieluje da «rymskaha prava», zhodna ź jakim zapis inicyjałaŭ u biełaruskim pašparcie aznačaje, što jaho ŭładalnik pazbaŭleny ŭsich pravoŭ.

Višańka na torcie bobrykaŭskich razvah — parada, jak zaścierahčysia ad chvarobaŭ.

«Jak my zachvorvajem? Ja patłumaču na sabie: ja vychodžu na vulicu, a virusaŭ tam vielmi šmat. Hladzicie, da mianie padlataje virus i pytajecca: «Vi — rus?». «Ja — rus», adkazvaju. I jon dalej pajšoŭ, mianie nie čapaje. A kali ty nie rus — to pryvitańnie, darahi! Heta dziejničaje», — kaža jon.

Bobryk zapeŭnivaje, što dziakujučy jahonym listam z pasady źniali Maryjanu Ščotkinu i Alaksandra Kosinca. I tłumačyć, što Kamitetam dziaržaŭnaj biaśpieki nasamreč kiruje syn Alaksandra Łukašenki. 

«Suprać nas viadziecca vajna, i my jak hramadzianie apłačvajem heta. Jany rychtujucca za našyja hrošy i viaduć vajnu», — kažuć adepty BSSR. Jany rajać prysutnym nie pryznavać svajo biełaruskaje hramadzianstva, a nazyvać siabie hramadzianami SSSR: «jak tady jany z vas štości spahoniać, kali vy nie hramadzianin firmy pad nazvaj Respublika Biełaruś?».

Pupyryn pry hetym raskazvaje historyju, jak nie płaciŭ kredyt za telefon, a «tavaryš Bobryk» — jak paźbiehnuŭ niejkich pracedur u vajenkamacie. Pupyryn dadaje, što ŭsie dakumienty ŭ Biełarusi — padrobnyja, a sudździ — nielehitymnyja.

Pavialičyć

Hetyja aktyvisty nazyvajuć «adnadumcam» eks-vykładčyka BDU Andreja Ivanova, jaki adznačyŭsia tym, što niejki čas čytaŭ lekcyi biełaruskim ideołaham pra masonskuju pahrozu.

Čytajcie taksama: «Z 1991 hoda naša kraina akupavanaja». U internet trapiła šakujučaje VIDEA sieminara dla biełaruskich ideołahaŭ

Pavialičyć

Zastajecca niezrazumiełym, čamu, naprykład, kab arhanizavać u stalicy sustreču z nacyjanalna-aryjentavanym historykam, treba prajści pilny kantrol, a šarłatany, jakija admaŭlajuć dziaržaŭnaść krainy, u jakoj žyvuć, robiać heta lohka. 

• 0
• 0
• 0
• 0
• 0
• 0
• 0
• 0