Na telekanałach Małdovy ŭ chutkim časie nie buduć tranślavacca rasijskija naviny i palityčnyja tok-šou, piša Deutsche Welle.
Papraŭki ŭ zakanadaŭstva, pryniatyja parłamientam 7 śniežnia adrazu ŭ dvuch čytańniach, dazvalajuć retranślavać na terytoryi krainy tolki tyja infarmacyjnyja i analityčnyja prahramy, jakija vyrableny ŭ krainach, jakija ratyfikavali Jeŭrapiejskuju kanviencyju ab transhraničnym telebačańni. Rasija padpisała hety dakumient jašče ŭ 2006 hodzie, ale nie ratyfikavała jaho. Papraŭki ŭ małdaŭski Kodeks ab teleradyjoviaščańni praduhledžvajuć dla parušalnikaŭ zakona štrafy ad 70 da 100 tysiač lejeŭ (ad 3,5 da 4,9 tys. jeŭra).
Abmierkavańnie zakonaprajekta ŭ parłamiencie zaniało try hadziny. Choć u dakumiencie nie havorycca niepasredna ab zabaronie tranślacyi mienavita rasijskich prahram i niama ni słova pra rasijskuju prapahandu, prychilniki novaŭviadzieńniaŭ kazali mienavita pra jaje i škodu, jakuju jana prynosić. Ich apanienty nahadvali ab pravach čałavieka i svabodzie słova. Apazicyjnaja frakcyja kamunistaŭ pakinuła zału pasiadžeńniaŭ, nie čakajučy hałasavańnia.
Sacyjalisty, jakija vystupajuć za jeŭrazijski šlach raźvićcia krainy, choć i zastalisia ŭ zale, ale hałasavać nie stali. 61 deputat z 87 prysutnych na pasiadžeńni, vykazaŭsia «za». Usiaho ŭ małdoŭskim parłamiencie 101 deputat.
Kamientary