Hety muzyčny kalektyŭ pakul vypuściŭ tolki adnu debiutnuju płaścinku — praŭda, ciapło pryniatuju publikaj, — a ŭžo hraje na razahrevie ŭ lehiendarnych Depeche Mode. Jak ža tak atrymałasia? Raskryvajem sakret pośpiechu hrupy Black Line, jakaja vystupić razam z «Depiešami» na Miensk-Arenie 13 lutaha.
Ździŭleńnie raśsiejvajecca, varta tolki ŭbačyć imiony ŭdzielnikaŭ Black Line. U składzie — asoby, znakavyja dla elektronnaj sceny. Black Line — heta sajd-prajekt Duhłasa Makarci i Bona Charysa z Nitzer Ebb, Poła Barkiera z Ministry, a taksama Cyrusrex. Z hrupaj supracoŭničajuć bek-vakalist Skinny Puppy Mark Uołk i siesijny Bubnač Depeche Mode Kryścijan Ajhnier. Jak kažuć sami muzyki, udzieł u prajekcie svabodny: kožny prychodzić, kali ŭ jaho jość cikavyja idei, i sychodzić, kali choča adpačyć.
Ciapierašni prajekt muzyki ličać, z adnaho boku, łahičnym praciaham svajoj tvorčaści, ale z druhoha — čymści pryncypova novym dla siabie:
— Black Line šmat u čym blizki da viaršyni, da jakoj my imknulisia razam. Pa ironii losu dla hetaha spatrebiłasia značnaja kolkaść inšych udzielnikaŭ. Taki adkryty padychod da tvorčaści mocna adroźnivajecca ad usiaho, što my rabili indyvidualna abo kalektyŭna raniej. My dali kožnamu kart-błanš ruchacca tudy, kudy jon choča.
Akramia taho, jak adznačaje i słuchač, i ŭdzielniki prajekta, jaho aryhinalnaść nie abmiažoŭvajecca niestandartnym staŭleńniem da pracy. Sama muzyka žyvaja śviežymi idejami i cikavymi chadami. Voś jak Black Line tłumačać hety zapał da ekśpierymientaŭ:
— My siabrujem ci chacia b znajomyja z amal kožnaj elektronnym hurtom i artystam u Łos-Andželesie. My ŭsie dzieci svajho času, i naša hałoŭnaja ideja ŭ tym, kab ruchacca napierad i kidać vyklik sabie i svajoj aŭdytoryi. I navat kali nie ŭsie ekśpierymienty buduć ŭdałymi, chaj nas lepš abvinavaciać u tym, što my idyjoty, jakija nie viedajuć svaju aŭdytoryju, čym my budziem cichieńka siadzieć u burbałcy samaŭpeŭnienaści.
Pijanieraŭ EBM-brytanskaj sceny hurt Nitzer Ebb z Depeche Mode źviazvaje daŭniaje plonnaje supracoŭnictva: gieršyja supolnyja kancerty jany pačali davać jašče ŭ 1987 hodzie. A ŭ tury 2010 hoda Nitzer Ebb hrali na razahrevie ŭ Depeche Mode padčas vystupaŭ u našych susiedziaŭ — u Kijevie, Sankt-Pieciarburhu i Maskvie. Arhanizatary hastrolaŭ paličyli, što mienavita słavianskaja publika lepš za ŭsio acenić ich muzyku. Pryjšoŭ čas i mienčukam pačuć Black Line žyŭcom.
Depeche Mode pry padtrymcy Black Line 13 lutaha vystupić na «Minsk-arena». Pačatak u 20.00.
Košty kvitkoŭ: ad 80 da 320 rubloŭ.
Kupić kvitki možna na sajcie arhanizatara mierapryjemstva — kancertnaha ahienctva «Atam intertejnment» http://atomenter.by/ (biez kamisii), na sajtach biletnych apierataraŭ, a taksama ŭ kasach horada.
Kamientary