Novy dakład Caryka i Sivickaha ab padziejach sakavika-2017: «KDB i MUS dezynfarmavali Łukašenku»
Centr stratehičnych i zamiežnapalityčnych daśledavańniaŭ, jaki ŭznačalvajuć palitołahi Juryj Caryk i Arsień Sivicki, vypuścili novy dakład. Jon pryśviečany padziejam palityčnaha kryzisu lutaha-sakavika 2017 hoda.
«Biełaruś pieražyła najbujniejšy palityčny kryzis z času trahičnych padziejaŭ kanca 2010 — pieršaj pałovy 2011 hadoŭ. Dadzieny kryzis uklučaŭ sacyjalnyja pratesty, represiŭnyja miery biełaruskich uładaŭ, abvastreńnie supiarečnaściaŭ u biełaruska-rasiejskich adnosinach i šerah inšych padziej. Na piku kryzisu — z 20 da 26 sakavika — jon nabyŭ taki maštab, što ŭźnikła realnaja pahroza nie tolki padryvu pracesu narmalizacyi adnosin pamiž Biełaruśsiu i Zachadam, ale i, što jašče bolš važna, paharšeńnia adnosin z krainami-susiedkami», — pačynajecca dakład.
«U siłu asablivaściaŭ padziej u zamiežnych partnioraŭ paŭstali całkam abhruntavanyja sumnievy ŭ zdolnaści biełaruskaha kiraŭnictva praciahvać realizoŭvać niezaležnuju zamiežnuju, abaronnuju i ŭnutranuju palityku», — adznačajuć aŭtary.
Caryk i Sivicki ličać, što «nieprafiesijanalizm dziejańniaŭ supracoŭnikaŭ MUS staŭ mahutnym stymułam dla dalejšaha rostu pratestnych vystupaŭ».
Na dumku aŭtaraŭ, niemałavažnym źjaŭlajecca toje, što kryzis adbyvaŭsia na fonie «biesprecedentnaha paharšeńnia» biełaruska-rasijskich adnosin. Analityki miarkujuć, što biełaruski bok, u adroźnieńnie ad rasijskaha, nie byŭ hatovy da takoha supraćstajańnia.
Pry hetym aŭtary pryznajuć, što «pramych vyčarpalnych dokazaŭ» roli Maskvy ŭ viesnavych padziejach niama. «Tym nie mienš, uličvajučy ŭsiu sukupnaść abstavinaŭ, možna z upeŭnienaściu śćviardžać, što arhanizatary pratestaŭ, jak minimum, całkam ŭśviedamlali tuju vyhadu, jakuju atrymlivaŭ rasijski bok ad hetych padziej», — miarkujuć jany.
Asnoŭnaj pryčynaj taho, što palityčny kryzis uvohule zmoh adbycca ŭ Biełarusi, Caryk i Sivicki nazyvajuć kiepskuju pracu sacyjałahičnych słužbaŭ, vyviedki i palityčnaha vyšuku. Maŭlaŭ, usie jany prapuścili narastańnie niezadavolenaści dziejańniami ŭładaŭ. Jak niemałavažnym prakołam nazyvajecca znachodžańnie Alaksandra Łukašenki na zapłanavanym adpačynku ŭ Sočy, kali akcyi pratestu suprać Dekretu №3 tolki pačynali nabirać abarot.
Vialikaja častka dakłada pryśviečanaja nieprafiesijanalizmu ci navat «metanakiravanym pravakacyjam» z boku siłavych struktur. Naprykład, vypadak z napadam na łahier abaroncaŭ Kurapataŭ u lutym. Aŭtary dakłada nie vyklučajuć, što za hetym mahli stajać ludzi ź siłavoha błoka: «Kali heta adpaviadaje realnaści, to hetyja padziei pradstaŭlajuć saboj prykład śviadomaha ŭznaŭleńnia ŭ Biełarusi praktyk, jakija pryviali da razbureńnia miru i terytaryjalnaj cełasnaści va Ukrainie (vykarystańnie tak zvanych «citušak»)».
Vielmi słabaj nazvanaja praca nie tolki siłavoha błoka, ale i infarmacyjnaha. Na dumku ekśpiertaŭ, dziaržaŭnyja ŚMI nie dali rady aśviatleńniu Dekretu №3. Jany stali pracavać u kanfrantacyjnym klučy, zamiest taho kab sprabavać niejak załahodzić hetuju situacyju.
«Dadzienyja, jakija lahli ŭ asnovu siužetaŭ na telebačańni, byli pradastaŭlenyja Kamitetam dziaržaŭnaj biaśpieki. Najchutčej, jany papiarednie byli dakładzienyja kiraŭniku dziaržavy. Jak pakazvaje analiz, dapuščeńni, zajaŭlenyja ŭ siužetach dziaržaŭnych ŚMI, nie padmacavanyja faktyčnymi dadzienymi, a ŭ šerahu vypadkaŭ supiarečać im (u pryvatnaści, dakładna viadoma, što biahučaje finansavaje stanovišča A.Smancara nie dazvalaje jamu finansavać choć jakuju maštabnuju palityčnuju dziejnaść», — havorycca ŭ dakładzie.
Caryk i Sivicki pramym tekstam pišuć, što, naprykład, praryŭ džypam ukrainska-biełaruskaj miažy byŭ padobny da «pastanovačnaj pravakacyi samich siłavych struktur».
Uvohule ekśpierty miarkujuć, što śpiecsłužby «naviazvali» Łukašenku karcinu padziej, jakaja paŭtaraje farmuloŭki rasijskaj prapahandy.
«U cełym, u asnovie infarmacyjnaj karciny, pryviedzienaj padčas kryzisu sakavika 2017 hoda ŭ Biełarusi, lažać acenki rasijskich śpiecsłužbaŭ vajskova-palityčnaj situacyi ŭnutry i vakoł Biełarusi, a taksama «majdannyja naratyvy», śpiecyjalna apublikavanyja i šyroka rastyražavanyja ŭ rasijskich ŚMI i sacyjalnych sietkach z metaj stvareńnia infarmacyjnaha prykryćcia i padrychtoŭki rasijskaha i biełaruskaha hramadstva da mahčymaha paharšeńnia biełaruska-rasijskich adnosin i paŭtoru «ŭkrainskaha scenara» ŭ Biełarusi. Ź jaje łahična vyciakaje nieabchodnaść vajskova-palityčnaha ŭmiašańnia Rasii va ŭnutranyja spravy Biełarusi z metaj procidziejańnia padobnamu raźvićciu padziej. Supraćdziejańnie «kalarovym revalucyjam» u krainach ADKB ciapier zajaŭlenaje Kramlom u jakaści adnaho z hałoŭnych pryjarytetaŭ zamiežnaj i biaśpiekavaj palityki Rasii», — pišuć ekśpierty.
Značnaja častka dakłada pryśviečanaja tak zvanaj spravie «Biełaha lehijona». Maŭlaŭ, adrazu paśla padziej u Krymie i uschodzie Ukrainy kiraŭnictvam krainy była dadzienaja kamanda siłavikam raspracavać kancepcyi pa supraćstajańni «zialonym čałaviečkam». U adnym ź siłavych viedamstvaŭ naradziłasia ideja «šerych čałaviečkaŭ», jakija pavinny ŭ vypadku čaho ŭstupić u boj z ahresarami.
U roli «šerych čałaviečkaŭ» razhladaŭsia «Bieły lehijon». Adnak viarboŭka ŭdzielnikaŭ «Biełaha lehijona» prajšła niaŭdała, mabyć, mienavita tamu jany apynulisia za kratami. Caryk i Sivicki ličać, što śpiecsłužby viali dvajnuju hulniu. Nie tolki vykonvajučy rasparadžeńnie kiraŭnictva krainy, ale i padyhryvajučy rasijskamu boku, stvarajučy tym samym biełaruski anałah «Pravaha siektara».
«Značnaść dezynfarmacyi, ździejśnienaj (śviadoma ci nie) biełaruskimi śpiecsłužbami padčas kryzisu sakavika-2017, ciažka pieraacanić», — miarkujuć analityki.
«Adkryta nizkaja jakaść ukinutaj infarmacyi, niespryjalnaść krynic, vidavočnaja nieabhruntavanaść i nadumanaść viersij, a taksama ich biezalternatyŭnaść stvaryli padstavy dla taho, kab interpretavać hetyja infarmacyjnyja ŭkidy jak dziejańni rasijskich ahientaŭ u siłavych strukturach Biełarusi pa stvareńni infarmacyjnaha fonu (prykryćcia) dla realizacyi płanaŭ pa destabilizacyi abstanoŭki ŭ krainie aktyvami, jakija znachodziacca pad kantrolem Maskvy», — prychodziać da vysnovy ekśpierty.
Caryk i Sivicki pišuć, što dziejnaść KDB i MUS za adviedzieny pieryjad patrabuje «śpiecyjalnaha vyvučeńnia i acenki». Taja ž Administracyja prezidenta pakazała svaju niedziejazdolnaść pa pryčynie rearhanizacyi.
Što prapanujuć analityki?
«Terminova patrabujecca źmianić paradak infarmavańnia kiraŭnika dziaržavy ab biahučych padziejach, u tym liku — u kryzisnych situacyjach, kab vyklučyć štučnaje nahniatańnie napružanaści, jak heta adbyłosia 20—21 sakavika 2017 hoda i ŭ nastupnyja niekalki dzion», — rajać jany.
«A 4‑j hadzinie nočy my zrazumieli, što sierviery prosta vyčyščanyja». Jarasłaŭ Ivaniuk raskazaŭ padrabiaznaści pra ataku na anłajn-biblijateku «Kamunikat»99
Kamientary