Samy papularny sajt Smalenska napisaŭ, što Sieviaryniec rychtuje pravakacyju ŭ Rasii
Vydańnie readovka.ru pryśviaciła vialiki artykuł «Maładomu frontu», a taksama jaho zasnavalniku Paŭłu Sieviaryncu. «Biełaruskija radykały rychtujuć pravakacyju ŭ Smalensku?» — takim pytańniem zadajecca partał.
Sajt nazyvaje arhanizacyju čamuści «Młady front» i ličyć, što jany ideałahična blizkija da «Pravaha siektara». Aŭtar materyjała chavajecca pad vykštałconym psieŭdanimam Płacak Zapiecak.
Što stałasia pryčynaj dla napisańnia artykuła? Abviestka ŭ fejsbuku Paŭła Sieviarynca, što 23 žniŭnia rychtujecca pajezdka ŭ Katyń. Biełarusy štohod ładziać vypravy ŭ Katyń u hety dzień, hadavinu padpisańnia pakta Mołatava-Rybientropa, kab ušanavać pamiać palehłych tam aficeraŭ. Siarod ich było niamała etničnych biełarusaŭ.
«Sieviaryniec — asoba ŭ Biełarusi viadomaja: jon źjaŭlajecca nieprymirymym apazycyjanieram, mienavita jon byŭ arhanizataram vuličnych akcyj pratestu ŭ Minsku ŭ 1997-2004 hadach, u 2014-m aktyŭna padtrymlivaŭ ŭkrainski majdan, a ŭ pačatku hetaha hoda faktyčna ŭznačaliŭ akcyju pratestu ŭ Kurapatach pad Minskam. Sieviaryniec čaściakom adkryta zaklikaje da źmieny ŭłady ŭ respublicy, jon nieadnarazova pryciahvaŭsia da adkaznaści za supraćpraŭnyja dziejańni i zatrymlivaŭsia KDB Biełarusi; u sukupnaści pad aryštam jon pravioŭ kala 5 hadoŭ», — voś takija amal daviedkavyja źviestki drukuje vydańnie.
Adznačajecca, što ideałohijaj «Maładoha fronta» źjaŭlajecca vajaŭničy nacyjanalizm, jaki pierachodzić u nacyzm.
«Zapłanavanaja pajezdka — čarhovaja antyrasijskaja akcyja, jakaja pierakreślivaje saviecki pieryjad i jakaja stavić znak roŭnaści pamiž SSSR i nacysckaj Hiermanijaj, što, pa sutnaści, źjaŭlajecca pierahladam vynikaŭ Druhoj suśvietnaj», — ličyć readovka.ru.
Sajt adznačaje, što ŭ 2014 rasijskaja palicyja nie dała biełaruskim nacyjanalistam zładzić pravakacyju ŭ Katyni. Adnak na hety raz moža być što zaŭhodna.
Sam Pavieł Sieviaryniec kaža, što nie źbirajecca jechać u Katyń, na hety dzień u jaho inšyja płany.
Vydańnie readovka.ru źjaŭlajecca samym naviedvalnym sajtam Smalenskaj vobłaści.
Ciapier čytajuć
Capkała i Bałkuniec atakavali litoŭskaha palityka, jaki dapamahaŭ biełarusam paśla 2020‑ha i spryčyniŭsia da spravy, jakuju zavioŭ prakuror u Haazie5555
Kamientary