Śledčy kamitet raspačaŭ kryminalnyja spravy faktach kradziažoŭ hrošaj z ofisaŭ pryvatnych firmaŭ u mai—lipieni 2017.
Pa padazreńni ŭ ździajśnieńni nazvanych złačynstvaŭ apieratyŭniki kryminalnaha vyšuku pry padtrymcy śpiecnazu «Ałmaz» zatrymali hrupu rasiejcaŭ (4 čałavieki) i hramadzianina Biełarusi, žychara Maskvy, jaki vykonvaŭ rolu kiroŭcy i «hida» pa vulicach Minska. Pavodle śledstva, za svaju pracu mužčyna atrymlivaŭ uznaharodu, piša sajt Śledčaha kamiteta.
Złamyśniki pranikali ŭ ofisnyja pamiaškańni, uzłomvajučy dźviery, škłopakiety, a paśla hetaha ŭskryvali siejfy i zabirali adtul hrošy.
Pieršaje złačynstva było ździejśniena 30 maja ŭ administracyjnym budynku pa vuł. Ściebianiova, kudy złamyśniki trapili, paškodziŭšy akonnuju ramu i uzłamaŭšy ŭvachodnyja dźviery ofisnych pamiaškańniaŭ. Bolš za toje, mietaličnym pradmietam jany ŭdaryli pa hałavie vartaŭnika i źviazali jaho. Ź siejfaŭ padazravanyja vykrali bolš za 7 tysiač dalaraŭ.
Praz dva tydni na toj ža vulicy z anałahičnych ofisnych pamiaškańniaŭ było vykradziena 22 tysiačy rubloŭ.
Hetuju ž złačynnuju hrupu padazrajuć u vykradańni 5 tysiač dalaraŭ z ofisaŭ na vulicy Babuškina ŭ noč z 26 na 27 lipienia.
Bandu ŭziali paśla čarhovaha «nalotu» na ofisy pa vulicy Karvata ŭ Minsku. Tam jany z ofisnych pamiaškańniaŭ vykrali bolš za 1 800 dalaraŭ.
U aŭtamabili, na jakim pieramiaščalisia złamyśniki, byli znojdzienyja hrošy i adzieńnie, u jakim ździajśnialisia supraćpraŭnyja dziejańni.
Ciapier iduć ekśpiertyzy, meta jakich — supastavić ślady ruk i abutku, transpartnaha srodku ź miescaŭ złačynstva ź bijałahičnymi paramietrami padazravanych.
Padazravanyja taksama praviarajucca na dačynieńnie da anałahičnych złačynstvaŭ u inšych rehijonach krainy.
Kamientary