Pavodle daśledavańnia, praviedzienaha Brytanskim ahienctvam pa vyvučeńni raka i Impierskim kaledžam Łondana, bolš častaje ŭžyvańnie kavy spryjaje źnižeńniu ryzyki śmierci ad šerahu zachvorvańniaŭ, paviedamlaje VVS.
Navukoŭcy śćviardžajuć, što najbolš vidavočnaja ŭzajemasuviaź pamiž užyvańniem kavy i źnižeńniem ryzyki śmierci ad zachvorvańniaŭ kryvianosnaje sistemy i orhanaŭ stravavańnia.
Heta adno z samych maštabnych daśledavańniaŭ padobnaha rodu. U im uziali ŭdzieł bolš za 500 tysiač čałaviek starejšych za 35 hadoŭ z 10 jeŭrapiejskich krain. Nazirańni za imi vialisia na praciahu 16 hadoŭ. Daśledavańnie apublikavanaje ŭ navukovym časopisie Annals of Internal Medicine.
Navukoŭcy padkreślivajuć, što niahledziačy na roznyja tradycyi ŭ hatavańni i ŭžyvańni kavy ŭ roznych jeŭrapiejskich krainach vyniki byli faktyčna adnolkavymi va ŭsich rehijonach. Heta aznačaje, što i espresa, i kapučyna možna ličyć adnolkava karysnymi.
Sprava nie ŭ kafieinie
Taki efiekt daje nie kafiein, jaki źmiaščajecca ŭ hetym napoi.
Daśledavańnie jakraz nie vyjaviła jakoj-niebudź zaležnaści pamiž palapšeńniem zdaroŭja i zvyčkaj pić dekafieinizavanuju kavu. Vyniki tych, chto piŭ zvyčajnuju kavu i dekafieinizavanuju, akazalisia adnolkavymi.
Pavodle zdahadki daśledčykaŭ, usia sprava ŭ antyaksidantach, jakija źmiaščajucca ŭ kavie.
Jak vyśvietliłasia, tyja, chto pryvyk pić šmat kavy, adčuvali siabie bolš maładymi, i, jak praviła, jany z bolšaj imaviernaściu akazvalisia amatarami ałkaholu, kurcami, a taksama jeli bolš miasa i mienš harodniny i sadaviny.
Z hrupy, jakaja brała ŭdzieł u daśledavańni, za 16 hadoŭ pamierli amal 42 tysiačy čałaviek — ad roznych chvarob, u tym liku ad raku, zachvorvańniaŭ kryvianosnaj sistemy i sardečnych prystupaŭ.
Jak vyśvietliłasia, u mužčyn, jakija ŭžyvali bolš kavy, ryzyka śmierci była nižejšaj na 18%, čym u tych, chto admaŭlaŭsia ad kavy ci piŭ jaje ŭ nievialikich kolkaściach.
Siarod žančyn taki efiekt mieniej vyjaŭleny: ryzyka śmierci dla ich apynułasia na 8% nižejšaj, čym dla žančyn, jakija pili kavu ŭ nievialikich kolkaściach abo zusim admaŭlalisia ad jaje.
Daśledavańnie z anałahičnymi vynikami
Anałahičnaje daśledavańnie, u jakim pryniali ŭdzieł 185 tysiač amierykancaŭ roznaj etničnaj prynaležnaści, praviali navukoŭcy z Univiersiteta Paŭdniovaj Kalifornii — jaho vyniki taksama apublikavaŭ Annals of Internal Medicine.
Važna, što vyniki daśledavańnia navukoŭcaŭ z ZŠA akazalisia anałahičnyja vysnovam ich brytanskich kalehaŭ.
Kamientary