Niderłandy źniknuć, Kaŭkaz adździelicca ad Rasii, a ŭ Biełarusi ničoha nie źmienicca: što budzie ź Ziamloj, kali ŭsie ledaviki rastajuć?
Amierykanski časopis National Geographic prademanstravaŭ, što budzie ź Ziamloj, kali ŭsie ledaviki na płaniecie rastanuć i ŭzrovień suśvietnaha akijana padymiecca na 65 mietraŭ. Kali heta zdarycca — nastupstvy dla płaniety buduć katastrafičnymi. Ale biełarusam možna nie chvalavacca: navat kali ŭsie ledaviki rastanuć, u Biełarusi amal ničoha nie źmienicca, tolki mora stanie bližej da nas. A voś inšyja krainy, u tym liku ŭsie našy susiedzi, mohuć zhubić vialikuju častku svaich terytoryj.
Paŭnočnaja Amieryka
Samyja niehatyŭnyja nastupstvy rastavańnia ledavikoŭ napatkajuć atłantyčnaje ŭźbiarežža ZŠA. Heta adnosna nievialikaja terytoryja, ale jana maje vialikaje značeńnie dla krainy, bo ŭschodnija štaty źjaŭlajucca pramysłovym i finansavym sercam ZŠA i majuć samuju vysokuju ščylnaść nasielnictva. Całkam źniknie Fłaryda. A voś inšamu važnamu štatu možna nie chvalavacca — Kalifornija zastaniecca cełaj.
Inšyja krainy taksama buduć pakutavać ad padvyšeńnia ŭzroŭniu vady. Kuba zamiest vyspy stanie archipiełaham, a piaresmyk, jaki złučaje Paŭdniovuju Amieryku z Paŭnočnaj, razarviecca.
Paŭdniovaja Amieryka
Istotna źmienicca bierahavaja linija Paŭdniovaj Amieryki. Reki Amazonka i Parahvaj spyniać svajo isnavańnie — ich basiejny pieratvoracca ŭ vielizarnyja zalivy. Ź vialikich haradoŭ mohuć całkam źniknuć Buenas-Ajres i Mantevidea, a voś dla inšych hustanasielenych terytoryi Paŭdniovaj Amieryki (San-Paŭłu, Rya-de-Žanejra) nastupstvy buduć nie takimi katastrafičnymi.
Afryka
Na pieršy pohlad, terytoryja Afryki istotna nie źmienicca. Ale pad vialikaj pahrozaj znachodziacca nievialikija terytoryi z samaj vialikaj ščylnaściu nasielnictva. Mora zatopić deltu raki Nił (maleńki kavałak Jehipta, dzie pražyvaje kala 40 miljonaŭ čałaviek), ahłamieracyju Łahos u Nihieryi (dzie žyvie bolš za 20 miljonaŭ čałaviek). Całkam mohuć źniknuć Sieniehał i Toha.
Jeŭropa
Jak my napisali vyšej, ź Biełaruśsiu ničoha nie zdarycca. Jak Bałtyjskaje, tak i Čornaje mora stanuć bližej da Biełarusi. Asabliva pašancuje haradziencam, jakija buduć žyć za niekalki dziasiatkaŭ kiłamietraŭ ad mora. A voś inšym krainam nie pazajzdrościš.
Całkam źniknuć Niderłandy. Ad Danii i Estonii zastanucca tolki nievialikija vyspy. Mora zatopić zachad Francyi, uschod Anhlii i poŭnač Hiermanii. Polščy pašancuje krychu bolš, ale i jana stracić častku terytoryj. Tracinu terytoryj straciać Litva i Łatvija. Va Ukrainie Krym kančatkova stanie vostravam, Mikałajeŭskaja, Chiersonskaja i Adeskaja vobłaści amal całkam źniknuć.
Ale samyja cikavyja mietamarfozy mohuć adbycca na ŭschodzie Jeŭropy. Kaśpij atrymaje vychad da akijana i takim čynam stanie sapraŭdnym moram, a Samara i Kazań mohuć stać partovymi haradami. Kaŭkaz budzie adździeleny ad Rasii pralivam. A voś Aralskaje mora znoŭ zapoŭnicca vadoj.
Azija
Pad vadoj moža apynucca ŭsia Paŭnočnaja Sibir. Chacia heta i małanasielenyja terytoryi, ale jany majuć vialikaje značeńnie dla Rasii.
A voś u inšych rehijonach situacyja jašče horšaja. Mora źniščyć kitajskija raŭniny, dzie žyvie bolš za 600 miljonaŭ čałaviek, a taksama całkam zatopić Banhładeš z nasielnictvam 160 miljonaŭ čałaviek.
Aŭstralija
Na hetym kantyniencie źjavicca novaje vialikaje voziera, a ad zatapleńnia buduć pakutavać amal usie žychary: bolšaja častka haradoŭ Aŭstralii znachodzicca mienavita na ŭźbiarežžy. Chacia całkam bujnyja harady Aŭstralii (Sidnej, Mielburn, Piert, Bryśbien) nie źniknuć.
Antarktyda
Jak kantynient Antarktyda faktyčna pierastanie isnavać i pieratvorycca ŭ vialiki archipiełah.
Ciapier čytajuć
«Šynvize — končany sadyst». Adzin z adyjoznych načalnikaŭ kałonii Babrujska pierabraŭsia ŭ Hiermaniju24
Kamientary