39-hadovy libierał Makron maje ŭsie šancy stać novym prezidentam Francyi
U druhi tur prezidenckich vybaraŭ u Francyi vychodziać levy libierał Emaniuel Makron i staršynia krajnie pravaha «Nacyjanalnaha frontu» Maryna Lo Pen.
Pavodle aficyjnych źviestak, jakija ahučyła Ministerstva ŭnutranych spraŭ Francyi, Makron atrymaŭ 24,01% hałasoŭ, Lo Pen — 21,3%.
Čytajcie taksama: Prezidentam Francyi stanie kandydat, žanaty z žančynaj, na 24 hady starejšaj za jaho?
Kandydat ad krajnie levych Žan Luk Melanšon (19,58% hołosov) i vyłučeniec ad partyi «Respublikancy» Fransua Fijon (20,01%) vybyvajuć z prezidenckaj honki.
Kansiervatar Fijon užo zaklikaŭ svaich vybarcaŭ u druhim tury prahałasavać za Makrona, suprać papulistki Lo Pen. Z takim sama zaklikam vystupiŭ kandydat ad Sacyjalistyčnaj partyi Benua Amon. Tak užo było ŭ 2002 hodzie, kali ŭsie palityčnyja siły Francyi, ad halistaŭ da kamunistaŭ, pierad druhim turam źjadnalisia, kab nie dapuścić da ŭłady baćku Maryny, Žana Mary Lo Pena. Takim čynam, Makron maje ŭsie šancy stać samym maładym prezidentam u historyi Piataj Respubliki.
Za prezidenckaje kresła ŭ Francyi zmahalisia 11 kandydataŭ.
Pakolki nichto z kandydataŭ nie nabiraje bolš za 50% hałasoŭ, pieramožca budzie vyznačany ŭ časie druhoha tura, pryznačanaha na 7 maja. U im voźmuć udzieł dva kandydaty, jakija pa vynikach niadzielnaha hałasavańnia nabiaruć najbolšuju kolkaść hałasoŭ.
Usiaho vybarčaje prava majuć kala 46 młn francuzaŭ.
Maryna Lo Pen
48-hadovaja Maryna Lo Pen — dačka zasnavalnika Nacyjanalnaha frontu Žan-Mary Lo Pena.
Rasijskaja presa padaje Lo Pen abaroncaj tradycyjnych kaštoŭnaściej. Ale pra toje, u jakoj atmaśfiery jana hadavałasia, krasamoŭna śviedčyć toj fakt, što za chryščonaha baćku joj baćka zaprasiŭ hałoŭnaha suteniora paryžskaha rajona plas Pihal.
Inšy jaskravy fakt: staŭšy lidaram partyi, Maryna vyklučyła ź jaje svajho tatu. Takim čynam jana sprabavała źmianić jaje imidž. Antysiemityzm staroha Lo Pena joj nie prydavaŭsia.
Lo Pen pa adukacyi advakat, ale pa prafiesii amal nie pracavała, z maładości pajšła ŭ palityku.
Lo Pen była dvojčy zamužam, a apošnija 8 hadoŭ žyvie nieraśpisanaja z paplečnikam pa partyi.
Emaniuel Makron
39-hadovy Makron byŭ samym maładym kandydatam. Najbolš niezvyčajny fakt ź jaho asabistaha žyćcia — jon u 17 hadoŭ syšoŭsia sa svajoj licejskaj nastaŭnicaj francuzskaj movy, starejšaj za jaho na 24 hady. Ich raman akazaŭsia mocny, nie adnadzionny. Aženiacca jany tolki praz 12 hadoŭ, kali jamu było 29, a joj — 53. Dziela hetaha Bryžyt Trańjo, majučy troje dziaciej, razyšłasia ź pieršym mužam.
«Heta ja ŭhavaryła jaho iści ŭ prezidenty ciapier, — skazała jahonaja žonka, — praź piać hadoŭ prablemaj dla jaho była b maja morda [ma gueule]», — pažartavała Trańjo.
Joj ciapier 63, supolnych z Makronam dziaciej u ich niama. U časie kampanii ŭ sacsietki byli zapuščanyja čutki, što Makron u asabistym płanie «viadzie padvojnaje žyćcio», ale brud da Makrona nie prystaŭ.
Makron atrymaŭ fiłasofski dypłom, a paśla skončyŭ Narmalnuju škołu administracyi (jaje možna hruba paraŭnać z našaj Akademijaj kiravańnia).
Jon pačynaŭ karjeru ŭ dziaržaŭnaj inśpiekcyi finansaŭ, a paśla syšoŭsia ź finansistami hrupy Nestle i banka Rothschild. Tolki za dva hady z 2010 da 2012 hadoŭ jon jak bankir zarabiŭ bolš za 2 miljony jeŭra. U 2012 hodzie jaho, biespartyjnaha, pryznačajuć ministram finansaŭ u sacyjalistyčny ŭrad, što adkryvaje jamu darohu ŭ palityku.
Makron — nie pieršy centryst u historyi, jaki moža stać prezidentam Francyi. Da jaho byŭ, naprykład, Valery Žyskar d'Esten u 1980-ja. Ale ŭpieršyniu prezidentam «šaścikutnika», jak jašče nazyvajuć Francyju, moža stać čałaviek biez partyi. Makron abapirajecca na stvorany pad vybary čysta palittechnałahičny ruch En marche («U ruch» abo «Napierad»).
Makron — vidavočny ŭlubioniec finansavych kołaŭ Francyi. Jon taksama, vidać, padajecca Maskvie najhoršym kandydatam.
U Francyi — prezidenckaja respublika, tamu ad prezidenta zaležyć šmat. Prezidentami krainy časta stanaviłasia značnyja histaryčnyja postaci. Šarl de Hol trymaŭsia pravych nacyjanalistyčnych pohladaŭ, Žorž Pampidu prasłaviŭsia jak unikalny znaŭca i miecenat mastactva, Fransua Miteran byŭ vieteranam-partyzanam i sacyjalistam, jaki, adnak, idealna ładziŭ z Ronaldam Rejhanam.
Prahramy kandydataŭ, sapraŭdy, istotna roźniacca. Lo Pen choča vychadu z zony jeŭra, razryvu adnosin z ZŠA i zbližeńnia z Rasijaj. Makron pachodzić z tradycyjnaha isteblišmientu i schilny praciahvać palityčny kurs Francyi apošnich dziesiacihodździaŭ.
Lo Pen, spadziajucca ŭ Rasii, asłabiła b Jeŭrasajuz i NATA — stratehičnyja zadačy Kramla. Ci aznačaje heta, što «boty Kramla» zamuciać niešta suprać Makrona pierad pieršym ci druhim turam?
U Francyi vielmi dakładnyja sacyjałahičnyja daśledavańni. Za ich vynikami možna sačyć tut.
Biaspałaŭ kančatkova rassvaryŭsia ź Cichanoŭskim: Dla jaho dobry tolki adzin čałaviek — Prakopjeŭ19
Kamientary