Ubačyŭšy raźlikovyja listki z zarobkam, mantažniki z «Biełaruśkalija» admovilisia pracavać.
12 krasavika na 1-m rudaŭpraŭleńni AAT «Biełaruśkalij» adbyŭsia stychijny schod. Rabotniki USP Trest «Rammantažbud» admovilisia vykonvać svaju pracu, tym samym vykazaŭšy svaju niezadavolenaść źnižeńniem apłaty pracy, paviedamlaje sajt Niezaležnaha prafsajuza harniakoŭ (NPH) belnp.org.
— Učora atrymali raźlikovyja listki, siońnia padychodziać ludzi z pytańniem: što rabić, — raspaviadaje staršynia NPH Trest «Rammantažbud» Siarhiej Babroŭ, jaki braŭ udzieł u stychijnym schodzie. — Zarobak upaŭ udvaja, ja ŭ sakaviku 2016 hoda zarablaŭ 1400 rubloŭ, siońnia — 710. Ludzi siońnia pačali aburacca, kažuć: jak žyć dalej? Atrymali pa 280 rubloŭ, a treba vypłačvać kredyty, za što žyć? Takoha nikoli nie było!
Rabočyja pajšli da liniejnaha kiraŭnictva, kab jany vyklikali kiraŭnictva tresta. U svaju čarhu dyrektar tresta Kurbyka V. M. jašče bolš aburyŭ rabotnikaŭ, zajaviŭšy, što niama takoha padzieńnia zarobku, pra jakoje kažuć ludzi:
— Źjaviłasia adčuvańnie, što administracyja «płavaje» ŭ manitorynhu zarobkaŭ, albo paprostu chavaje źviestki, — kaža Siarhiej. — Kiraŭnik pačaŭ pahražać, zajaŭlajučy, što na naša miesca pryjduć inšyja padradčyki i ŭsie zastanucca biez pracy i jon, u tym liku.
Na dumku rabotnikaŭ, zamiest taho, kab pasprabavać vyrašyć prablemu, jon tolki pahoršyŭ jaje. Dźvie hadziny razmoŭ — a ŭ vyniku ni da čaho nie pryjšli. U svaju čarhu dziaržaŭny prafsajuz, jak zaŭsiody, zmaŭčaŭ.
Na dumku Siarhieja Babrova, było vidać, što rabotniki zastalisia zadavolenyja saboj, nie reahavali na pavyšany ton dyrektara:
— Realna adčuvaju padtrymku našych pracaŭnikoŭ, niahledziačy na toje, što nie arhanizoŭvaŭ ničoha, usio atrymałasia spantanna. I heta vydatna, što ludzi samaarhanizavalisia, u hetym ja baču tolki stanoŭčaje. Pryčyna ŭ vidavočnym niedahladzie kiraŭnictva, bo prablema ŭźnikła nie siońnia, a jašče pačynajučy sa studzienia pačałosia padzieńnie zarobkaŭ. My chacieli ahučyć hetyja prablemy na schodzie ŭčastka RMU ŭ sakaviku, ale z kiraŭnictva tresta, akramia načalnika ŭčastka, nichto nie pryjšoŭ. Ubačyŭšy takoje staŭleńnie, narod ustaŭ i prosta syšoŭ sa schodu.
Sa słoŭ Siarhieja, rabotnikam 1-ha RU zvanili rabotniki ź inšych placovak, z 2, 3 i 4-ha rudaŭpraŭleńniaŭ, jakija zajavili i nam, i svajmu kiraŭnictvu pra padtrymku našaha patrabavańnia.
Kiraŭnictva prapanavała sabracca 13 krasavika, vybraŭšy asnoŭnych pradstaŭnikoŭ ad pracoŭnaha kalektyvu, ab čym jany buduć havaryć, nie viadoma, uličvajučy tuju tanalnaść, u jakoj prachodziła siońniašniaja hutarka.
Tym bolš adrazu ž paśla hetaha vypadku rabotniki adčuli najstražejšy kantrol za rasparadkam pracoŭnaha času. Naturalna, buduć łavić i sačyć, miarkuje aktyvist prafsajuzu. Užo pajšli ŭ adras NPH abvinavačvańni ŭ padrychtoŭcy hetaj akcyi, viadoma ž, lahčej šukać vinavatych u svaich pralikach, ličać aktyvisty.
U kiraŭnictvie «Biełaruśkalija» ž zajaŭlajuć, što heta byli naohuł nie ich rabotniki, bo pradpryjemstva «Remmantažbud» nie ŭvachodzić u strukturu «Biełaruśkalija», jano było vyłučana ŭ samastojnaje pradpryjemstva jašče ŭ 2014 hodzie.
Ciapier čytajuć
«Uźnikajuć ujaŭleńni, što palitviaźni musiać być stojkimi, sabranymi, udziačnymi. A realnaść roznaja». Pahavaryli ź ludźmi, jakija vodziać departavanych litaralna za ruku55
Kamientary