SBU padrychtavała zabaronu na ŭjezd rasijskaj udzielnicy «Jeŭrabačańnia», ale kančatkovaha rašeńnia niama
Słužba biaśpieki Ukrainy (SBU) padrychtavała dakumient ab zabaronie ŭjezdu va Ukrainu ŭdzielnikaŭ «Jeŭrabačańnia» ad RF Julii Samojłavaj. Pra heta paviedamlaje 112.ua sa spasyłkaj na «Interfaks-Ukraina».
«Na hetuju chvilinu rašeńnie ab zabaronie ŭjezdu jašče nie pryniataje, ale adkryju tajamnicu — adpaviedny dakumient užo padrychtavany», — zajaviŭ kiraŭnik SBU Vasil Hrycak, adkazvajučy na adpaviednaje pytańnie žurnalistaŭ.
«Zakon pavinien być adzin dla ŭsich. Jana nie prosta naviedała Krym, jana jašče pakinuła ślady ŭ sacsietkach, dzie jana vykazvałasia nakont Ukrainy i ŭłady, i ŭziataha kursu na jeŭraatłantyčnuju intehracyju. Maja pazicyja vyraznaja. Ja liču, jana nie pavinna pryjazdžać va Ukrainu», — dadaŭ jon.
Hrycak taksama paviedamiŭ, što kančatkovaje rašeńnie pa hetym pytańni pakul nie pryniataje. «U nas jašče jość šmat času da maja», — adznačyŭ kiraŭnik SBU.
Pra ŭdzieł Julii Samojłavaj u muzyčnym konkursie ŭ Kijevie stała viadoma 12 sakavika. Śpiavačka była abranaja «Pieršym kanałam». Ź dziacinstva vykanaŭca maje invalidnaść I hrupy i pierasoŭvajecca ŭ invalidnym vazku.
U aŭtorak, 14 sakavika, savietnik kiraŭnika MUS Ukrainy Anton Hieraščanka prapanavaŭ zatrymać Samojłavu. Svaju inicyjatyvu jon patłumačyŭ tym, što ŭ 2015 hodzie rasijanka vystupała na kancercie ŭ Krymie. Na paŭvostraŭ, pavodle infarmacyi daradcy kiraŭnika MUS, śpiavačka zajechała z boku Rasii, čym parušyła ŭkrainskaje zakanadaŭstva.
Kamientujučy hetuju infarmacyju, vykanaŭčy dyrektar «Jeŭrabačańnia» Jon Oła Sand zajaviŭ, što rašeńnie ab udziele ŭ konkursie Julii Samojłavaj pavinien pryniać Kijeŭ.
«My poŭnaściu pavažajem i razumiejem zakony Ukrainy, ale z boku Jeŭrapiejskaha viaščalnaha sajuza ŭ nas niama nijakich piarečańniaŭ da rasijskaj delehacyi i nie bačym parušeńniaŭ ź ich boku. My chočam, kab usie krainy prymali ŭdzieł, ale heta rašeńnie ŭkrainskaj ułady, i my budziem jaho pavažać», — padkreśliŭ jon.
«Dyk dadomu zabiary ałkaša abascanaha i vychodžvaj». Małady zahadčyk adździaleńnia balnicy nie strymlivaje siabie ŭ vyrazach u sacsietkach24
Kamientary